ថ្ងៃទី១២ ខែមករា ឆ្នាំ២០២២ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត តំណាងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានចូលរួមរំលែកទុក្ខដ៏ក្រៀមក្រំជាមួយក្រុមគ្រួសារសព ដែលជាក្រុមការងារកម្ទេចមីន របស់អង្គការដោះមីនកម្ពុជា ដែលជួបឧបទ្ទេវហេតុក្នុងករណីផ្ទុះគ្រាប់មីនតោនកាលពីថ្ងៃទី១០ ខែមករា ឆ្នាំ២០២២ បណ្ដាលឱ្យស្លាប់បាត់បង់ជីវិត ៣នាក់ នៅភូមិសែនតេជៈ ឃុំមរតក ស្រុកជាំក្សាន្ត ខេត្តព្រះវិហារ ហើយអ្នកដែលបានស្លាប់មានទីលំនៅស្ថិតក្នុងស្រុកសូទ្រនិគម ខេត្តសៀមរាប។
ក្នុងទិដ្ឋភាពដ៏សោកសង្រេង និងក្ដុកក្ដូលនាពេលនេះ ឯកឧត្តម គុជ លីណា ក្នុងនាមឯកឧត្តម ទៀ សីហា ប្រធានគណ:កម្មាធិការសាខាកាកបាទក្រហមកម្ពុជាខេត្ត និងក្នុងនាមគណៈកម្មាធិការសាខា ក្រុមប្រតិបតិ្ត អ្នកស្ម័គ្រចិត្ត និងយុវជនកាកបាទក្រហមកម្ពុជា សូមចូលរួមរំលែកមរណទុក្ខយ៉ាងក្រៀមក្រំជាទីបំផុត ជាមួយក្រុមគ្រួសារជនរងគ្រោះ និងសាច់ញាតិទាំងអស់នៃសព ដែលពួកគាត់បានជួបនូវឧបទ្ទេវហេតុអាក្រក់មួយនេះ ហើយយើងខ្ញុំទាំងអស់គ្នា ពិតមានក្តីក្តុកក្តួលរំជួលចិត្តឥតឧបមា បន្ទាប់ពីបានទទួលដំណឹងដ៏សែនក្រៀមក្រំបំផុត ចំពោះមរណភាពរបស់ពួកគាត់។ មរណភាពរបស់វីរជនទាំង៣នាក់ គឺជាការបាត់បង់នូវមន្ត្រីដែលមានស្នាដៃ នឹងជាត្រូវជាស្វាមី ជាឱពុកជាទីគោរពស្រឡាញ់បំផុតរបស់ក្រុមគ្រួសារទាំងអស់នៃសព ដែលជានិច្ចកាលតែងបាន លះបង់ខ្ពស់ទាំងកម្លាំង កាយ ចិត្ត និងបញ្ញាស្មារតី ក្នុងការបំពេញតួនាទីការងារ ជួយក្នុងការសង្គ្រោះអាយុជីវីតរបស់ប្រជាពលរដ្ឋ និងក្រុមគ្រួសារឲ្យរួចផុតការការស្លាប់ និងពិកាដោយសារគ្រាប់មីន និងសំណល់ជាតិផ្ទុះផ្សេងៗ រហូតដល់ការបាត់បង់នូវអាយុជីវីតរបស់ខ្លួនឯងនៅពេលនេះ។
តាំងនាមឲ្យថ្នាក់ដឹកនាំគ្រប់លំដាប់ថ្នាក់ ឯកឧត្តម និងក្រុមការងារ នឹងចងចាំនូវគម្រូវីរភាពដ៏អង់អាចក្លាហានរបស់វរៈជនទាំង៣នាក់ ដែលបានបំពេញការងារមនុស្សធម៌ និងសង្គ្រោះជីវិតមនុស្សឱ្យរួចផុតពីការគំរាមកំហែងដោយសារគ្រាប់មីនរយៈកាលកន្លងមក។ ជាមួយគ្នានេះ ឯកឧត្តម ក៏បានលើកទឹកចិត្តដល់ក្រុមគ្រួសារសព សូមកុំអស់សង្ឃឹម ត្រូវបន្តប្រកបរបរចិញ្ចឹមជីវិតប្រចាំថ្ងៃ និងមើលថែកូនៗ ដើម្បីឱ្យពួកគាត់មានអនាគតតទៅថ្ងៃមុខ និងសូមបួងសួងដល់វិញ្ញាណក្ខន្ធនៃសព បានទៅកាន់សុគតិភពកុំបីខានឡើយ។
សូមជម្រាបថា ក្នុងឱកាសចូលរួមរំលែកទុក្ខនេះដែរ សាខាកាកបាទក្រហមខេត្តសៀមរាប ក៏បាននាំយកអំណោយមនុស្សធម៌មួយចំនួនចូលរួមជាមួយគ្រួសារសព ដោយក្នុងមួយគ្រួសារមាន៖ អង្ករ ៣០គីឡូក្រោម, មី ១កេស, ត្រីខ ១យួរ, មុង១, ភួយ១, សារុង១, ក្រមា១ និងថវិកាចំនួន ២លានរៀលផងដែរ៕
ប្រភព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ អ៊ុន ណារាជ្យ
