ពស់ថ្លាន់០១ក្បាល មានទំងន់២៥គីឡូក្រាម ត្រូវបានប្រជាពលរដ្ឋក្នុងភូមិជុបរំដេង ឃុំកន្ទួត ស្រុកស្វាយលើ ខេត្តសៀមរាប សហការជាមួយមន្ត្រីបរិស្ថាន ឧទ្យាជាតិព្រះជ័យវរ្ម័ន នរោត្តម ភ្នំគូលេន ស្នាក់ការក្បាលស្ពាន ប្រគល់ជូនមជ្ឈមណ្ឌលអង្គរ សម្រាប់ការអភិរក្សជីវៈចម្រុះ ដើម្បីថែរក្សា។
អ្នកស្រី កោ ផល្លា រស់នៅភូមិជប់រំដេង ជាម្ចាស់ពស់ថ្លាន់នេះ បានឲ្យដឹងថា កាលពីជិតមួយឆ្នាំមុន ក្នុងពេលដែលកំពុងឈូសព្រៃក្នុងដីកម្មសិទ្ធិ អ្នកស្រីបានចាប់ពស់ថ្លាន់មួយក្បាលនេះមក ក្នុងបំណងយកមកថែរក្សាផ្ទាល់ខ្លួន។ ដោយយល់ឃើញថាវាជាសត្វព្រៃកម្រ អ្នកស្រីបានសម្រេចចិត្តទាក់ទងអ្នកព័ត៌មាន ដើម្បីជួយទាក់ទងអង្គការអភិក្សសត្វព្រៃដើម្បីប្រគល់សត្វពស់នេះឲ្យអង្គការថែរក្សា។
ការប្រគល់និងទទួលសត្វព្រៃនេះ បានធ្វើឡើងកាលពីថ្ងៃទី០១ ខែមីនា ឆ្នាំ២០១៩ នៅមជ្ឈមណ្ឌលមជ្ឈមណ្ឌលអង្គរ សម្រាប់ការភរិក្សជីវៈចម្រុះ ក្នុងតំបន់រមណីយដ្ឋានក្បាលស្ពាន ភូមិខ្នារង្វាស់ ឃុំឃុនរាម ស្រុកបន្ទាយស្រី ខេត្តសៀមរាប។
លោក ផាន សុនផល តំណាងមជ្ឈមណ្ឌលអង្គរ សម្រាប់ការភិរក្សជីវៈចម្រុះ បានសម្តែងនូវការអរគុណចំពោះប្រជាពលរដ្ឋ ដែលបានយកសត្វព្រៃកម្រប្រភេទល្មូននេះ មកប្រគល់ជូនអង្គការ។
សូមជម្រាបថា បច្ចុប្បន្ន ពស់ថ្លាន់មួយក្បាលនេះ កំពុងទទួលការព្យាបាល ពីមន្ត្រីជំនាញរបស់អង្គការ មុននឹងយកវាទៅព្រលែងក្នុងព្រៃធម្មជាតិ៕
អត្ថបទ និង រូបថត : លោក ជា ស្រស់
កែសម្រួលអត្ថបទ : លោក សេង ផល្លី
