នាព្រឹកថ្ងៃទី១៩ ខែធ្នូ ឆ្នាំ២០២១នេះ រដ្ឋបាលខេត្តសៀមរាប រៀបចំប្រឡងក្របខណ្ឌមន្ត្រីរាជការស៊ីវិលក្រសួងមហាផ្ទៃ នៃរដ្ឋបាលខេត្ត ដែលបានធ្វើឡើងនៅវិទ្យាល័យអង្គរ ក្រុងសៀមរាប ក្រោមការអញ្ជើញចូលរួមដ៏ខ្ពង់ខ្ពស់បើកវិញ្ញាសារប្រលងពីសំណាក់ឯកឧត្តម ទៀ សីហា អភិបាលខេត្តសៀមរាប និងជាប្រធានគណ:កម្មការរៀបចំការប្រឡងនេះ។
យោងតាមរបាយការណ៍របស់គណ:កម្មការប្រឡងបានឲ្យដឹងថា មានបេក្ខជនចំនួន ៣៥៧នាក់ ស្រីចំនួន១៩៤នាក់ ក្នុងការដាក់ពាក្យប្រឡង។ ក្នុងនោះមានអ្នកដាក់ពាក្យប្រឡងចូលក្របខណ្ឌរដ្ឋបាលជាន់ខ្ពស់ចំនួន ៧៦នាក់ ស្រី ២៦នាក់, ក្របខណ្ឌមន្ត្រីក្រមការ ចំនួន ៩៩នាក់ ស្រី ៥៣នាក់ និងក្របខណ្ឌលេខាធិការរដ្ឋបាលចំនួន ១៧៩នាក់ ស្រី ១១៥នាក់។
របាយការណ៍ដដែលបានបង្ហាញថា បើទោះជាយ៉ាងនេះក្តី ក្នុងថ្ងៃប្រឡង មានបេក្ខជនចំនួន ១០៩នាក់ បានអវត្តមានក្នុងនោះបេក្ខជនប្រឡងចូលក្របខណ្ឌរដ្ឋបាលជាន់ខ្ពស់អវត្តមាន ចំនួន ២៥នាក់ ស្រី ៨នាក់, ក្របខណ្ឌមន្ត្រីក្រមការអវត្តមានចំនួន ២៦នាក់ ស្រី ១៣នាក់ និងក្របខណ្ឌលេខាធិការរដ្ឋបាលអវត្តមានចំនួន ៥៨នាក់ ស្រី ៣៦នាក់។
លោក សន សេរីវុទ្ធី នាយកទីចាត់ការធនធានមនុស្សសាលាខេត្ត បានបញ្ជាក់ឱ្យដឹងថា ក្នុងចំណោមបេក្ខជន ដែលមកប្រឡងនេះ រដ្ឋបាលខេត្ត ត្រូវជ្រើសរើសយកនូវបេក្ខជនមានពិន្ទុខ្ពស់ជាងគេ( ប្រឡងជាប់) នៃផ្នែកទាំងបីខាងលើ រួមមាន÷ ក្របខណ្ឌរដ្ឋបាលជាន់ខ្ពស់ចំនួន ២នាក់, ក្របខណ្ឌមន្ត្រីក្រមការចំនួន ៣នាក់ និងក្របខណ្ឌមន្ត្រីលេខាធិការដ្ឋានចំនួន ២នាក់៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
