ជាការកត់សម្គាល់ក្នុងរយៈពេល ៤ឆ្នាំចុងក្រោយ ក្រុមកីឡាករកុមារកម្រិតបឋមសិក្សាស្រុកស្រីស្នំ ទទួលបានជើងឯករងជាប់គ្នាៗ៤ឆ្នាំ ក្នុងការប្រកួតថ្នាក់កីឡាបាល់ទាត់ថ្នាក់ខេត្ត ជាមួយនោះអត្រានៃការបោះបង់ការសិក្សាបានបន្ថយជាលំដាប់ផងដែរ។ នេះបើតាមការលើកឡើងរបស់លោក ជា រតនៈ សប្បុរសជនសហការរៀបចំព្រឹត្តិការណ៍កីឡាបាល់ទាត់ថ្នាក់ស្រុក ក្នុងពិធីបិទព្រឹត្តិការណ៍នេះកាលពីរសៀលថ្ងៃទី១៣ ខែកុម្ភៈ ម្សិលមិញនេះ ស្ថិតនៅទីលានបាល់ទាត់នៃសាលាបឋមសិក្សាស្លែងស្ពាន ស្រុកស្រីស្នំ ខេត្តសៀមរាប។
បើតាមរបាយការណ៍របស់ការិយាល័យអប់រំ យុវជន និងកីឡាស្រុក បង្ហាញថា កុមារស្ថិតក្នុងកម្រិតបឋមសិក្សា ស្រុកស្រីស្នំ ខេត្តសៀមរាប រយៈពេល៤ឆ្នាំចុងក្រោយ (២០១៧-២០២១) ជាមធ្យមមានសិស្សបោះបង់ការសិក្សា ១៦៤នាក់ ក្នុងមួយឆ្នាំ ក្នុងនោះ ៦០នាក់ ជាសិស្សស្រី។ ដោយឡែក សម្រាប់ចាប់ផ្តើមលើកដំបូងនៅក្នុងឆ្នាំ២០១២ មានក្រុមកីឡាបាល់ទាត់កុមារតែ ៥ក្រុមប៉ុណ្ណោះបានចូលរួម ដែលបច្ចុប្បន្នមានរហូតដល់ ៣៣ក្រុម រួមទាំងក្រុមមហាជន។
ក្នុងឱកាសពិធីបិទការប្រកួតកីឡាបាល់ទាត់ថ្នាក់ស្រុកនោះ លោក ឡុត ញាន អភិបាលរងស្រុកស្រីស្នំ មានប្រសាសន៍ថា ការលេងកីឡា គឺចង់ឱ្យសិស្សានុសិស្សបង្កើនសាមគ្គីភាព និងមានទំនាក់ទំនងល្អរវាងគ្នា។ ការយកចិត្តទុកដាក់លើវិស័យអប់រំ និងកីឡានៅតាមសាលារៀនថ្នាក់ស្រុក និងខេត្ត ក៏ជាការចូលរួមលុបបំបាត់ការប្រើប្រាស់គ្រឿងញៀន អំពើពាលាផ្សេងៗ នៅក្នុងសាលារៀន សហគមន៍ និងនៅទីសាធារណៈជាដើម។ តែជាយ៉ាងនេះក្ដី លោក បញ្ជាក់ថា សិស្សានុសិស្សមិនមែន លេងកីឡាតែមួយមុខប៉ុណ្ណោះទេ ប្អូនៗត្រូវតែផ្តោតលើការសិក្សាជាចំបងផងដែរ។
ក្នុងពិធីបិទនោះដែរ ក៏មានការចូលរួមពីក្លឹបបាល់ទាត់ Angkor Tiger FC ដែលជាក្លិបអាជីពនៅក្របខណ្ឌកំពូលរបស់កម្ពុជាផងដែរ ដើម្បីជាការលើកទឹកចិត្ត និងសិក្សាពីសមត្ថភាពរបស់កុមារ និងយុវជន ដែលអាចមានឱកាសក្លាយជាកីឡាករអាជីពនាពេលអនាគត។
សូមបញ្ជាក់ផងដែរថា សម្រាប់លទ្ធផលនៃការប្រកួត គឹក្រុមកីឡាមហាជន៖ ផ្នែកបុរសៈ ចំណាត់ថ្នាក់លេខ២ បានទៅលើក្រុមយុគអង្គរ FC និងចំណាត់ថ្នាក់លេខ១ ម្ចាស់ជើងឯកថ្នាក់ស្រុក បានទៅលើក្រុមព្រះខ័នFC។ ផ្នែកនារី ចំណាត់ថ្នាក់លេខ២ បានទៅលើក្រុមអនុវិទ្យាល័យមោង និងចំណាត់ថ្នាក់លេខ១ ម្ចាស់ជើងឯកថ្នាក់ស្រុក បានទៅលើក្រុមវិទ្យាល័យ ២៨ មករា។ និងក្រុមកីឡាសិស្សបឋមសិក្សាផ្នែកកុមារា ចំណាត់ថ្នាក់លេខ៣ បានទៅលើក្រុមសាលាបឋមសិក្សាចំការចេក ចំណាត់ថ្នាក់លេខ២ បានទៅលើក្រុមកម្រងប្រីយ៍ និងចំណាត់ថ្នាក់លេខ១ ម្ចាស់ជើងឯកថ្នាក់ស្រុក បានទៅលើក្រុមសាលាបឋមសិក្សាជ្រោយ។ ផ្នែកកុមារី ចំណាត់ថ្នាក់លេខ៣ បានទៅលើក្រុមសាលាបឋមសិក្សាធ្លកត្រាំកង់ ចំណាត់ថ្នាក់លេខ២ បានទៅលើក្រុម កម្រងប្រិយ៍ និងចំណាត់ថ្នាក់លេខ១ ម្ចាស់ជើងឯកថ្នាក់ស្រុកបានទៅលើក្រុមសាលាបឋមសិក្សាភ្នំដី។ សម្រាប់ពានរង្វាន់ជ័យលាភីសម្រាប់ក្រុមកីឡាបាល់ទាត់មហាជន ផ្នែកបុរស ទទួលបានថវិកា ៤០រៀល ផ្នែកនារី ៤០ម៉ឺនរៀល ពានរង្វាន់ជ័យលាភីកុមារថ្នាក់បឋមសិក្សា ទាំងកុមារា និងកុមារី ទទួលបានថវិកា ២០ម៉ឺនរៀលដូចៗគ្នា ព្រមទាំងសម្ភារៈកីឡាមួយចំនួនទៀតផងដែរ៕
អត្ថបទ និងរូបភាព៖ លោក យូ វង្ស និង លោក ស៊ាន សុផាត
កែសម្រួល៖ លោក សេង ផល្លី
