ប្រជាពលរដ្ឋប្រមាណជាង ១០០គ្រួសារ ដែលកំពុងមានជីវភាពខ្វះខាត រស់នៅក្នុងឃុំពាក់ស្នែងថ្មី ស្រុកអង្គរធំ ខេត្ដសៀមរាប បានទទួលអំណោយមនុស្សធម៌ពីអង្គការសមាគមរួបរួមគ្នាប្រឆាំងភាពក្រីក្រ ហៅកាត់ អង្គការ”ប៉ាប៉ា” ដើម្បីជួយដោះស្រាយដល់ជីវភាពរស់នៅប្រចាំថ្ងៃរបស់ពួកគាត់ ដោយអំណោយរួមមាន៖ អង្ករ ទឹកស៊ីអ៊ីវ ទឹកត្រី ប៊ីចេង ទឹកម្ទេសនិងអំបិល។ ដោយពិធិចែកនេះដែរ ធ្វើឡើងកាលពីថ្ងៃទី១១ ខែមករា ឆ្នាំ២០២២នេះ នៅឃុំពាក់ស្នែងថ្មី ឃុំពាក់ស្នែង ស្រុកអង្គរធំ ខេត្តសៀមរាប។
បើតាមលោក មុត យ័សា ប្រធានអង្គការសមាគមរួបរួមគ្នាប្រឆាំងភាពក្រីក្រ បានថ្លែងថា ដោយមើលឃើញពីការលំបាកក្នុងជីវភាពរបស់ប្រជាជនដោយសារជំងឺកូវីដ១៩ លោកនឹងការងារចុះជួយឃុំពាក់ស្នែង ស្រុកអង្គរធំ ខេត្តសៀមរាប បានផ្ដល់ជំនួយជាស្បៀងអាហារកូវីដ-១៩ សម្រាប់ប្រជាជនប្រមាណ ១០០គ្រួសារ ដើម្បីជួយសម្រួលដល់ជីវភាពពួកគាត់ដែលកំពុងខ្វះខាត។ អំណោយនេះ ជាជំនួយរបស់អង្គការប៉ាប៉ា និងក្រុមការងាររបស់សម្ដេចពិជ័យសេនា ទៀ បាញ់ ឧបនាយរដ្ឋមន្ដ្រី រដ្ឋមន្ដ្រីក្រសួងការពារជាតិ ចុះជួយមូលដ្ឋានឃុំពាក់ស្នែង ស្រុកអង្គរធំ ខេត្ដសៀមរាប។
លោកបានបន្ដថា ជានិច្ចកាលក្រុមការងារដែលមានឯកឧត្ដម ខៀវ ឆេន ប្រធានក្រុមការងារ ឯកឧត្ដម ស ថាវី ប្រធានកិត្ដិយសនិងឯកឧត្ដម ផៃ សុខខេង អនុប្រធាន តែងតែគិតគូដល់សុខទុក្ខរបស់បងប្អូនគ្រប់កាលៈទេសៈ ពិសេសក្នុងពេលដែលបងប្អូនកំពុងជួបការលំបាកជីវភាពរស់នៅ ក្នុងអំឡុងពេលនៃការឆ្លងរាលដាលនៃជំងឺកូវី-១៩ អស់រយៈពេលជិត២ឆ្នំាកន្លងមកនេះ។ ទោះបីអំណោយនេះ មានតិចតួចក៍ពិតមែន ប៉ុន្ដែអាចជួយសម្រួលដល់ការខ្វះខាតប្រចាំថ្ងៃបានមួយរយៈដែរ ហើយលោកនឹងស្វែងរកអង្គការដៃគូរផ្សេងៗទៀត ដើម្បីជួយផ្ដល់ស្បៀងអាហារដល់ប្រជាពលរដ្ឋនៅឃុំនេះបន្ដទៀត។
ក្នុងឱកាសនោះដែរលោក ឡុង រដ្ឋារក្ស អភិបាលស្រុកអង្គរធំ បានសម្ដែងកោតសរសើរដល់ក្រុមការងារចុះជួយមូលដ្ឋានឃុំពាក់ស្នែង និងអង្គការមនុស្សធម៌ ដែលតែងគិតគូរពីការលំបាករបស់ប្រជាពលរដ្ឋនៅមូលដ្ឋានផ្ទាល់។ ដោយជារើយៗក្រុមការងារ និងអង្គការនេះ តែងបានផ្ដល់ស្បៀងអាហារ ព្រមទាំងអំណោយថវិកាជាច្រើនទៀតដល់ប្រជាពលរដ្ឋនៅឃុំនេះជាបន្ដបន្ទាប់ ដែលនេះបង្ហាញថា ក្រុមការងាររាជរដ្ឋាភិបាល មានការយកចិត្ដទុកដាក់ខ្ពស់ដល់ប្រជាពលរដ្ឋដែលកំពុងខ្វះខាត ក្នុងអំឡុងពេលជំងឺកូវីដ១៩។
លោកអភិបាលស្រុកបន្ដថា លោកនឹងគៀងគរសប្បុរសជនជួយផ្ដល់ជំនួយដល់ប្រជាជនដែលកំពុងជួបការលំបាកនេះបន្ថែមទៀត។ ជាមួយនោះដោយសារជំងឺកូវីដ-១៩ ជាប្រភេទវីរ៉ុសបំម្លែងថ្មីអូមីក្រុងបានឆ្លងចូលសហគមន៍ ដូចនេះប្រជាពលរដ្ឋចូលរួមការពារ និងអនុវត្តឱ្យបានជាប់ជាប្រចាំប្រចាំនូវវិធានការនានារបស់រាជរដ្ឋាភិបាល និងក្រសួងសុខាភិបាល ជាពិសេសការអនុវត្តវិធានការ ៣កុំ និង៣ការពារ។ ក្នុងនោះលោកក៍បានអំពាវដល់ប្រជាពលរដ្ឋទាំងអស់ ត្រូវទៅទទួលវ៉ាក់សាំងដូសទី៣ ឬដូសជម្រុញ ឱ្យបានគ្រប់ៗគ្នា ដើម្បីលុបបំបាត់ជំងឺកាចសាហាវមួយនេះបានឆាប់រហ័យ៕
អត្ថបទ និង រូបភាព៖លោក ឈិត សាវី
កែសម្រួល៖ អ៊ុន ណារាជ្យ
