អគារសិក្សាមួយខ្នងកំពស់ ២ជាន់ មាន៦បន្ទប់ ក្នុងសាលាបឋមសិក្សាពាក់ស្នែង ក្នុងឃុំពាក់ស្នែង ស្រុកអង្គរធំ ខេត្ដសៀមរាប ត្រូវបានដាក់សម្ភោធឲ្យប្រើប្រាស់ជាផ្លូវការឱ្យសិស្សានុសិស្សចូលរៀន ដើម្បីអបអរសាទរបវេសនកាលថ្មី កាលពីថ្ងៃទី១០ ខែមករា ឆ្នាំ២០២២នេះ ក្រោមអធិបតីភាពឯកឧត្ដម ផៃ សុខខេង នាយករងខុទ្ធកាល័យសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាអនុប្រធានក្រុមការងារចុះជួយឃុំពាក់ស្នែង ស្រុកអង្គរធំ។
មានប្រសាសន៍ក្នុងឱកាសនោះ ឯកឧត្ដម ផៃ សុខខេង មានប្រសាសន៍ថា អគារសិក្សាថ្មីនេះ បានចាប់ផ្ដើមសាងសង់កាលពីថ្ងៃទី២០ ខែធ្នូ ឆ្នាំ២០២០កន្លងទៅ ហើយត្រូវបានបញ្ចប់ដំណើរការសាងសង់ នៅថ្ងៃទី៣១ ខែសីហា ឆ្នាំ២០២១ ដែលចំណាយអស់ទឹកប្រាក់ចំនួន ១១២,៥០០ដុល្លា ដែលជាជំនួយសប្បុរសជន ពីប្រទេសកូរ៉េខាងត្បូង តាមរយៈព្រះសង្ឍមួយអង្គ និងមានការជួយឧបត្ថម្ភខ្លះៗទៅលើសម្ភារៈ និងបរិក្ខា សម្រាប់បំពាក់នៅក្នុងសាលារៀនរួមមានតុ កៅអី ភ្លើងជាដើម។ ការសាងសង់អាគារសិក្សាថ្មីនេះ គឺស្របតាមតម្រូវការសិក្សានុសិស្សកើនឡើងពីរមួយឆ្នាំទៅមួយឆ្នាំ ខណៈដែលនៅទីនោះខ្វះអគារសិក្សាផងដែរ។
ឯកឧត្ដម បញ្ជាក់ថា ចំពោះការសម្ភោធដាក់ឱ្យដំណើរជូនប្អូនៗសិស្សានុសិស្សចូលរៀននាពេលនេះ គឺស្របតាមក្រសួងអប់រំ យុវជន និងកីឡា បានបើកបវេសនកាលសម្រាប់ឆ្នាំសិក្សា ២០២១-២០២២ ដែលសិស្សានុសិស្សគ្រប់ថ្នាក់ និងគ្រប់ភូមិសិក្សានៅទូទាំងប្រទេសបានចូលរៀនដោយផ្ទាល់ឡើងវិញ បន្ទាប់ពីថ្នាក់រៀនត្រូវបានជំនួសដោយការរៀនពីចម្ងាយអស់រយៈពេលជិត ២ឆ្នាំមកហើយ។
ឯកឧត្ដមបានបន្ដថា ចំពោះសមទ្ធិផលដែលបានដាក់ឲ្យប្រើប្រាសក្នុងពេលនេះ តាំងនាមឲ្យបងប្អូនប្រជាពលរដ្ឋ និងជាអាណាព្យាបាល សូមសម្ដែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់រាជរដ្ឋាភិបាល រួមនឹងក្រសួងអប់រំ យុវជន និងកីឡា ជាពិសេសលោកគ្រូអ្នកគ្រូ ដែលក្នុងរយៈកាលកន្លងមកនេះ បានខិតខំប្រឹងប្រែង តស៊ូ ជម្នះការលំបាកសព្វបែបយ៉ាង ដើម្បីធានាបាននូវការបន្តការផ្តល់ការអប់រំដល់សិស្សានុសិស្ស ក្នុងដំណាក់កាលដ៏លំបាកនៃការឆ្លងរាលដាលនៃជំងឺកូវីដ-១៩។ ការបើកបវេសកាលថ្មីនេះ បានបង្ហាញពីការបើកឡើងវិញ នៃសង្គម សេដ្ឋកិច្ច ក្នុងប្រក្រតីភាពនៃគន្លងថ្មី ដែលយើងទាំងអស់គ្នាត្រូវរៀនរស់នៅជាមួយវាក្នុងលក្ខណៈយូរអង្វែង។ ឯកឧត្ដម ក៏បានអំពាវនាវដល់គណៈគ្រប់គ្រងសាលា លោកគ្រូអ្នកគ្រូ អាណាព្យាបាល និងជាពិសេស ប្អូនៗ ក្មួយៗសិស្សានុសិស្សទាំងអស់បន្តចូលរួមអនុវត្តតាមវិធានការសុខាភិបាលនានា ដើម្បីសាលារៀនយើងក្លាយជាទីកន្លែងដែលផ្តល់ការអប់រំប្រកបដោយសុវត្ថិភាព និងមិនមែនជាកន្លែងចម្លងមេរោគកូវីដ-១៩ ចូលសហគមន៍។
បើតាមលោក ណក់ សម្បត្ដិ នាយកសាលាបឋមសិក្សាពាក់ស្នែង បានឲ្យដឹងថា សាលាបឋមសិក្សានេះបានផ្លាស់ប្ដូរទីតាំងជាច្រើនកន្លែង និងបាត់ឈ្មោះនៅក្នុងបញ្ជីដោយការដុតបំផ្លាញពីសំណាក់ពួកឧទាមខ្មែរក្រហម ទើបតែនៅឆ្នាំសិក្សា១៩៩៧-១៩៩៨ បានចាប់បដិសន្ធិឡើងវិញ ដោយមានអង្គការផ្សេងៗ បានជួយសាងសង់អគារសិក្សាជាបន្ដបន្ទាប់។ អាគារសិក្សាថ្មីនេះ នៅខ្វះសម្ភារៈបំពាក់បន្ទប់សិក្សាច្រើន ដូចជាតុសិស្ស កៅអី អគ្គិសនីជាដើម។ ជាមួយនោះលោកបានអំពាវដល់សប្បុរសជនទាំងក្នុង និងក្រៅប្រទេស សូមជួយចូលរួមឧបត្ថម្ភដល់សាលារៀនមួយនេះ ដើម្បីឱ្យមានលទ្ធភាពបង្រៀនសិស្សនុសិស្សគ្រប់គ្រាន់៕
អត្ថបទ និង រូបភាព៖ លោក បូ សាវី
កែសម្រួល៖ អ៊ុន ណារាជ្យ
