នៅថ្ងៃទី១៤ ខែមីនា ឆ្នាំ២០២២ លោក នាក់ ណេរ៉ុន អភិបាលរងខេត្ត និងជាអនុប្រធានគណ:កម្មការ ត្រួតពិនិត្យ និងវាយតម្លៃ លើការអនុវត្តគោលនយោបាយជាតិស្តីពីមុខរបរ និងការងារខេត្តសៀមរាប (គ.ខ.ម.ក) បានដឹកនាំកិច្ចប្រជុំតាមប្រព័ន្ឋអនឡាញ រវាង រដ្ឋបាលខេត្ត, មន្ទីរការងារ និងបណ្តុះបណ្តាលវិជ្ជាជីវ:ខេត្ត ជាមួយក្រសួងការងារ និងបណ្តុះបណ្តាលវិជ្ជាជីវ: ក្រោមអធិបតីភាព ឯកឧត្តម សោម ចំណាន អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវ: និងជាប្រធានលេខាធិការដ្ឋានអន្តរក្រសួង នៃគណ:កម្មការត្រួតពិនិត្យ និងវាយតម្លៃ លើការអនុវត្តគោលនយោបាយជាតិ ស្តីពី មុខរបរ និងការងារ (គ.អ.ម.ក)។
ក្នុងនាមរដ្ឋបាលខេត្តសៀមរាប លោក នាក់ ណេរ៉ុន មានប្រសសន៍ថា៖រាជរដ្ឋាភិបាលកម្ពុជា នីតិកាលទី៥ នៃរដ្ឋសភា បានដាក់ចេញនូវយុទ្ឋសាស្ត្រដំណាក់កាលទី៣ ដើម្បីឱ្យកំណើនការងារ ប្រកបដោយសមធម៌ និងប្រសិទ្ឋភាពនៅកម្ពុជា ដែលបានបង្កើតការងារថ្មីកាន់តែច្រើនឡើងជូនប្រជាពលរដ្ឋ ហើយត្រូវបានចាត់ទុកជាយុទ្ឋសាស្ត្រអាទិភាពមួយ ក្នុងចំណោមគោលដៅទាំង៤។ ក្នុងការចូលរួមចំណែកអនុវត្តប្រកបដោយជោគជ័យនូវគោលនយោបាយយុទ្ឋសាស្ត្រ និងឆ្លើយតបទៅនឹងបញ្ហាប្រឈមមួយចំនួន រាជរដ្ឋាភិបាល បានដាក់ចេញនូវគោលនយោបាយជាតិ ស្តីពីមុខរបរ និងការងារឆ្នាំ២០១៥-២០២៥ សំដៅបង្កើនឱកាសការងារសមរម្យដល់ប្រជាពលរដ្ឋកម្ពុជា និងលើកកម្ពស់ផលិតភាពការងារ ជម្រុញការអភិវឌ្ឍជំនាញ និងធនធានមនុស្សព្រមទាំងពង្រឹងអភិបាលកិច្ចទីផ្សារការងារ ឱ្យឆ្លើយតបទៅនឹងតម្រូវការ នៃការអភិវឌ្ឍន៍សេដ្ឋកិច្ច-សង្គម និងការវិវត្តផ្លាស់ប្តូរ នៃសេដ្ឋកិច្ចក្នុងទូទាំងប្រទេស ក្នុងតំបន់ និងសកលលោក។
លោក នាក់ ណេរ៉ុន បញ្ចាក់ថា៖ អំឡុងពេលយើងជួបនូវវិបត្តិដោយសារជំងឺកូវីដ-១៩ ពីរឆ្នាំមកនេះ បណ្តាលឱ្យជួបនូវភាពអសកម្មការងារជាច្រើន តែអាជ្ញាធរខេត្ត បង្វែរមុខព្រួញលើការងារទប់ស្កាត់ការឆ្លងរីករាលដាលនៃជំងឺកូវីដ-១៩ ហើយនេះជាលើកដំបូងដែលកិច្ចប្រជុំនេះធ្វើឡើង ដើម្បីត្រួតពិនិត្យការងារក្នុងឆ្នាំកន្លងមកសម្រាប់ត្រៀមលក្ខណ:ចូលរួមក្នុងសិក្ខាសាលាថ្នាក់ជាតិ ស្តីពីគោលនយោបាយគាំពារ និងគោលនយោបាយជាតិ ស្តីពីមុខរបរ និងការងារ ដែលគ្រោងនឹងរៀបចំឡើង ក្នុងខេត្តសៀមរាបនាពេលឆាប់ៗខាងមុខនេះ និងដើម្បីពិភាក្សាក្នុងក្របខ័ណ្ឌ នៃគណ:កម្មការខេត្ត ស្តីពីការគាំពារសង្គម ទៅលើនីតិវិធីនៃការស្នើសុំចូលជាសមាជិករបស់ក្រុមមគ្គុទេសក៍ទេសចរណ៍ខេត្តសៀមរាបទៅក្នុងប្រព័ន្ឋ ប.ស.ស។
ថ្លែងតាមប្រព័ន្ឋវីដេអូនិមិត្តពីចំងាយក្នុងកិច្ចប្រជុំនេះ ឯកឧត្តម សោម ចំណាន បានឯកភាពជាមួយស្ថានភាពលំបាកដោយសារវិបត្តិនៃជំងឺកូវីដ-១៩ ដែលបណ្តាលឱ្យអាក់ខានការងារទាំងអស់គ្នា ទាំងថ្នាក់ខេត្ត និងថ្នាក់ជាតិ តែយ៉ាងណាក៏ដោយក៏យើងខិតខំប្រឹងប្រែងអនុវត្តការងារឱ្យអស់ពីលទ្ឋភាព។ ឯកឧត្តម អនុរដ្ឋលេខាធិការមានប្រសាសន៍ថា៖ ពេលនេះជាវេលាសមស្របយើងនឹងចាប់ផ្តើមរៀបចំឱ្យមាននូវផែនការសកម្មភាពច្បាស់លាស់សម្រាប់គណ:កម្មការនៅថ្នាក់ក្រោមជាតិក្នុងការអនុវត្តគោលនយោបាយនេះ។ ដោយសារខេត្តសៀមរាប ជាខេត្តមានសក្តានុពលលើវិស័យទេសចរណ៍ តែដោយជំងឺកូវីដ-១៩ រាតត្បាតជាង២ឆ្នាំមកនេះ បណ្តាលឱ្យកម្មករនិយោជិកក្នុងខេត្តនេះជាច្រើនត្រូវបាត់បង់ការងារ រួមមាន ភោជនីយដ្ឋាន ផ្ទះសំណាក់ សណ្ឋាគារត្រូវបានបិទឬផ្អាក ហេតុនេះតាមរយ:គម្រោងស្តីពីការងារសមរម្យសម្រាប់យុវជន ជាគម្រោងទទួលបានការគាំទ្រនិងសម្របសម្រួល ពីអង្គការយូអិនឌីភី រួមជាមួយ អាយឡូ យូនីសេហ្វ ផងដែរនោះ បានសម្រេចយកខេត្តសៀមរាបដើម្បីភ្ជាប់រវាងគោលនយោបាយជាតិស្តីពីមុខរបរ និងការងារ ជាមួយនឹងគម្រោងនេះ នឹងយកខេត្តនេះជាខេត្តគំរូដំបូងគេ សម្រាប់ការកសាងនូវផែនការសកម្មភាពដើម្បីអនុវត្តគោលនយោបាយជាតិស្តីពីមុខរបរ និងការងារ ដើម្បីជួយផ្នែកបច្ចេកទេសសម្រាប់លេខាធិការដ្ឋានគណ:កម្មការថ្នាក់ខេត្តអាចអនុវត្តបានដោយរលូន។
សូមជំរាបថា៖ កិច្ចប្រជុំបានដាក់នូវរបៀបវារ:មួយចំនួនដូចជា ៖១- ស្នើសុំមន្ទីរ អង្គភាពជាសមាជិក ពិនិត្យលើសេចក្តីព្រាង អំពីសមាសភាពគណ:កម្មការខេត្ត សម្រាប់ដឹកនាំ ត្រួតពិនិត្យ និងវាយតម្លៃ លើការអនុវត្តគោលនយោបាយជាតិស្តីពី មុខរបរ និងការងារឆ្នាំ២០១៥-២០២៥ (គ.ខ.ម.ក)។
២.-ស្នើសុំឱ្យមន្ទីរ អង្គភាព ជាសមាជិក ដូចមានក្នុងសេចក្តីសម្រេច សហការជាមួយលេខាធិការដ្ឋាន នៃគណ:កម្មការសម្រាប់ដឹកនាំ ត្រួតពិនិត្យ និងវាយតម្លៃ ក្នុងការផ្តល់ផែនការសកម្មភាព ឆ្នាំ២០២២-២០២៣ ដោយមានការសម្របសម្រួលពីមន្ទីរការងារ និងបណ្តុះបណ្តាលវិជ្ជាជីវ: (ក្រុមការងារលេខាធិការដ្ឋាន និងធ្វើសំណើប្រមូលផែនការនៅតាមន្ទីរ អង្គភាព ដោយមានភ្ជាប់ជាមួយនូវ តារាងគំរូលម្អិត)។ ៣.ស្នើឱ្យមន្ទីរអង្គភាពជាសមាជិក ចាត់មន្រ្តីជំនាញ ០១រូប ទទួលបន្ទុកការងារនេះ ដើម្បីធ្វើការទំនាក់ទំនងការងារជាមួយលេខាធិការដ្ឋាន គ.ខ.ម.ក ដែលមានមន្ទីរការងារ ជាអ្នកសម្របសម្រួល៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
