ឆ្នាំ២០២១នេះ មកពីបណ្តាខេត្តមួយចំនួន មានអ្នកជិះកង់ក្នុងបុព្វហេតុសប្បុរសធម៌ និងដោយឆន្ទៈស្រឡាញ់បរិស្ថានជិត៤០០នាក់ បានជួបជុំគ្នានៅក្រុងសៀមរាប ដើម្បីតភ្ជាប់ឡើងវិញព្រឹត្តិការណ៍ជិះកង់ដើម្បីបរិស្ថាន និងសុខភាពកុមារ បន្ទាប់ពីខានបានជួបជុំគ្នានាឆ្នាំ២០២០កន្លងទៅ ដោយវិបត្តិកូវីដ-១៩ ។
ដោយសារតែវិបត្តិជាសកល ជំងឺឆ្លងកូវីដ-១៩ ឆ្នាំ២០២០កន្លងទៅ បានរារាំងការជួបជុំគ្នានៃក្រុមអ្នកជិះកង់ស្រឡាញ់បរិស្ថាន និងអ្នកជិះកង់ជាសប្បុរសជនដើម្បីសុខភាពកុមារ តាមរយៈនៃការចូលរួមជួយឧបត្ថម្ភគាំទ្រសកម្មភាពសង្គ្រោះនិងព្យាបាលក្មេងតូចដោយឥតគិតថ្លៃនៃមន្ទីរពេទ្យកុមារអង្គរខេត្តសៀមរាប។
នេះបើយោងតាមចំណាប់អារម្មណ៍របស់លោក ពិន ប្រាកដ អភិបាលរងខេត្តសៀមរាប ដែលបានថ្លែងនៅក្នុងព្រឹត្តិការណ៍កកើតបន្តឡើងវិញ ជិះកង់ឆ្នាំទី៧ ដើម្បីបរិស្ថាន និងសុខភាពកុមារ នាព្រឹកថ្ងៃទី១៨ ខែធ្នូ ឆ្នាំ២០២១កន្លងទៅថ្មីៗនេះ ដែលបានរៀបចំឡើងដោយអគ្គនាយកដ្ឋានក្រុមហ៊ុនជិះកង់កម្ពុជា សហការឧបត្ថម្ភដោយក្រុមហ៊ុនទឹកពិសាបរិសុទ្ធ វីតាល់ និងក្រុមហ៊ុនផលិតផលស្នាដៃខ្មែរ មីជាតិ។
លោកអភិបាលរងខេត្ត ក៏បានបង្ហាញផងដែរនូវកំណត់សំគាល់ ស្តីពីការវិវត្តចេញពីអានុសាសន៍ដ៏ថ្លៃថ្លា សម្តេចតេជោប្រមុខរាជរដ្ឋាភិបាល ប្រែក្លាយពីសុភាវធម៌នៃសិល្បៈចែករំលែក ក្លាយទៅជាប្រពៃណីសង្គម ( ខ្មែរជួយខ្មែរ ) យ៉ាងផុលផុស នៅគ្រប់កាលៈទេសៈភ័យវិបត្តិទាំងឡាយនោះ។ អ្នកចូលរួមប្រមាណជិត៤០០នាក់ នៅក្នុងព្រឹត្តិការណ៍ជិះកង់បរិស្ថាននិងសប្បុរសធម៌ឆ្នាំទី៧នេះ គឺកំពុងស្ថិតនៅក្នុងបេះដូងសង្គម ក្រោមឥទ្ធិពលនៃសិល្បៈចែករំលែក យ៉ាងពិតប្រាកដ។
យ៉ាងណាក៏ដោយ ការជួបជុំនៃក្រុមកីឡាករ-កីឡាការិនីសប្បុរសធម៌ប្រមាណជិត៤០០នាក់នេះ ក៏ត្រូវបានបង្ហាញឲ្យឃើញផងដែរ នូវស្មារតីទទួលខុសត្រូវខ្ពស់ក្នុងការអនុវត្តនីតិវិធីប្រតិបត្តិវិធានសុវត្តិ ៣ការពារ និង៣កុំ ដើម្បីធានាថា នេះគឺជាព្រឹត្តិការណ៍ចូលរួមគាំទ្រការបើកប្រទេសឡើងវិញរបស់រាជរដ្ឋាភិបាល និងកំពុងស្ថិតក្នុងធ្លុងសាមគ្គីភាព ចេញដំណើរឆ្ពោះទៅរកគោលដៅនៃការអភិវឌ្ឍន៍។
លោក ហ៊ុន សុជាតិ អគ្គនាយកក្រុមហ៊ិនជិះកង់កម្ពុជា បានប្រើប្រាស់ឱកាសនៃកម្មវិធីជិះកង់នេះ រំលឹកជាប់ជាប្រចាំ អំពីក្រមសីលធម៌សម្រាប់ការរស់នៅប្រចាំថ្ងៃ ចៀសឆ្ងាយពីកូវីដ-១៩ ដោយការរស់តាមគន្លងប្រក្រតីភាពថ្មី។
ព្រឹត្តិការណ៍ជិះកង់នេះ បានប្រើបា្រស់ចម្ងាយផ្លូវប្រហែល១០គីឡូម៉ែត្រ និងមានពេលវេលាជាងកន្លះថ្ងៃ ជាមួយនិងកម្មវិធីកំសាន្តសប្បាយផ្សេងៗទៀតផងដែរ ដើម្បីជាការទាក់ទាញអ្នកចូលរួម ហើយការរៃអង្គាសមូលនិធិសប្បុរសដើម្បីចូលរួមគាំទ្រដល់មន្ទីរពេទ្យកុមារអង្គរខេត្តសៀមរាប ដែលកំពុងប្រតិបត្តិការមនុស្សធម៌ ពិនិត្យព្យាបាលជំងឺកុមារដោយឥតគិតថ្លៃនោះ បើតាមការផ្តល់ព័ត៌មានបឋមរបស់ក្រុមការងារ បានប្រាប់ឲ្យដឹងថា មានចំនួនប្រហែលជាលើសពី ២ម៉ឺនដុល្លារអាម៉េរិក ។
លោកវេជ្ជបណ្ឌិត ងួន ច័ន្ទភក្រ្តា នាយកមន្ទីរពេទ្យកុមារអង្គរ បានបង្ហាញឲ្យដឹងដែរថា ក្នុង១ថ្ងៃៗមន្ទីរពេទ្យបានទទួលកុមារពិនិត្យព្យាបាលជម្ងឺប្រមាណជា ៥០០នាក់។ ឆ្នាំ២០២១នេះ អ្នកជំងឺមានប្រមាណជាង១០ម៉ឺនករណី។ បញ្ហាប្រឈមចំពោះមុខគឺការលំបាកស្វែងរកថវិកា។ អ្នកជំងឺធ្ងន់ធ្ងរ ដែលមានតម្រូវការព្យាបាលដោយឯកទេសនោះ មានចំនួនកាន់តែច្រើន ជំងឺទាំងនោះមានដូចជា ជំងឺមហារីក តម្រងនោម ប្រព័ន្ធប្រសាទ ជម្ងឺទារក និងជំងឺរ៉ាំរ៉ៃមួយចំនួនទៀត ៕
