នាព្រឹកថ្ងៃទី១៦ ខែកុម្ភ: ឆ្នាំ២០២២ តំណាងក្រុមបាល់ទាត់ហនុមាន របស់សាលាខេត្តសៀមរាប និងអ្នកតំណាងក្រុមហ៊ុន KW Cambodia បាននាំយកថវិកាសប្បុរសធម៌សរុបចំនួន ២១,២៨០,០០០រៀល ដែលទទួលបានពីព្រឹត្តិការណ៍ប្រកួតបាល់ទាត់ ដើម្បីរៃអង្គាសថវិកាសប្បុរសធម៌ រវាងក្រុមបាល់ទាត់ហនុមាន និងក្រុម KW Cambodia កាលពីពេលថ្មីៗនេះ ទៅប្រគល់ជូនដល់មន្ទីរពេទ្យកុមារអង្គរ ស្ថិតក្នុងក្រុងសៀមរាប ដើម្បីចូលរួមលើកកម្ពស់សុខុមាលភាពកុមារកម្ពុជាឱ្យកាន់តែប្រសើរឡើង។
លោក កុសល មករាពិសិទ្ធ តំណាងក្រុមបាល់ទាត់ហនុមាន លើកឡើងថា ថវិកាដែលទទួលបាននាពេលនេះ គឺបានបង្ហាញពីសាមគ្គីភាព ទំនាក់ទំនងល្អ ផ្សារភ្ជាប់នឹងទឹកចិត្តសប្បុរសធម៌ ដែលមានការចូលរួមពីបណ្ដាថ្នាក់ដឹកនាំ មន្ត្រីសាលាខេត្ត បណ្ដាថ្នាក់ដឹកនាំមន្ទីរ អង្គភាពជុំវិញខេត្ត ព្រមទាំងសប្បុរសជនក្នុង និងក្រៅខេត្តចំនួន ១៧០នាក់ តាមរយ:ក្រុមបាល់ទាត់ហនុមាន ដោយទទួលបានថវិកា ១១,២៨០,០០០រៀល ដោយឡែកខាងក្រុមហ៊ុនKW Cambodia ប្រមូលបាន១០លានរៀល។ លោករំពឹងផងដែរថា នាពេលអនាគត កីឡាក្នុងខេត្តសៀមរាប ក៏នឹងចូលរួមក្នុងការងារមនុស្សធម៌នេះ ឱ្យកាន់តែសកម្មបន្ថែមទៀត ក្រោយវិបត្តិកូវីដ-១៩ មានសភាពធូរស្រាល។
លោក សុធារ៉ា នាយកប្រតិបត្តិ KW Siem Reap បានបង្ហាញនូវទឹកចិត្តសប្បាយរីករាយ ចំពោះការចូលរួមក្នុងសកម្មភាពសប្បុរសធម៌ រវាងវិស័យឯកជន និងរដ្ឋក្នុងឱកាសនេះ។ ជាការសង្ឃឹមទុកនៅពេលខាងមុខ ក្រុមហ៊ុនរបស់លោកនឹងរៀបចំព្រឹត្តិការណ៍សប្បុរសធម៌បន្តបន្ទាប់ទៀត ដើម្បីបំផុសចលនាមនុស្សធម៌ក្នុងសហគមន៍ ពិសេសស្វែងរកថវិកាជួយដល់មន្ទីរពេទ្យកុមារអង្គរ ក៏ដូចជាមន្ទីរពេទ្យគន្ធបុប្ផាខេត្តសៀមរាបផងដែរ។
លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បង្ហាញដល់សប្បុរសជនថា មន្ទីរពេទ្យកុមារអង្គរខេត្តសៀមរាប ក្រៅពីមានតួនាទីចម្បងថែរក្សាសុខភាព និងព្យាបាលជំងឺកុមារដោយមិនគិតកម្រៃហើយ មន្ទីរពេទ្យនេះក៏បានចូលរួមជាមួយរាជរដ្ឋាភិបាល ក្នុងការបណ្ដុះបណ្ដាលធនធានមនុស្សផ្នែកសុខាភិបាលមកពីតាមបណ្ដាខេត្តនានាជារៀងរាល់ឆ្នាំ។ បន្ថែមពីនោះ មន្ទីរពេទ្យមួយនេះ ក៏បានជួយសម្រួលដល់គ្រួសារក្រីក្រ ដែលនាំកុមារមកព្យាបាលជំងឺ ឱ្យស្នាក់នៅក្នុងបរិវេណមន្ទីរពេទ្យ ដ៏ដូចជាមានការឧបត្ថម្ភថវិកាមួយចំនួនទៀតផងដែរ។
គួរជម្រាបថា ជារៀងរាល់ឆ្នាំមន្ទីរពេទ្យកុមារអង្គរខេត្តសៀមរាប ត្រូវការថវិកាជាង៦លានដុល្លារអាមេរិក ដើម្បីបន្តប្រត្តិបត្តិការរបស់ខ្លួន ក្នុងការថែទាំសុខភាព និងព្យាបាលកុមារនៅកម្ពុជាដោយឥតគិតថ្លៃ។ ថវិកាទាំងនោះ ៨០ភាគរយទទួលបានពីការរៃអង្គាសពីក្រៅប្រទេស និង២០ភាគរយនៅក្នុងប្រទេស។ ដោយឡែក ដោយសារតែវិបត្តិជំងឺកូវីដ-១៩ រយ:ពេល២ឆ្នាំចុងក្រោយនេះ (២០២០-២០២១) មន្ទីរពេទ្យបានជួបបញ្ហាថវិកាយ៉ាងខ្លាំង ដោយសារម្ចាស់ជំនួយក្រៅប្រទេសបានកាត់បន្ថយជំនួយ និងផ្អាកទាំងស្រុង។
អត្ថបទ និងរូបភាព: លោក សេង ផល្លី និងលោក អ៊ុន ណារាជ្យ កែសម្រួលដោយ លីវ សុខុន!!!
