ឈាបនដ្ឋានថ្មី អាស្រម និងសមិទ្ឋផលមួយចំនួន ក្នុងវត្តអារញ្ញមានជ័យ ហៅវត្តត្រីញ័រ ស្ថិតក្នុងភូមិសួង ឃុំត្រពាំងធំស្រុកប្រាសាទបាគង ខេត្តសៀមរាប ដែលបានសាងសង់រួចហើយនោះ ត្រូវបានបវ្រារព្ធពិធីកាត់ខ្សែបូរដាក់ឱ្យប្រើប្រាស់ជាផ្លូវការហើយ
កាលពីព្រឹកថ្ងៃទី១៦ ខែមករា ឆ្នាំ២០២២នេះ ព្រមទាំងប្រគេនដល់ព្រះសង្ឃដើម្បីជាសម្បត្តិគរុភ័ណ្ឌវត្តនិងទុកប្រើប្រាស់ជាសាធារណៈផងដែរ ក្រោមអធិបតីភាពឯកឧត្តម ហ៊ឹម សុទិត្យា រដ្ឋលេខាធិការក្រសួងព័ត៌មាន និងលោកជំទាវ ដោយមានការនិមន្ត និង ចូលរួមពីសំណាក់ព្រះសង្ឃ និង លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត អាជ្ញាធរស្រុកប្រាសាទបាគង ឃុំត្រពាំងធំ លោកគ្រូអ្នកគ្រូ សិស្សានុសិស្ស លោកយាយលោកតា និង ប្រជាពលរដ្ឋក្នុងឃុំត្រពាំងធំជាច្រើនរូប ។
លោក សយ សីហា មេឃុំត្រពាំងធំ បានឲ្យដឹងថា៖សមិទ្ឋផលដែលទើបសាងសង់បន្ថែមថ្មីនេះ រួមមាន ៖ ឈាបនដ្ឋាន និងអាស្រមលោកតាសូត្រ ដែលបានចំណាយថវិកាប្រមាណ២ម៉ឹនដុល្លារអាម៉េរិកនោះ បានកើតឡើងក្រោមគំនិតផ្តួចផ្តើមនិងបរិច្ចាកធនធានមួយផ្នែកធំរបស់ ឯកឧត្តម ហ៊ឹម សុទិត្យា និងលោកជំទាវ ព្រមទាំងក្រុមគ្រួសារ និងមួយផ្នែកទៀតបានពីការចូលរួមឧបត្ថម្ភគាំទ្រពីសប្បុរសជន និងប្រជាពុទ្ឋបរិស័ទជិតឆ្ងាយផងដែរ ហើយនេះជាសមិទ្ឋផលថ្មីមួយទៀត ខណៈដែលកន្លងមកវត្តនៅមិនទាន់មានព្រះវិហារនិងកុដិសាលានៅឡើយ ប៉ុន្តែឯកឧត្តម និងលោកជំទាវ ក៍បានជាវព្រះអង្គធំ រួមជាមួយទេយ្យវត្ថុជាច្រើនទៀត យកមកប្រគេនតម្កល់ក្នុងព្រះវិហារដែលកំពុងសាងសង់សម្រាប់វត្តនេះផងដែរ។
មានមតិសំណេះសំណាលក្នុងឱកាសនោះឯកឧត្តម ហ៊ឹម សុទិត្យា បានបញ្ជាក់ថា សមិទ្ឋផលទាំងនេះ កើតឡើងពីការខិតខំប្រឹងប្រែងរបស់ព្រះចៅអធិការ ភិក្ខុសាមណេរនិងគណៈកម្មការអាចារ្យវក្នុងវត្ត ក្នុងការកៀរគរស្វែងរកបច្ច័យ និងបានការចូលរួមជាសទ្ឋាជ្រះថ្លាពីពុទ្ធបរិស័ទក្នុងមូលដ្ឋាន និងសប្បុរសជនជិតឆ្ងាយចូលរួមបរិច្ចាកនូវធនធានថវិកាទោះតិចក្តីច្រើនក្តីគឺសំដៅជួយអភិវឌ្ឍវិស័យព្រះពុទ្ឋសាសនា តាមរយៈការកសាងហេដ្ឋារចនាសម្ព័ន្ឋនានា សម្រាប់ជាសម្បត្តិគរុភ័ណ្ឌវត្ត និងប្រើប្រាស់ជាសាធារណៈទាំងអស់គ្នា ហើយសមិទ្ឋផលអាចកើតឡើងនៅពេលនេះ គឺអាស្រ័យដោយប្រទេសជាតិយើងមានសុខសន្តិភាព ក្រោមគោលនយោបាយឈ្នះឈ្នះ និងក្រោមការដឹកនាំប្រកបដោយភាពឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលអ្វីៗបាននឹងកំពុងរីកចម្រើនជឿនលឿនទៅមុខឥតឈប់ឈរ ដូច្នេះយើងទាំងអស់គ្នា ត្រូវចូលរួមជាមួយរាជរដ្ឋាភិបាល ដើម្បីថែរក្សាសុខសន្តិភាព ឲ្យបានស្ថិតស្ថេរ គង់វង្សរៀងរហូត ។
ឯកឧត្តម រដ្ឋលេខាធិការបន្ថែមថា៖ក្នុងដំណាក់កាលដែលសកលលោក និយាយជារួម និយាយដោយឡែកកម្ពុជាយើងបានរងនូវការឆ្លងរាតត្បាតដោយសារជំងឺកូវីដ-១៩ អស់រយៈពេល២ឆ្នាំមកនេះ សម្តេចតេជោ ហ៊ុន សែន បានខិតខំពុះពារនិងសម្រេចចិត្តច្បាស់លាស់ប្រកបដោយភាពទទួលខុសត្រូវខ្ពស់ក្នុងការស្វែងរកនិងនាំវ៉ាក់សាំងការពារជំងឺកូវី-១៩ យកមកចាក់ជូនបងប្អូនប្រជាពលរដ្ឋដោយឥតគិតថ្លៃនៅទូទាំងប្រទេស ដែលនេះជាយុទ្ឋសាស្ត្រក្នុងការទប់ស្កាត់ដ៍មានប្រសិទ្ឋភាព នៃការការពារការរីករាលដាលជំងឺកូវីដ-១៩ រហូតមានទំនុកចិត្តបានបើកប្រទេសឡើងវិញ ហើយបងប្អូនប្រជាពលរដ្ឋទូទាំងប្រទេសក៍អាចប្រកបអាជីវកម្មនិងបំពេញការងារដោយភាពប្រុងប្រយ័ត្ន តាមយន្តការរៀនរស់តាមបែបគន្លងថ្មីជាមួយកូវីដ-១៩ ប៉ុន្តែប្រការបំផុតនោះ សូមបងប្អូន កុំភ្លេចអនុវត្តជាប់ជាប្រចាំនូវវិធានការរបស់រាជរដ្ឋាភិបាល គឺ៣ការពារនិង៣និង អញ្ជើញទៅចាក់វ៉ាក់សាំង ដើម្បីបង្ការជាមួយជំងឺកូវីដ-១៩ ឲ្យបានគ្រប់ៗគ្នា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
