មានប្រសាសន៍នៅក្នុងឱកាសដឹកនាំកិច្ចប្រជុំស្តីពីបញ្ហាជនអនាថា និងអ្នកសុំទាន នៅក្នុងមូលដ្ឋានខេត្តសៀមរាប នាព្រឹកថ្ងៃទី១២ ខែមករា ឆ្នាំ២០២២នេះ លោក នាក់ ណេរ៉ុន អភិបាលរងខេត្ត និងជាប្រធានអនុគណៈកម្មាធិការដោះស្រាយបញ្ហាជនអនាថាខេត្តសៀមរាប បានបញ្ជាក់ថា បញ្ហាជនអនាថា និង អ្នកសុំទាន ដែលបង្កឲ្យមានភាពអនាធិបតេយ្យ និងបាត់បង់សណ្តាប់ធ្នាប់នោះ បាននឹងកំពុងកើតមាននៅក្នុងខេត្តសៀមរាប ជាពិសេសនៅក្នុងក្រុងសៀមរាប តំបន់រមណីយដ្ឋានអង្គរ និងឧទ្យានជាតិភ្នំគូលែន កំពុងក្លាយជាបញ្ហាក្តៅ ដែលតម្រូវឲ្យអាជ្ញាធរខេត្តទេសចរណ៍មួយនេះ ជំរុញឲ្យតាមបណ្តាមន្ទីរ អង្គភាព និងអាជ្ញាធរក្រុងស្រុក បង្កើតជាយន្តការមួយដើម្បីគ្រប់គ្រងឲ្យមានភាពច្បាស់លាស់។
លោក នាក់ ណេរ៉ុន មានប្រសាសន៍ទៀតថា កាលពីពេលកន្លងទៅ អាជ្ញាធរខេត្តសៀមរាប បានរៀបចំទីតាំងមួយនៅភ្នំចង្ក្រានរយ នៃស្រុកវ៉ារិន សម្រាប់ជាទីស្នាក់នៅរបស់ជនអនាថា និងអ្នកសុំទានទាំងឡាយ ដែលអាជ្ញាធរបានប្រមូលពួកគាត់ពីតាមទីសាធារណៈ ប៉ុន្តែគម្រោងនេះ ត្រូវបានខកខានទៅវិញដោយសារវិបត្តិកូវីដ-១៩ ប៉ុន្តែបន្ទាប់ពីមានប្រកាសរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក្នុងការបើកប្រទេសឡើងវិញនោះ អាជ្ញាធរខេត្តសៀមរាប ក៏បានចាប់ផ្តើមអនុវត្តកិច្ចការនេះជាបន្ត តែអ្វីដែលជាបញ្ហប្រឈមនោះ គឺកង្វះយន្តការគ្រប់គ្រង ដែលធ្វើឲ្យការអនុវត្តហាក់ដូចជាវែកចក។
លោកអភិបាលរងខេត្តសៀមរាប បានលើកឡើងបន្តថា នៅពេលដែលអាជ្ញាធរខេត្តកំពុងគិតគូរអំពីរឿងនេះ មន្ទីរអង្គភាព និងរដ្ឋបាលក្រុងស្រុកមួយចំនួនបែរជាលែងដៃ ដោយគិតថា មិនមែនជាការងាររបស់ពួកខ្លួន ប៉ុន្តែធាតុពិតវាជាបញ្ហាដែលត្រូវរួមគ្នាដោះស្រាយ និងដាក់ចេញនូវយន្តការមួយច្បាស់លាស់ផងដែរ ដូច្នេះកិច្ចប្រជុំនាពេលនេះ គឺត្រូវរួមគំនិតពិភាក្សាគ្នាឲ្យបានផុលផុស និងគ្រប់ជ្រុងជ្រោយ ដើម្បីធ្វើឲ្យការអនុវត្តការងារនេះ ទទួលបានលទ្ធផលល្អ និង មានប្រសិទ្ធភាព ។
សូមជម្រាបថា ភ្នំចង្ក្រានរយ ជាទីតាំរមណីយដ្ឋានទេសចរណ៍មួយ ប្រកបដោយសក្តានុពល នៅក្នុងស្រុកវ៉ារិន ហើយការសម្រេចយកទីតាំងខាងលើនេះជាកន្លែងសម្រាប់ទទួលជនអនាថា និងអ្នកសុំទាននោះ គឺដោយសារអាជ្ញាធរបានសម្លឹងមើលឃើញថា ពួកគាត់នឹងទទួលបានផលប្រយោជន៍ច្រើនដូចជា ៖ ការទទួលបានការបណ្តុះបណ្តាលជំនាញ កសិកម្ម , ជំនាញការងារទេសចរណ៍ និងការងារផ្សេងៗទៀត រហូតដល់ការរៀនសូត្ររបស់កូនៗពួកគាត់ថែមទៀត៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
