ការិយាល័យលក់ និងសាលប្រជុំ ស្ថិតក្នុងភូមិជន្លង់ សង្កាត់សាលាកំរើក ក្រុងសៀមរាប ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប មានប្រសាសន៍ថា៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងមកដល់ក្នុងពេលដ៏ខ្លីខាងមុខនេះ រដ្ឋបាលខេត្ត សហការជាមួយសហភាពសហព័ន្ធយុវជនកម្ពុជាខេត្ត និងអ្នកពាក់ព័ន្ធរៀបចំពិធីសង្ក្រាន្តសៀមរាប ដែលនឹងត្រូវរៀបចំទៅលើពីរទីតាំង ទី១- នៅក្នុងក្រុងសៀមរាប និងទី២- នៅប្រាសាទចៅសាយចៅទេវតា គោលបំណង នៃការរៀបចំព្រឹត្តិការណ៍នេះ គឺដើម្បីចូលរួមថែរក្សាវប្បធម៌ដូនតារបស់យើងឱ្យបានគង់វង្សស្ថិតស្ថេរជាអតម: និងដើម្បីទាក់ទាញភ្ញៀវទេសចរ ចូលមកទស្សនាខេត្តនេះ អមទៅដោយទេសភាពដ៏សែនត្រជាក់ភ្នែក នៃគម្រោងផ្លូវទាំង ៣៨ខ្សែ និងស្ទឹងសៀមរាប ដ៏ស្រស់បំព្រង ដែលមានការតុបតែងលំអរដោយភ្លើងចំរុះព័រណ៍គួរគយគន់។
ឯកឧត្តម បញ្ជាក់ថា៖ ពិធីសង្ក្រាន្តសៀមរាប នៅប្រាសាទចៅសាយទេវតា អ្នកចូលរួមកំសានត្រូវតែស្លៀកបំពាក់ប្រពៃណីខ្មែរ ដូចជាហូល ផាមួង អាវប៉ាក់ ខោចែវជាដើម ដើម្បីរួមគ្នាលើកតម្លៃវប្បធម៌ប្រពៃណីជាតិយើង។ ឯកឧត្តម ទៀ សីហា បន្ថែមថា៖ ស្របពេលដែលស្ថានភាព នៃការរីករាលដាលនៃជំងឺកូវីដ-១៩ មានសភាពស្ងប់ស្កាត់ រាជរដ្ឋាភិបាលកម្ពុជា ក៏បានបើកប្រទេសឡើងវិញ នាចុងឆ្នាំ២០២១កន្លងទៅ ដើម្បីធ្វើឱ្យកំណើនសេដ្ឋកិច្ចជាតិ វិលទៅរកប្រក្រតីភាពឡើងវិញ។ ជាមួយនោះ សេវាកម្មទេសចរណ៍នានារបស់ខេត្តរួមមាន សណ្ឋាគារ ភោជនីយដ្ឋាន ផ្ទះសំណាក់ ខារ៉ាអូខេ ឌីស្គូតែក ផ្សារទំនើប។ល។ ក៏បានបើកដំណើរការទទួលភ្ញៀវទេសចរ ទាំងជាតិ និងអន្តរជាតិជាបណ្តើរៗហើយដែរ ដោយទីតាំងអាជីវកម្ម បានអនុវត្តយ៉ាងខ្ជាប់ខ្ជួននូវវិធានការនានារបស់រាជរដ្ឋាភិបាល ក្រសួងសុខាភិបាល និងតាមការចង្អុលបង្ហាញរបស់អាជ្ញាធរមានសមត្ថកិច្ច។ ជាក់ស្តែងតាមរយ: នៃការរៀបចំពិធីបុណ្យឆ្លងឆ្នាំចាស់ផ្លាស់ចូលឆ្នាំថ្មី ២០២១-២០២២កន្លងទៅ បានភ្ញៀវទេសចរជាតិ-អន្តរជាតិ ចូលមកទស្សនាខេត្តសៀមរាប ប្រមាណ២០ម៉ឺននាក់ផងដែរ។
សូមជំរាបថា៖ ពិធីសង្ក្រាន្តសៀមរាប ដែលនឹងត្រូវរៀបចំទៅលើពីរទីតាំង នៅក្នុងក្រុងសៀមរាប និងទីនៅប្រាសាទចៅសាយទេវតាមានកម្មវិធីជាច្រើន រួមមាន៖ កម្មវិធីជិះទូកកម្សាន្ត មានកម្មវិធី ពិព័រណ៍ម្ហូបអាហារ ផ្សារបណ្តែតទឹក តន្រ្តីស្គរដៃ ការសម្តែងសិល្ប: នៅលើផែទឹក និងការប្រគុំតន្រ្តីខ្នាតយក្សពីរកន្លែងផងដែរ។ ដោយឡែកកម្មវិធីនៅប្រាសាទចៅសាយទេវតា រួមមាន៖ ពិធីបួងសួងសុំសេចក្តីសុខ ពិធីទទួលទេវតាឆ្នាំថ្មី ពិធីពួនភ្នំខ្សាច់ និងការរៀបចំជាភូមិខ្ញុំ មានលេងល្បែងប្រជាប្រីយ៍ និងការលេងល្ខោនបាសាក់។ល។ ដែលនឹងប្រព្រឹត្តទៅចាប់ពីថ្ងៃទី១២-១៦ ខែមេសា ឆ្នាំ២០២២ខាងមុខនេះ។
សូមបញ្ជាក់ផងដែរថា៖ ក្រុមហ៊ុនប្រ៊ីលានស៊ីធី វើលដ៍ ឯ.ក បានរៀបចំពិធីសម្ពោធដាក់ឱ្យដំណើរការក្រុមហ៊ុន ដែលជាក្រុមហ៊ុនលក់ផ្ទះល្វែង លក់ផលិតផលរក្សាសម្រស់ Cosmetic សេវាកម្មសាងសង់ និងលក់ប្រេនកាហ្វេ ហើយក៏មានដែរពិធីជប់លៀងបុគ្គលិក ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ក្រោមអធិបតីភាព ឯកឧត្តម ទៀ សីហា អភិបាលខេត្តសៀមរាប ឯកឧត្តម ស ថាវី អនុរដ្ឋលេខាធិការក្រសួងការពារជាតិ និងលោកជំទាវ លោកជំទាវឧកញ៉ា ឡេង ចាន់ណា អគ្គនាយិកាក្រុមហ៊ុនប្រ៊ីលាន ស៊ីធីវើលដ៍ ឯ.ក និងបុគ្គលិក ព្រមទាំងវត្តមាន ឯកឧត្តម លោកជំទាវ អ្នកឧកញ៉ា លោក លោកស្រី ប្រធានមន្ទីរ-អង្គភាព និងពាណិជ្ជករ សរុបជាង១,០០០នាក់៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
