ថ្លែងក្នុងពិធីបូកសរុបសភាពការណ៍ លទ្ធផលកិច្ចប្រតិបត្តិការឆ្នាំ២០១៨ របស់ស្នងការដ្ឋាននគរបាលខេត្តព្រះវិហារ នារសៀលថ្ងៃទី២៨ ខែកុម្ភៈ ឆ្នាំ២០១៩ម្សិលមិញនេះ ឯកឧត្ដមនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ ជម្រុញឲ្យកងកម្លាំងនគរបាលជាតិ អាជ្ញាធរមូលដ្ឋាន និងសមត្ថកិច្ចពាក់ព័ន្ធផ្សេងៗទៀត ត្រូវបង្កើនកិច្ចការពារសន្តិភាព សន្តិសុខជាតិ សណ្តាប់ធ្នាប់សាធារណៈ ឲ្យបានល្អប្រសើរ និង ទប់ស្កាត់ បង្ការ បង្ក្រាបឲ្យបានទាន់ពេលវេលា រាល់សកម្មភាពបទល្មើសផ្សេងៗ ក្នុងដែនសមត្ថកិច្ចទទួលខុសត្រូវរបស់ខ្លួន ពិសេសត្រូវប្រកាន់យកគោលជំហរ មនសិកាស្នេហាជាតិ ប្តេជ្ញាការពាររាជរដ្ឋាភិបាលស្របច្បាប់ ដែលប្រសូត្រចេញពីឆន្ទៈរបស់រាស្ត្រ តាមរយ:នៃការបោះឆ្នោត ប្រឆាំងដាច់ខាត រាល់សកម្មភាពញុះញ៉ុង បំបែកបំបាក់សាមគ្គីជាតិ បំពុលបរិយាកាសសង្គម ដែលជាហេតុផលតែមួយគត់ គឺដើម្បីរក្សាបានសេចក្តីសុខសាន្តរបស់ពលរដ្ឋ និង ការភិវឌ្ឍជាតិ ។
ឯកឧត្ដមនាយឧត្តមសេនីយ៍ ខេង សុមេធ បានប្រសាសន៍ទៀតថា បញ្ហាសំខាន់មួយទៀត គឺបញ្ហាគ្រឿងញៀន ព្រោះវាជាបញ្ហាកង្វល់របស់សង្គមជាតិ ដែលទាំងនោះវាបាននាំមកនូវផលវិបាក ដល់ការអនុវត្តគោលនយោបាយរបស់រាជរដ្ឋាភិបាល ក្នុងកាត់បន្ថយភាពក្រីក្រជូនប្រជាពលរដ្ឋ ហើយបញ្ហាទាំងនេះវាទាមទារឲ្យមានការចូលរួមពីសំណាក់បងប្អូនប្រជាពលរដ្ឋ អាជ្ញាធរដែនដីគ្រប់លំដាប់ថ្នាក់ ក៏ប៉ុន្តែកងកម្លាំងសមត្ថកិច្ចនគរបាល ត្រូវបំពេញតួនាទី និង ភារកិច្ចតាមគ្រប់រូបភាពជាមួយកម្លាំងសហការ ទាំងវិធានការអប់រំ និងវិធីសាស្ត្រជំនាញ ទប់ស្កាត់ឲ្យបាន ការចែកចាយ និងប្រើប្រាស់ ការស្រាវជ្រាវមុខសញ្ញាជួញដូរ គ្រឿងញៀន និងត្រូវអនុវត្តនីតិវិធីតាមផ្លូវច្បាប់ ពិសេសមន្ត្រីនគរបាលជាតិ គឺជាមន្ត្រីរបស់រាជរដ្ឋាភិបាល ដូច្នេះចំពោះការផ្ដល់ភាពយុត្តិធម៌បំផុតនោះ គឺមន្ត្រីនគរបាលជាតិទាំងអស់ ត្រូវមានកាតព្វកិច្ចបំពេញតួនាទីជាអ្នកបំរើរាស្ត្រ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
