កងកម្លាំងប្រដាប់អាវុធ រួមមានកងយោធពលខេមរភូមិន្ទ កងកម្លាំងនគរបាលការពារព្រំដែន អតីតយុទ្ធជន ព្រមទាំងក្រុមគ្រួសារកងទ័ព បានចាប់ផ្ដើមទទួលវ៉ាក់សាំងដូសទី៤ ឬដូសជម្រុញ ដើម្បីបង្ការជំងឺកូវីដ-១៩ ដោយការផ្ដល់វ៉ាក់សាំងបង្ការជំងឺកូវីដ-១៩ ដូសទី៤នេះ ធ្វើឡើងនៅទីបញ្ជាការយោធភូមិភាគទី៤ ខេត្ដសៀមរាប មានរយៈពេល៧ថ្ងៃ ចាប់ពីថ្ងៃទី១៣ ខែកុម្ភៈឆ្នាំ២០២២នេះ ។
ឯកឧត្ដមឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ មានប្រសាសន៍នៅថ្ងៃទី១៤ ខែកុម្ភៈ ឆ្នាំ២០២២នេះថា រាជរដ្ឋាភិបាលកម្ពុជា បានផ្ដល់វ៉ាក់សាំងបង្ការជំងឺកូវីដ-១៩ ជាង៣ម៉ឺនដូស សម្រាប់ចាក់ដូសទី៤ ឬដូសជម្រុញ ជូនដល់កងកម្លាំងប្រដាប់អាវុធ រួមមានកងកម្លាំងយោធា និងកងកម្លាំងនគរបាលការពារព្រំដែន អតីតយុជន និងគ្រួសារកងទ័ព ដែលមានប្រមាណជាង ៣ម៉ឺននាក់។ ទីតាំងផ្ដល់ផ្ដល់វ៉ាក់សាំង ដល់កងកម្លាំងប្រដាប់អាវុធនេះ មានចំនួន ១២គោលដៅ រួមមាននៅទីបញ្ជាយោធភូមិភាគ នៅតាមទីបញ្ជការកងពល នៅទីបញ្ជការតំបន់ប្រតិបត្ដិការសឹករង ខេត្ដសៀមរាប ខេត្ដកំពង់ធំ ខេត្ដព្រះវិហារ ខេត្ដឧត្ដរមានជ័យ។
ឯកឧត្ដមបានបញ្ជាក់ថា យុទ្ធនាការនេះ នឹងត្រូវធ្វើឱ្យគ្រប់ចំនួនកំណត់នៃកងកម្លាំងដែលចំណុះឱ្យទីបញ្ជាការយោធភូមិភាគទី៤ ប៉ុន្ដែមានការលំបាកខ្លះៗ ក្នុងការដឹកវ៉ាក់សាំង ព្រោះកម្លាំងអតីតយុទ្ធជន ពួកគាត់មិនបានមកទទួលវ៉ាក់សាំងដល់គោលដៅនោះទេ ដោយសារពួកគាត់ខ្លះពិការ និងចាស់ជរា។ ប៉ុន្ដែយ៉ាងនេះក្ដីឯកឧត្ដមបញ្ជាក់ថា នឹងត្រូវបញ្ជូនក្រុមគ្រូពេទ្យដល់កន្លែងរស់នៅរបស់ពួកគាត់ និងដឹកជញ្ជូនពួកគាត់ដល់ទីតំាងផ្ដល់វ៉ាក់សាំងផ្ទាល់តែម្ដង។ ឯកឧត្ដមក៍បានថ្លែងអំណរគុណដល់រាជរដ្ឋាភិបាល ដែលបានយកចិត្ដទុកដាក់ដល់កងកម្លាំងប្រដាប់អាវុធ និងក្រុមគ្រួសារកងទ័ពនាពេលនេះ។
ឯកឧត្ដម ឧត្ដមសេនីយ៍ឯក ពៅ ហេង បានបន្ថែមថា ប្រភេទវ៉ាក់សាំងសម្រាប់ចាក់ជូនកងកម្លាំងប្រដាប់អាវុធ និងក្រុមគ្រួសារកងទ័ពដូសទី៤នេះ ជាប្រភេទវ៉ាក់សំាង Pfizer និងModerna។ ក្នុងមួយថ្ងៃបានផ្ដល់ជូនពួកគាត់ចំនួន ៦ពាន់នាក់ ដែលធ្វើឡើងចាប់ពីថ្ងៃទី១៣ ខែកុម្ភៈ ឆ្នាំ២០២២នេះ។ ឯកឧត្ដមស្នើរឱ្យកងកម្លាំងទាំងអស់ដែលស្ថិតនៅក្រោមការគ្រប់គ្រងយោធភូមិភាគទី៤ ទៅទទួលវ៉ាក់សាំងដូសទី៤ ដើម្បីបង្ការជំងឺកូវីដ១៩ ហើយការទៅទទួលវ៉ាក់សាំងនេះ កងកម្លាំងត្រូវចូលរួមអនុវត្ដន៍វិធានការ រាជរដ្ឋាភិបាល ក៍ដូចជាក្រសួងសុខាភិបាលបីការពារបីកុំឱ្យបានជាប់ជាប្រចាំផងដែរ៕
អត្ថបទ និង រូបភាព៖ លោគ ឈិត សាវី
កែសម្រួល៖ អ៊ុន ណារាជ្យ
