ថ្លែងក្នុងឱកាសជួបសំណេះសំណាលជាមួយមគ្គុទ្ទេសក៍ទេសចរណ៍ ក្នុងខេត្តសៀមរាប នាព្រឹកថ្ងៃទី១១ ខែមករា ឆ្នាំ២០២២នេះ ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ដោយសារតែវិបត្តិ នៃជំងឺរាតត្បាតកូវីដ-១៩ ក្នុងរយ:ពេល ២ឆ្នាំមកនេះ មគ្គុទ្ទេសក៍ទេសចរណ៏នៅតំបន់អង្គរ បានជួបការលំបាកយ៉ាងខ្លាំងផ្នែកជីវភាព ដោយសារតែគ្មានភ្ញៀវទេសចរមកកម្សាន្តព្រោះតែកូវីដ-១៩ ដោយអ្នកខ្លះបានងាកទៅរកការងារផ្សេងធ្វើបណ្ណកោះអាសន្ន ដោយខ្លះធ្វើជាកម្មករសំណង់ អ្នកខ្លះរត់ម៉ូតូឌុប និងរបរផ្សេងៗទៀតជាដើម។
ឯកឧត្តម ទៀ សីហា បន្តថា ឥឡូវនេះស្ថានភាពកូវីដ មានការធូស្រាលបន្តិច ភ្ញៀវទេសចរក្នុងស្រុកបានចាប់ផ្តើមចេញដើរកម្សាន្តខ្លះៗ ទៅតាមរមណីយដ្ឋាននានា ហើយសម្រាប់ភ្ញៀវទេសចរជាតិ និងបរទេសនៅក្នុងស្រុកដែលបានមកកម្សាន្តតាមប្រាសាទនានា នៅក្នុងរមណីយដ្ឋានអង្គរ ក៏បានប្រើប្រាស់សេវាមគ្គុទ្ទេសក៍ទេសចរណ៍ ក្នុងការពន្យល់បកស្រាយអំពីប្រាសាទនីមួយៗ។ ដែលការប្រើប្រាស់សេវានេះ អាចឱ្យបងប្អូនមគ្គុទ្ទេសក៍ទេសចរណ៍ រកចំណូលបានខ្លះៗវិញ។ ប៉ុន្តែ ឯកឧត្តម បានសង្កេតឃើញថា កន្លងមកនេះមគ្គុទ្ទេសក៍ទេសចរណ៍របស់យើង បានមកអង្គុយចាំភ្ញៀវ ដែលគេត្រូវការមគ្គុទ្ទេសក៍ទេសចរណ៍ នៅតាមក្រោមម្លប់ឈើតាមផ្លូវចូលទៅប្រាសាទ ឬអាចនិយាយថា អង្គុយចាំចាប់ម៉ូយ ទៅតាមលទ្ធភាពរៀងៗខ្លួន ដែលសកម្មភាពទាំងនេះ ធ្វើឱ្យមានការពិបាកមើលដល់ភ្ញៀវទេសចរ ក៏ដូចជាធ្វើដំណើរឆ្លងកាត់ទីតាំងទាំងនោះទៀតផង។
ឯកឧត្តម បន្ថែមថា ដើម្បីជួយដល់បងប្អូនមគ្គុទ្ទេសក៍ទេសចរណ៍ នៅក្នុងគ្រាលំបាកនេះ ឯកឧត្តម មានគម្រោងជួបពិភាក្សា ជាមួយអាជ្ញាធរជាតិអប្សរា រៀបចំឱ្យមានកន្លែងមួយសមរម្យនៅគ្រប់ប្រាសាទដោយដាក់ថា កន្លែងផ្តល់សេវាមគ្គុទ្ទេសក៍ទេសចរណ៍ ដើម្បីឱ្យខាងសមាគមមគ្គុទ្ទេសក៍ទេសចរណ៍នីមួយៗ រៀបចំសមាជិករបស់ខ្លួនឱ្យទៅនៅផ្តល់សេវាទីនោះ ដោយមានការប្តូរវេនគ្នា។ ហើយរៀបចំបែបនេះ ងាយស្រួលដល់ភ្ញៀវទេសចរ ដែលត្រូវការសេវាមគ្គុទ្ទេសក៍ទេសចរណ៍ គេទៅរក និងមានសណ្តាប់ល្អផងដែរ។
ព័ត៌មានជាតិ ថ្មីៗ
បន្ថែមពីនោះនៅក្នុងឱកាសជួបសំណេះសំណាលនេះដែរ ឯកឧត្តម ក៏បានទទួលយកនូវសំណូមពរមួយចំនួន ពីបងប្អូនមគ្គុទ្ទេសក៍ទេសចរណ៍ តំណាងសមាគមមគ្គុទ្ទេសក៍ទេសចរណ៍នីមួយៗ ដោយពួកគាត់បានស្នើសុំមិនឱ្យយកកំរ៉ៃ លើការបន្តអាជ្ញាប័ណ្ណ សម្រាប់ឆ្នាំ២០២២ ស្នើសុំមិនបាច់បង់លុយពិនិត្យសុខភាព សម្រាប់យកមកបន្តអាជ្ញាប័ណ្ណ ស្នើសុំឱ្យមានការផ្តល់ប័ណ្ណ ប.ស.ស ស្នើឱ្យមានការផ្តល់ប្រាក់១ ខែ៤០ដុល្លា ដូចបុគ្គលិកសណ្ឋាគារជាដើម។ ពាក់ព័ន្ធបញ្ហាខាងលើនេះ ឯកឧត្តមអភិបាលខេត្ត ក៏បានជួយដោះស្រាយជូនមួយចំនួនដូចជា ការបន្តអាជ្ញាប័ណ្ណសម្រាប់ឆ្នាំ២០២២ គឺបងប្អូនមគ្គុទ្ទេសក៍ទេសចរណ៍មិនបាច់បង់ប្រាក់ទេ ដោយខាងមន្ទីរជំនាញ បានស្នើទៅថ្នាក់លើរួចហើយរងចាំការសម្រេច ហើយចំពោះការទៅពិនិត្យសុខភាពសម្រាប់យកមក បន្តអាជ្ញាប័ណ្ណដោយម្នាក់ៗ ត្រូវបង់១០ដុល្លានោះ សម្រាប់ឆ្នាំ២០២២នេះ ឯកឧត្តមអភិបាលខេត្ត ជាចេញលុយជំនួសសម្រាប់បងប្អូនមគ្គុទ្ទេសក៍ទេសចរណ៍ ជាង៥,០០០នាក់ នៅក្នុងខេត្តសៀមរាប សម្រាប់ប័ណ្ណ ប.ស.ស មន្រ្តីជំនាញ និងពិភាក្សាមើលអំពីលិខិតបទដ្ឋានក្នុងការផ្តល់ជូន។
សូមជម្រាបថា ក្នុងឱកាសជួបសំណេះសំណាលជាមួយមគ្គុទ្ទេសក៍ទេសចរណ៍នេះដែរ ឯកឧត្តមអភិបាខេត្ត ក៏បានផ្តល់ជូននូវស្បៀងអាហារ និងថវិកាមួយចំនួន ជូនដល់បងប្អូនមគ្គុទ្ទេសក៍ទេសចរណ៍ ដែលបានចូលរួមក្នុងកម្មវិធីនេះ ចំនួន២០០នាក់ ដើម្បីដោះស្រាយជីវភាពបានមួយកម្រិតខ្លឺផងដែរ៕
អត្ថបទ និងរូបភាព៖ លោក ស៊ាន សុផាត និងលោក ឃុត សៅ
កែសម្រួល៖ លីវ សុខុន
