ក្រុមការងារកាត់សម្អាតរុក្ខជាតិ លើប្រាសាទ ក្នុងរមណីយដ្ឋានអង្គរ តែងតែបានកាត់សម្អាតរុក្ខជាតិតូចធំ ជាប្រចាំថ្ងៃ ទៅតាមផែនការគ្រោងទុក ដែលបានរៀបចំឡើងតាមស្ថានភាពជាក់ស្តែង ដើម្បីបញ្ជៀសនូវហានិភ័យផ្សេងៗ ដែលបង្កឡើងដោយដើមរុក្ខជាតិមានផ្លែ។
លោក ងិន ធី អ្នកទទួលបន្ទុកការសម្អាតរុក្ខជាតិតាមប្រាសាទ នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានឱ្យដឹងកាលពីថ្ងៃទី០៣ ខែមករា ឆ្នាំ២០២២នេះថា ក្នុងចំណោមរុក្ខជាតិទាំងអស់ ដែលដុះនៅលើប្រាសាទ មានរុក្ខជាតិប្រភេទធំៗមួយចំនួន ដូចជា ដើមពោធិ៍ ដើមជ្រៃ ដើមស្ពង់ ដុះជាប់ជាប្រចាំមិនថា រដូវប្រាំងឬវស្សាឡើយ ហើយរុក្ខជាតិទាំងនោះ ងាយនឹងដុះលូតលាស់លឿន ដែលធ្វើឱ្យក្រុមការងារត្រូវយកចិត្តទុកដាក់ ក្នុងការកាត់សម្អាតជាប្រចាំ ពោលគឺក្នុងរយ:ពេល១ខែកន្លះ ឬ២ខែ ត្រូវមកកាត់សម្អាតម្តង មិនដូចរុក្ខជាតិប្រភេទស្មៅឡើយ។ ការធ្វើបែបនេះ ដើម្បីលើកកម្ពស់អនាម័យសោភ័ណភាព និងចៀសវាងធ្វើឱ្យថ្មប្រាសាទក្រៀក ឬរលុះងាយបាក់រលំ នៅពេលរុក្ខជាតិនោះដុះកាន់តែធំ។ក្នុងចំណោមដើមឈើទាំងនោះ មានដើមពោធិ៍ ដើមជ្រៃ និងដើមឈើមានផ្លែជាច្រើនទៀត បានបង្កហានីភ័យខ្លាំងទៅលើប្រាង្គប្រាសាទ ព្រោះពួកសត្វវាបានស៊ីផ្លែឈើហើយពាំគ្រាប់ទៅទុកលើប្រាសាទធ្វើអោយគ្រាប់នោះដុះលូតលាស់លឿនទើបបង្កហានីភ័យដល់ប្រាសាទ។ជាពិសេសខ្យល់បក់ នាំគ្រាប់មកទើលើល្បាក់ថ្ម និងសត្វស្លាប តែងតែពាំគ្រាប់រុក្ខជាតិ មកធ្វើជាចំណីរអាហារជាប្រចាំ។បើតាមអាជ្ញាធរជាតិអប្សរា បានសម្ដែងការព្រួយបារម្ភពីដើម្មពោធិ៍នៅខាងមុខប្រាសាទអង្គរយ៉ាងខ្លាំង ដោយថា ដើម្បីពោធិ៍ទាំងនោះ កំពុងបង្កហានីភ័យខ្លាំង ខណ:ដែលវាដុះនៅក្បែរនឹងប្រាសាទអង្គរ ។
បើយោងតាមឯកសារស្រាវជ្រាវផ្សេងៗ បានបញ្ជាក់ថា ដើមពោធិជារុក្ខជាតិម្យ៉ាងដែលមានជីវិតហើយដើមពោធិ៍ ក៏ជាព្រះពុទ្ធអង្គទ្រង់ធ្លាប់គង់នៅក្រោមដើមពោធិ៍អស់ជាច្រើនសប្តាហ៍ ដើម្បីធ្វើសមាធិរហូតដល់ព្រះអង្គបានត្រាស់ដឹងនូវអនុត្តរសម្មាសម្ពោធិញ្ញាណ។ អ្នកជំនាញ បន្តថា ដើមពោធិ៍ឈ្មោះថា ជាមហារុក្ខជាតិ នៃជីវិតពីព្រោះដើមពោធិ៍ត្រូវការសេចក្តីស្ងប់ស្ងាត់។ ហើយសេចក្ដីស្ងប់ព្រះពុទ្ធអង្គទ្រង់រកឃើញនៅក្នុងឬស-តួ-ដើម-មែក-ស្លឹកផ្កា និងផ្លែរបស់ដើមពោធិ៍៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
