ពលករចំណាកស្រុក ទៅធ្វើការក្រៅប្រទេស ហើយត្រូវថៅកែកេងប្រវ័ញ្ចអត្ថប្រយោជន៍ការងារ ពួកគេត្រូវបានគេចាត់ទុកថាជាទាសករសម័យទំនើប នេះបើតាមការលើកឡើងរបស់ អង្គការអន្តរជាតិទេសន្តរប្រវេសន៍ប្រចាំកម្ពុជា ហៅកាត់ថា IOM ថ្ងៃទី១៩ ខែធ្នូ ឆ្នាំ២០២១ ក្នុងទិវាអន្តរជាតិជនទេសន្តប្រវេសន៍ ខួបទី៣១ ស្ថិតក្នុងបរិវេណវត្តជ្រោយនាងងួន ស្ថិតក្នុងឃុំជ្រោយនាងងួន ស្រុកស្រីស្នំ ខេត្តសៀមរាប។
លោកស្រី គ្រីស្ទីន ប៉ាកូ ប្រធានបេសកកម្មអង្គការ IOM
បង្ហាញថាការរៀបចំ ទិវាអន្តរជាតិជនទេសន្តរប្រវេសន៍នេះ គឺជាការទទួលស្គាល់ពីឧបសគ្គ និងបញ្ហាប្រឈម ដែលពលករទេសន្តរប្រវេសន៍ជួបប្រទះ និងទទួលស្គាល់នូវភាពស៊ូទ្រាំ ភាពក្លាហាន និងការរួមចំណែកដ៏ធំធេងរបស់ពួកគេចំពោះសហគមន៍។ នៅពេលមានបញ្ហាសេដ្ឋកិច្ច ជាក់ស្ដែងការរាតត្បាតនៃជំងឺកូវីដ-១៩ ពលករចំណាកស្រុក គឺជាអ្នកដំបូងដែលបាត់បង់ការងារ និងប្រាក់ឈ្នួល ព្រមទាំងសិទ្ធិទទួលបានការថែទាំសុខភាពមិនគ្រប់គ្រាន់ ដែលប្រឈមនឹងហានិភ័យខ្ពស់នៃ អំពើហិង្សា ការរឹបអូស និងការកេងប្រវ័ញ្ចជាដើម។
លោកស្រី គ្រីស្ទីន ប៉ាកូ បន្ថែមថា អំឡុងពេល នៃវិបត្តិជំងឺកូវីដ-១៩នៅតែបន្ត ពលករចំណាកស្រុកជាង ២៦ម៉ឺននាក់ បានវិលត្រឡប់មកប្រទេសកម្ពុជាវិញ។ លើសពីនោះ ពលករចំណាកស្រុកជាស្ត្រី និង ក្មេងស្រី ជួបប្រទះវិសមភាពយ៉េនឌ័រ ដែលជាមធ្យម ពលការនីទទួលបានប្រាក់ឈ្នួលទាប និងប្រឈមនឹងបំណុល ខ្ពស់ជាងបុរស។
បើតាមសម្ដីអ្នកចូលរួម សុំមិនបញ្ចេញឈ្មោះ លើកឡើងថា លោក និងភរិយា បានឃ្លាតពីកូនអស់រយៈពេលប្រមាណជាង ១០ឆ្នាំ ដើម្បីទៅធ្វើការនៅប្រទេសថៃ ប៉ុន្តែលោកតែងត្រូវថៅកែ កេងប្រវ័ញ្ចកម្លាំងពលកម្ម ពន្យារពេលបើកប្រាក់ឈ្នួល ហើយនៅកន្លែងខ្លះ ថៅកែបើកប្រាក់ឈ្នួលឱ្យ ពុំបានគ្រប់ចំនួននោះទេ។
ក្នុងនាមអាជ្ញាធរស្រុកស្រីស្នំ លោកស្រី ចាន់ សួយ អភិបាលរងស្រុក បានអំពាវនាវដល់ប្រជាពលរដ្ឋក្នុងស្រុកស្រីស្នំ ក៏ដូចជានៅតាមបណ្ដាស្រុកនានា សូមស្វែងរកការងារដែលមានជំនាញច្បាស់លាស់ និងស្របច្បាប់ឱ្យអស់លទ្ធភាពសិន មុនធ្វើចំណាកស្រុកទៅបរទេស។ ក្នុងនោះខេត្តសៀមរាប មានសាលាបណ្ដុះបណ្ដាលវិជ្ជាជីវៈចំនួន២ ដែលផ្ដល់នូវជំនាញច្បាស់លាស់ និងពុំគិតថ្លៃសិក្សា។ សម្រាប់ឱកាសការងារ និងការសិក្សាជំនាញនោះ សូមបងប្អូនប្រជាពលរដ្ឋទំនាក់ទំនងអាជ្ញាធរស្រុក ឃុំ ភូមិ ដែលបងប្អូនកំពុងរស់នៅ។
គួររំលឹកថា ទិវាអន្តរជាតិជនទេសន្តរប្រវេសន៍ ១៨ ធ្នូ គឺជាការអនុម័ត នូវអនុសញ្ញាអន្តរជាតិស្តីពីការការពារសិទ្ធិរបស់ពលករទេសន្តរប្រវេសន៍ទាំងអស់ និងសមាជិកក្រុមគ្រួសាររបស់ពួកគេ។
