កាលពីព្រឹកថ្ងែទី១២ ខែកុម្ភៈ ឆ្នាំ២០២២ ស្រុកស្រីស្នំ បានធ្វើពិធីបើកព្រឹត្តិការណ៍បាល់ទាត់ថ្នាក់ស្រុករបស់ខ្លួន ដែលមានក្រុមកីឡាករ កីឡាការិនីចូលរួមសរុប ៣៣ក្រុម មកពីតាមបណ្ដាសាលាបឋមសិក្សា និងជាមហាជនក្នុងស្រុក ដែលប្រកួតលើទីលានចំនួន៣ទីតាំង និងមានរយៈពេល ៤ថ្ងៃ ចាប់ពីថ្ងៃទី១០-១៣ ខែកុម្ភៈ ឆ្នាំ២០២២។
លោក ធិ ម៉ិល ប្រធានការិយាល័យអប់រំ យុវជន និងកីឡាស្រុក លើកឡើងក្នុងពិធីបើក នៅទីលានប្រកួតកីឡាបាល់នៃសាលាបឋមសិក្សាស្លែងស្ពាននោះថា គឺជាការប្រកួតឆ្នាំទី១០ហើយ ដែលនៅក្នុងឆ្នាំដំបូងនោះ មានក្រុមកីឡាបាល់ទាត់កុមារ តែ៥ក្រុមប៉ុណ្ណោះបានចូលរួម ក៏ប៉ុន្តែមកដល់ឆ្នាំប្រកួត ២០២១-២០២២នេះ រួមទាំងក្រុមកីឡាមហាជនផង មានសរុបហូតដល់ ៣៣ក្រុម ដែលជាព្រឹត្តិការណ៍ធំជាងបណ្តាឆ្នាំកន្លងមក បើទោះជាទើបនឹងឆ្លងកាត់វិបត្តិកូវីដ-១៩ យ៉ាងណាដ៏ដោយ។
លោក ជា រតនៈ ជាសប្បុរសជនក្នុងស្រុក និងជាតំណាងឲ្យសប្បុរសជនក្នុងនិងក្រៅប្រទេសផងដែរ បានប្រាប់ឲ្យដឹងថា គោលបំណាងរបស់ម្ចាស់អំណាយ គឺចង់ចូលរួមជាមួយអាជ្ញាធរដែនដី និងប្រជាសហគមន៍ ជម្រុញឲ្យក្មួយៗសិស្សានុសិស្សមានសុខភាពល្អ ស្រឡាញ់ការសិក្សា តាមរយៈនៃការលេងកីឡា ជៀសឆ្ងាយពីគ្រឿងញៀន កាត់បន្ថយការធ្វើចំណាកស្រុកតាមឳពុកម្តាយ។ ការចូលរួមចលនាសកម្មភាពបែបនេះ បានចាប់ផ្តើមលើកដំបូងនៅក្នុងឆ្នាំ២០១២ ។
លោក បញ្ជាក់ថា ពានរង្វាន់ជ័យលាភីសម្រាប់ក្រុមកីឡាបាល់ទាត់មហាជន ផ្នែកបុរសនឹងទទួលបានថវិកា ៤០ម៉ឹនរៀល ផ្នែកនារី ៣០ម៉ឺនរៀល។ រីឯពានរង្វាន់ជ័យលាភីកុមារថ្នាក់បឋមសិក្សា ទាំងកុមារា និងកុមារី នឹងទទួលបានថវិកា ២០ម៉ឺនរៀលដូចៗគ្នា។ រង្វាន់លើកចិត្តទាំងអស់នេះ គឺជាឧបត្ថម្ភគាំទ្រពីមូនិធិ Patron ម្ចាស់មូលនិធិសប្បុរសធម៌នៅប្រទេសស្វីស និង Kelly ជាឈ្មោះរបស់គ្រួសារសប្បុរសជននៅសហរដ្ឋអាមេរិក។
លោកថា លទ្ធផលនៃការខិតខំប្រឹងប្រែង១០ឆ្នាំកន្លងមក ៤ឆ្នាំចុងក្រោយនេះ ក្រុមកីឡាបាល់ទាត់កុមារជំរើសប្រចាំស្រុក បានឈានជើងទៅប្រកួតនៅថ្នាក់ខេត្ត ទទួលបានចំណាត់ថ្នាក់លេខ២ ចំនួន៤ឆ្នាំជាប់ៗគ្នា។ ដោយឡែកក្រុមកីឡាបាល់ទាត់មហាជន ក៏ជំរើសបានកីឡាករល្អៗជាបន្តបន្ទាប់ ហើយចាប់ពីឆ្នាំនេះទៅ ក្រុមកីឡាករមហាជនរបស់ស្រុកស្រីស្នំ នឹងអាចអភិវឌ្ឍសមត្ថភាពរបស់ខ្លួន បង្កើតជាក្តីសុបិនសម្រាប់អនាគតផងដែរ ដោយមានការសម្លឹងឃើញពីក្លិបក្នុងខេត្ត ក៏ដូចជាក្លិបអាជីពរបស់កម្ពុជាផងដែរ។
អត្ថបទ និង រូបភាព៖ លោក ងិន គឹមឡេង
កែសម្រួល៖ លោក សេង ផល្លី
