ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា វិស័យទេសចរណ៍ ដែលជាវិស័យដ៏មានសក្តានុពលបំផុតសម្រាប់ខេត្តនោះ បាននឹងកំពុងមានកំណើនទៅមុខឥតឈប់ឈរពីមួយឆ្នាំទៅមួយឆ្នាំ ដែលជាក់ស្តែងចំនួនភ្ញៀវទេសចរជាតិ-អន្តរជាតិ មកទស្សនាខេត្តសៀមរាបក្នុងឆ្នាំ២០១៨ មានសរុប ៥.៨៤០.៥៦២ នាក់ កើនឡើង ៥,៣៦ភាគរយ ក្នុងនោះភ្ញៀវបរទេស មានចំនួន ២.៥៩០.៨១៥ នាក់ កើនឡើង ៥,៤៣ភាគរយ និង ភ្ញៀវក្នុងស្រុកមានចំនួន ៣.២៤៩.៧៤៧ នាក់ កើនឡើង ៥,៣០ភាគរយ បើប្រៀបធៀបទៅនឹងឆ្នាំ២០១៧ ។
ឯកឧត្តម ទៀ សីហា មានប្រសាសន៍យ៉ាងដូច្នេះ នៅក្នុងពិធីប្រកាសចូលកាន់មុខតំណែង លោក នាក់ ណេរ៉ុន ពីអភិបាលស្រុកស្រីស្នំ មកជាអភិបាលរងនៃគណៈអភិបាលខេត្ត ដែលបានរៀបចំឡើងនៅសាលាខេត្តសៀមរាប នាព្រឹកថ្ងៃទី៤ ខែមីនា ឆ្នាំ២០១៩ នេះ ។
ឯកឧត្តមអភិបាលខេត្តសៀមរាប មានប្រសាសន៍ទៀតថា ពាក់ព័ន្ឋទៅនឹងវិស័យកសិកម្មវិញនេះ ការងារបង្កបង្កើនស្រូវ រដូវវស្សាឆ្នាំនេះ យើងសម្រេចបាន ១៨៦.៩៤០ហិកតា ស្មើនឹង ១០០,៧៤ភាគរយ នៃផែនការ និងប៉ាន់ស្មានទិន្នផលជាមធ្យម ២,៥៥២តោនក្នុងមួយហិកតា ស្មើនឹងបរិមាណសរុប ៤៣៧.៨៨៩តោន ខណៈដំណាំរួមផ្សំផ្សេងៗ ដាំដុះបាន ៣០.៤៤០ហិកតា ស្មើនឹង ១១៩,២៦ភាគរយនៃផែនការ និងដំណាំកៅស៊ូមានចំនួន ១០.៣៤៤ហិកតា ព្រមទាំងមានក្រុមហ៊ុនវិនិយោគដីសម្បទានសេដ្ឋកិច្ច ចំនួន ៩ក្រុមហ៊ុន មានផ្ទៃដីសរុប ៤០.០៨៩,៦៧ហិកតា ហើយបានអនុវត្តលើការងារដាំដុះដំណាំកៅស៊ូលើផ្ទៃដី ៩.៣៦៦ហិកតា។
ឯកឧត្តម ទៀ សីហា មានប្រសាសន៍បន្តទៀតថា ជាមួយការរីកលូតលាស់ នៃវិស័យទាំងពីរខាងលើ បានធ្វើឲ្យជីវភាពរបស់ប្រជាពលរដ្ឋកាន់តែមានការរីកចម្រើនពីមួយថ្ងៃទៅមួយថ្ងៃ ក្នុងនោះលើកំណើនយានយន្ត រដ្ឋបាលខេត្តបានសង់ភ្លើងសញ្ញាចរាចរណ៍ចំនួន ៥កន្លែងបន្ថែមទៀត ដើម្បីសម្រួលដល់ការធ្វើចរាចរណ៍ ដែលចេះតែមានការកើនឡើងជាលំដាប់ រួមទាំងការបង្កើនការរៀបចំសោភ័ណភាព និងសួនច្បារក្នុងក្រុង ក្នុងនោះរៀបចំចំណតនៅសួនច្បារខាងជើងស្ពានថ្មព្រះរាជដំណាក់ ក្រាលថ្មម៉ាបនៅសួនច្បារមាត់ស្ទឹង សួនច្បារមុខព្រះរាជដំណាក់ បរិវេណជុំវិញព្រះអង្គចេកព្រះអង្គចម និងតាមដងស្ទឹងសៀមរាបចាប់ពីស្ពានថ្មព្រះរាជដំណាក់រហូតដល់ស្ពានថ្មវត្តរាជបូព៌ ពិសេសបានសហការជាមួយក្រុមហ៊ុន វីសាន់ (VISUN) របស់ប្រទេសចិន និងក្រុមហ៊ុនមីនីបៀ (Minebea) របស់ប្រទេសជប៉ុន ធ្វើការផ្លាស់ប្តូរ និងបន្ថែមទីតាំង បំពាក់ភ្លើងបំភ្លឺសាធារណៈ ប្រភេទអំពូលអិលអ៊ីឌី (LED) ដើម្បីលំអសោភ័ណភាពក្រុង និងសន្សំសំចៃការប្រើប្រាស់ថាមពលអគ្គិសនី តាមផ្លូវសំខាន់ៗក្នុងក្រុងសៀមរាប សរុបចំនួន ៤.៥៦៦អំពូល គិតចាប់ ពីឆ្នាំ២០១៦ ក្នុងគោលដៅអភិវឌ្ឍន៍ទីក្រុងសៀមរាបជាទីក្រុងវៃឆ្លាតនាពេល អនាគត។
ឯកឧត្តម ទៀ សីហា មានប្រសាសន៍បន្ថែមទៀតថា ទន្ទឹមនឹងនោះ ខេត្តបានរៀបចំ និងអនុម័តដាក់ឱ្យប្រើប្រាស់ប្លង់គោលប្រើប្រាស់ដីក្រុងសៀមរាប ចក្ខុវិស័យឆ្នាំ២០៣៥ ដោយឡែកស្រុកទាំង១១ ខេត្ត បាននឹងកំពុងរៀបចំចងក្រងទិន្នន័យ ផែនទីរដ្ឋបាល និងហេដ្ឋារចនាសម្ព័ន្ធបច្ចុប្បន្ន និងការកំណត់ទំហំផ្លូវដើម្បីកសាងផែនការប្រើប្រាស់ដី និងប្លង់គោលប្រើប្រាស់ដីទីប្រជុំជនតាមស្រុក ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
