នាព្រឹកថ្ងៃទី០១ ខែមីនា ឆ្នាំ២០១៩ព្រឹកមិញនេះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខា តំណាងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំសមាជិកគណៈកម្មាធិការសាខា គណៈកិត្តិយស មន្ត្រីនិយោជិតសាខាកាកបាទក្រហមកម្ពុជាខេត្តសៀមរាប អ្នកស្ម័គ្រចិត្ត ទីប្រឹក្សា យុវជនកាកបាទក្រហមកម្ពុជា ថ្នាក់ដឹកនាំមន្ទីរអង្គភាពនានាក្នុងខេត្ត មន្ត្រីរាជការ មន្ត្រីខ័ណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទខេត្ត មន្ត្រីមន្ទីរបរិស្ថានខេត្ត គរុសិស្សនៃសាខាគរុកោសល្យ និងវិក្រឹតការខេត្ត សហភាពសហព័ន្ធយុវជនកម្ពុជាខេត្ត សរុបជាង ២៧០នាក់ បានធ្វើពលកម្មសម្អាតបរិស្ថានក្នុងឧទ្យានសហស្សវត្សរ៍កាកបាទក្រហមកម្ពុជា ដើម្បីអបអរសាទរខួបលើកទី៦៤ ថ្ងៃកំណើតកាកបាទក្រហមកម្ពុជា (១៨ កុម្ភៈ ១៩៥៥-១៨ កុម្ភៈ ២០១៩) និង ដើម្បីអបអរខួប២០ឆ្នាំនៃឧទ្យានសហស្សវត្សរ៍កាកបាទក្រហមកម្ពុជា ដោយធ្វើសកម្មភាពក្រីមែកឈើ បោសស្លឹកឈើងាប់ ជម្រះស្មៅ ធ្វើជាផ្លូវការពារភ្លើងឆេះ ដែលអាចរាលដាលដល់ដើមឈើក្នុងឧទ្យានសហស្សវត្សរ៍ ជាយថាហេតុ ។
ប្រការមួយទៀត គឺដើម្បីបញ្ជាក់ពីសកម្មភាពចូលរួមរបស់ប្អូនៗយុវជនកាកបាទក្រហមកម្ពុជា ដូចដែលពាក្យស្លោកបានលើកឡើងថា “យុវជនកំពុងនាំគ្នាធ្វើសកម្មភាព” រួមជាមួយមន្ត្រីដែលមកពីខ័ណ្ឌរដ្ឋបាលព្រៃឈើខេត្ត ដែលជាមន្ត្រីជំនាញ បានធ្វើការក្រីតាក់តែង កាប់មែកឈើដែលចាស់ៗ និងកាប់កូនឈើតូចៗគ្មានប្រយោជន៍ចោល ដើម្បីឱ្យដើមរបស់វាអាចលូតលាស់បានល្អ ។
លោកជំទាវ ទាង អេង ទៀ សីហា បានមានប្រសាសន៍ថា ឧទ្យានសហស្សវត្សរ៍កាកបាទកស្រហមកម្ពុជា ដែលស្ថិតលើទឹកដីដ៏បវរនៃខេត្តសៀមរាបអង្គរនេះ ជាមរតកដ៏ថ្លៃថ្លារបស់កាកបាទក្រហមកម្ពុជា ហើយមានអាយុកាល ២០ឆ្នាំហើយ ដែលបានដាំដុះឡើងតាំងពីឆ្នាំ ១៩៩៩ មកម្ល៉េះ ក្រោមព្រះអធិបតីភាពខ្ពងខ្ពង់ សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា មានទំហំ ៥ ហិកតា និងមានដើមឈើចំនួន ២.៤៦០ដើម ហើយឧទ្យានសហស្សវត្សនេះ ជាគម្របធម្មជាតិ ជាផ្អែកមួយក្នុងការការពារបរិស្ថានតំបន់អង្គរ ៕
អត្ថបទ ៖ លោក អ៊ិន សីហរិទ្ធ
រូបថត ៖ សហការី
កែសម្រួលអត្ថបទ ៖ លោក លីវ សាន្ត
