ទិវាលាងសម្អាតដៃថ្នាក់ខេត្តនាពេលនេះ ដែលជាសក្ខីភាពនៃការយកចិត្តទុកដាក់ក្នុងកម្រិតខ្ពស់ នៃការជួយជ្រោមជ្រែងកិច្ចអភិវឌ្ឍវិស័យអប់រំ យុវជន និងកីឡាទៅលើផ្នែកអនាម័យសិក្សា ក្រោមប្រធានបទ៖ «អនាគតយើងស្ថិតនៅលើដៃយើង សូមចូលរួមលាងសម្អាតដៃទាំងអស់គ្នាជាមួយការរស់នៅតាមបែបគន្លងជីវិតថ្មី»។ ការប្រារព្ធទិវាពិភពលោកលាងសម្អាតដៃ និងទិវាអនាម័យនៅតាមគ្រឹះស្ថានសិក្សានេះ ដោយបានសហការជាមួយអង្គការថែរក្សាដើម្បីកម្ពុជា (CFC) អង្គការ (GIZ) គឺជាដៃគូមិនអាចខ្វះបាន ដែលកន្លងមកបានឧបត្ថម្ភគាំទ្រលើផ្នែកទឹកស្អាត និង អនាម័យនៅតាមសាលារៀន ពិសេសសម្រាប់ការប្រារព្ធទិវាលាងសម្អាតដៃនាពេលនេះ ស្ថិតក្នុងបរិវេណសាលាបឋមសិក្សាខាន់សរ និងអនុវិទ្យាល័យគោល ស្រុកអង្គរជុំ ខេត្តសៀមរាប នាព្រឹកថ្ងៃទី១៨ ខែធ្នូ ឆ្នាំ២០២១។
លោក ទួន មិថុនា ប្រធានការិយាល័យអធិការកិច្ច និងជាប្រធានគណៈកម្មការសុខភាពសិក្សា នៃមន្ទីរអប់រំ យុវជន និងកីឡាខេត្តសៀមរាប មានប្រសាសន៏ថា ក្នុងនាមមន្ទីរអប់រំយុវជន និងកីឡាខេត្តសៀមរាប
សូមសម្តែងនូវអំណរគុណយ៉ាងជ្រាលជ្រៅចំពោះ អង្គការថែរក្សាដើម្បីកម្ពុជា (CFC) អង្គការ (GIZ) គឺជាដៃគូមិនអាចខ្វះបាន ដែលកន្លងមកតែងតែបានឧបត្ថម្ភគាំទ្រលើផ្នែកទឹកស្អាត និង អនាម័យនៅតាមសាលារៀន ពិសេសសម្រាប់ការប្រារព្ធទិវាលាងសម្អាតដៃនាពេលនេះតែម្តង។
លោក សង្ឃឹមយ៉ាងមុតមាំថា៖ ការប្រារព្ធទិវាពិភពលោកលាងសម្អាតដៃ និងអនាម័យនៅតាមគ្រឹះស្ថានសិក្សានេះ ជាការជួយជំរុញបន្ថែមទៀតសម្រាប់ចូលរួមកាត់បន្ថយនូវអត្រាការឆ្លងជំងឺផ្សេងៗ ជាពិសេសកាត់បន្ថយអត្រាមរណភាពរបស់កុមារទាក់ទងទៅនឹងជំងឺរាក ជំងឹរលាកផ្លូវដង្ហើមប្រភេទថ្មី (កូវីដ-១៩) និងបញ្ហាកង្វះអាហារូបត្ថម្ភ ដែលតែងតែកើតឡើងចំពោះកុមារ ដោយគ្រាន់តែអនុវត្តវិធីងាយៗ គឺការ “លាងសម្អាតដៃនឹងសាប៊ូ” ជាប្រចាំមុនពេលបរិភោគចំណីអាហារ និងក្រោយពេលចេញពីបន្ទោបង់ផងដែរ។ នេះជាសកម្មភាពសាមញ្ញៗ ងាយស្រួលអនុវត្ត យើងចំណាយពេលតិចតួច តែទទួលបានផលចំណេញច្រើន។
លោក បានបញ្ជាក់ថា ឆ្នាំនេះជាឆ្នាំទី៣ដែលគណ:កម្មការសុខភាពសិក្សាថ្នាក់ខេត្ត នៃមន្ទីរអប់រំ យុវជន និងកីឡា ខេត្តសៀមរាបបានប្រារព្ធទិវានេះឡើង ក្នុងគោលបំណងធ្វើឱ្យការលាងសម្អាតដៃនឹងសាប៊ូក្លាយទៅជាទម្លាប់ព្រោះថា៖ “ដៃរបស់យើងជាអនាគតរបស់យើង” ។ ការអប់រំពីអនាម័យជាប្រចាំនៅតាមសាលារៀន នឹងធ្វើឱ្យកុមារមានការផ្លាស់ប្តូរទៅរករបៀបរស់នៅ ដែលមានអនាម័យល្អប្រសើរនៅតាមគ្រួសារ។ យើងដឹងហើយថា កង្វះអនាម័យក្នុងជីវិតរស់នៅប្រចាំថ្ងៃ គឺជាមូលហេតុចម្បងធ្វើឱ្យប៉ះពាល់ដល់ការលូតលាស់របស់កុមារ បង្កឱ្យឆ្លងដង្កូវព្រូន ធ្វើឱ្យកុមារមានភាពស្លេកស្លាំង ឈានទៅកង្វះអាហារូបត្ថម្ភ ប្រឈមនឹងភាពក្រិន បន្ទុចបង្អាក់ដំណើរការលូតលាស់របស់កុមារ ទាំងផ្នែករាងកាយ និងស្មារតី ដោយសារជំងឺរាករូស ជំងឺផ្លូវដង្ហើមស្រួចស្រាល់ ជំងឺក្រិន ជំងឺខ្វះអាហារូបត្ថម្ភ ជំងឺភ្នែកក្រហម និងជាពិសេសគឺជំងឺ កូវីដ-១៩ ជាដើម៕
