នៅថ្ងៃទី២៨ កុម្ភៈ ឆ្នាំ២០១៩ អាជ្ញាធរជាតិអប្សរាសហការជាមួយអង្គការគាំពារកេរមរតក តាមរយៈកម្មវិធីអប់រំបេតិកភណ្ឌ បានដឹកនាំសិស្សថ្នាក់ទី៥-ទី៦នៃសាលាបឋមសិក្សា ហ៊ុន សែន ស្រះស្រង់ ជាង៥០នាក់ មកទស្សនាសារមន្ទីរព្រះនរោត្តមសីហនុ-អង្គរ ដែលជាកម្មវិធីអប់រំមួយបែប ក្រៅពីការរៀនទ្រឹស្ដីក្នុងថ្នារ និងទស្សនារមណីយដ្ឋាន រួមនិងប្រាសាទ។
ទស្សនកិច្ចសិក្សានេះគឺដើម្បីឲ្យសិស្សបានយល់ពីតួនាទីរបស់សារមន្ទីរ និងបាន ឃើញបុរាណវត្ថុផ្ទាល់ភ្នែក ដែលបានមកពីការស្រាវជ្រាវរបស់អាជ្ញាធរជាតិអប្សរា អង្គការស្ថាប័នអន្តរជាតិ ដែលធ្វើការងារជួសជុល អភិរក្ស និងស្រាវជ្រាវនៅក្នុងតំបន់អង្គរជាស្រុកកំណើតរបស់គេ។
លោក ខៀវ ច័ន្ទ គ្រូឧទ្ទេសគម្រោងកុមារបេតិកភណ្ឌក្នុងតំបន់អង្គរ និងជាអ្នកជំនាញបុរាណវិទ្យា នៃអាជ្ញាធរជាតិអប្សរាបានឲ្យដឹងថា គម្រោងអប់រំបេតិកភណ្ឌបានចាប់ផ្ដើមធ្វើ តាំងពីឆ្នាំ២០០៩មកម្ល៉េះ។ ដោយឡែកសាលាបឋមសិក្សា ហ៊ុន សែន ស្រះស្រង់ ទើបតែទទួលបានគម្រោងនេះនៅឆ្នាំ២០១៨ប៉ុណ្ណោះ បន្ថែមលើកម្មវិធីអប់រំអំពីមេរៀនបំណិនជីវិត ដោយមិនធ្វើឲ្យប៉ះពាល់ដល់កម្មវិធីសិក្សារបស់សិស្សឡើយ។ កម្មវិធីអប់រំនេះចែកចេញជាពីរគឺ៖ សម្រាប់សិស្សបឋមសិក្សា និងសិស្សវិទ្យាល័យ។
១. សិស្សបឋមសិក្សាមានពីរកម្រិត៖ សិស្សថ្នាក់ទី៥ ត្រូវបានបង្រៀនឲ្យស្គាល់ «និយមន័យមូលដ្ឋានគ្រឹះនៃពាក្យ មរតក» តាមរយៈរូបភាព និងលើកឧទាហរណ៍ជាក់ស្តែង បំផុសឲ្យសិស្សរកអ្វីៗ ដែលមានជុំវិញខ្លួន ដែលជាមរតកនៅក្នុងផ្ទះ ក្នុងគ្រួសារ និងក្នុងសហគមន៍។ល។ ចំណែកសិស្សថ្នាក់ទី៦ បង្រៀនឲ្យស្គាល់អំពីអត្ថប្រយោជន៍ នៃមរតកដែលនៅសេសសល់ ចំពោះការកសាងប្រវត្តិសាស្ត្រភូមិស្រុក ជាពិសេសប្រវត្តិសាស្ត្រអង្គរ និងប្រវត្តិនៃការកកើតជាមរតក។ តើមរតកទាំងនោះមាននៅកន្លែងណាខ្លះ? វត្ថុទាំងនោះអាចមើលឃើញផ្ទាល់ភ្នែក កប់នៅក្រោមដី នៅក្នុងទឹកជាដើម ជៀសវាងការជីកកកាយដោយខុសច្បាប់ ឬ ធ្វើសំណង់ធុនធ្ងន់ ដែលត្រូវជីកគ្រឹះនាំឲ្យប៉ះពាល់ដល់សមុច្ច័យដែលមានប្រយោជន៍ សម្រាប់កសាង និងបន្ថែមព័ត៌មានប្រវត្តិសាស្ត្រតំបន់អង្គរ។ លើសពីនេះ កម្មវិធីនេះ បានអប់រំឲ្យសិស្សចូលរួមក្នុងកិច្ចការថែរក្សា ការពារ អភិរក្ស និងហ៊ានរាយការណ៍ដល់សមត្ថកិច្ចពាក់ព័ន្ធក្នុងករណីឃើញមានហានិភ័យកើតឡើង ចំពោះមរតកទាំងនោះ។
២. សិស្សវិទ្យាល័យមានបីកម្រិតគឺ៖ ថ្នាក់ទី១០, ទី១១, និងទី១២ ដោយជ្រើសរើសយកអ្នកស្ម័គ្រចិត្តចំនួន១០នាក់ក្នុងមួយឆ្នាំ។ ចំពោះកម្មវិធីសិក្សាមាននៅក្នុងថ្នាក់ ចុះសង្កេតតាមកិច្ចពិធីនានាដែលមាននៅក្នុងភូមិ ចុះតាមរមណីយដ្ឋាន និងរៀនសរសេររបាយការណ៍ទុកជាឯកសារ សម្រាប់សាលាអំពីព័ត៌មាននៅតាមសហគមន៍របស់គេរស់នៅ។ មេរៀនដែលយកមកបង្រៀនគឺ៖ ប្រវត្តិសាស្ត្រទូទៅនៃអង្គរ មូលគ្រឹះនៃការស្រាវជ្រាវផ្នែកបុរាណវិទ្យា និងជាតិពន្ធុវិទ្យា នរវិទ្យា ដើម្បីជាទុនសម្រាប់ការសិក្សានៅថ្នាក់ឧត្ដមសិក្សា។
លោកបានបញ្ជាក់ថា ក្រៅពីសិស្សសាលាបឋមសិក្សា ហ៊ុន សែន ស្រះស្រង់ និងវិទ្យាល័យនគរធំ នៅឆ្នាំ២០១៩នេះគម្រោងអប់រំបេតិកភណ្ឌ ក៏បានពង្រីកបន្ថែមដល់សាលាបឋមសិក្សាលលៃ ដែលភ្ជាប់គ្នាជាមួយនឹងវិទ្យាល័យប្រាសាទបាគង។
កម្មវិធីអប់រំបេតិកភណ្ឌ មានគោលបំណងផ្សព្វផ្សាយ អប់រំ បញ្ជ្រាបគំនិតគោរពស្រឡាញ់បេតិកភណ្ឌបុរាណជាតិ ទៅដល់កុមារតូចៗ ឲ្យពួកគាត់បានយល់ បានឃើញជាក់ស្តែង ដ្បិតពួកគាត់មានតួនាទីសំខាន់ សម្រាប់ពន្យល់ណែនាំ ទៅដល់សាធារណជនទូទៅ ដែលមានការយល់ច្រឡំ និងចោទប្រកាន់មកលើ ក្រុមការពារ ជួសជុល អភិរក្ស និងអ្នកស្រាវជ្រាវជាតិ និងអន្តរជាតិ របស់អាជ្ញាធរជាតិអប្សរា ដែលបានអនុវត្តការងារនៅក្នុងតំបន់អង្គរបេតិកភណ្ឌពិភពលោក៕
