នៅសាលប្រជុំស្នងការដ្ឋាននគរបាលខេត្តសៀមរាប នាព្រឹកថ្ងៃទី០១ ខែមីនា ឆ្នាំ២០១៩ព្រឹកមិញនេះ ឯកឧត្តមនាយឧត្តមសេនីយ៍កិត្តិបណ្ឌិត ហ៊ីង ប៊ុនហ៊ាង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការដ្ឋានកងអង្គរក្ស និងលោក លី សំរឹទ្ធ អភិបាលរងខេត្តសៀមរាប បានដឹកនាំកិច្ចប្រជុំមួយ ដើម្បីត្រួតពិនិត្យផែនការ នៃការពារធានាសន្តិសុខ សុវត្ថិភាពនិងសណ្តាប់ សម្រាប់អន្តរកិច្ចប្រជុំរដ្ឋមន្ត្រីលើកទី៧ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលអន្តរកិច្ចប្រជុំនេះ នឹងប្រព្រឹត្តនៅក្នុងក្រុងសៀមរាប ចាប់ថ្ងៃទី០១ ដល់ថ្ងៃទី០៣ ខែមីនា ឆ្នាំ២០១៩នេះ ដែលមានសមាជិកមកពីប្រទេសចំនួន១៦ បានអញ្ជើញមកចូលរួម ។
ឯកឧត្តមនាយឧត្តមសេនីយ៍កិត្តិបណ្ឌិត ហ៊ីង ប៊ុនហ៊ាង មានប្រសាសន៍ថា អន្តរកិច្ចប្រជុំរដ្ឋមន្ត្រីលើកទី៧ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់នេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ដូច្នេះក្នុងឱកាសនេះ សូមឲ្យថ្នាក់ដឹកនាំ និងកងកម្លាំងទាំងអស់ ត្រូវបង្កើនការយកចិត្តទុកដាក់ត្រួតពិនិត្យ និងសហការគ្នាឲ្យបានល្អ នៅតាមបណ្តាគោលដៅនិមួយៗដែលទទួលខុសត្រូវ ក្នុងការការពារ និងបង្ការទប់ស្កាត់បទល្មើស សំដៅរក្សាការពារ និងធានាសន្តិសុខ សុវត្តិភាពជូនថ្នាក់ដឹកនាំ និង គណៈប្រតិភូជាន់ខ្ពស់ជាតិ និងអន្តរជាតិ ដែលបានអញ្ជើញចូលរួមក្នុងឱកាសប្រារព្វពិធីនេះ ពិសេសសូមឲ្យកងកម្លាំងត្រូវវិភាគវាយតម្លៃនូវរាល់សភាពការណ៍់ សកម្មភាព និងឧបាយកលនានា ដែលប៉ុនប៉ងបំផ្លិចបំផ្លាញ ឬការបង្កចលាចលណាមួយ ដែលធ្វើឲ្យបាត់សណ្តាប់ធ្នាប់ របៀបរៀបរយ ហើយត្រូវមានវិធានការម្ចាស់ការ ដើម្បីវាយបកទប់ស្កាត់ និងដោះស្រាយឲ្យបានទាន់ពេលវេលា និងមានប្រសិទ្ធភាព ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
