ព្រឹកថ្ងៃទី២៩ ខែមីនា ឆ្នាំ២០២២ មន្ទីរសុខាភិបាលខេត្តសៀមរាប បានបើកកិច្ចប្រជុំក្រុមការងារពិសេសថ្នាក់ខេត្ត ដើម្បីលុបបំបាត់ជំងឺគ្រុនចាញ់ប្រចាំឆ្នាំ២០២១-២០២២ ក្នុងគោលបំណងធ្វើបច្ចុប្បន្នភាពពីស្ថានភាពជំងឺគ្រុនចាញ់ សមិទ្ធិផល បញ្ហាប្រឈម និងទិសដៅអនុវត្តឈានទៅរកការលុបបំបាត់ជំងឺគ្រុនចាញ់ ពង្រឹងតួនាទីក្រុមការងារពិសេសលុបបំបាត់ជំងឺគ្រុនចាញ់ និងអន្តរាគមក្នុងការឆ្លើយតបទៅនឹងជំងឺគ្រុនចាញ់ ពិភាក្សាលើបញ្ហាប្រឈម នឹងរកដំណោះស្រាយនានា ក្នុងការផ្តល់អនុសាសន៍ និងទិសដៅបន្តដើម្បីសំរេចគោលដៅលុបបំបាត់ជំងឺគ្រុនចាញ់ក្នុងខេត្តសៀមរាប។
លោក ពិន ប្រាកដ អភិបាលរងខេត្តសៀមរាប មានប្រសាសន៏ថា ក្រុមការងារពិសេសថ្នាក់ខេត្ត បានធ្វើការស្រាវជ្រាវកន្លងមកនៅឆ្នាំ២០២១ ដើម្បីរកមេរោគគ្រុនចាញ់ ហើយការព្យាបាល ការផ្គត់ផ្គង់ថ្នាំសម្រាប់ធ្វើតេស្ត នឹងស្រាវជ្រាវករណីសង្ស័យរកមេរោគគ្រុនចាញ់បានចំនួន ៦៧២៥៨ ករណី ទាំងនៅគ្រឹះស្ថានសុខភាពសាធារណៈ និងអ្នកស្ម័គចិត្តព្យាបាលគ្រុនចាញ់។ ការធ្វើតេស្តនេះ បានធ្លាក់ចុះជាងឆ្នាំ២០២០ ដែលក្រុមការងារយើងធ្វើតេស្តបានចំនួន ៧៦៧៨៩ករណី ក្នុងនោះ ចំពោះករណីវិជ្ជមានចំនួន ១១ករណី (ដែលសុទ្ធតែជាប្រភេទវីវ៉ាក់) ថយចុះខ្លាំងបើធៀបនឹងឆ្នាំ២០២០កន្លងមក មានចំនួនដល់ទៅ ៥១ករណីឯណោះ ដែលក្រុមការងារយើងបានធ្វើតេស្ដ និងថ្នាំគ្រប់គ្រាន់នៅតាមគ្រឹះស្ថានសុខភាពសាធារណៈ និងអ្នកស្ម័គ្រចិត្តព្យាបាលគ្រុនចាញ់សម្រាប់ស្រាវជ្រាវ នឹងព្យាបាលជំងឺគ្រុនចាញ់នោះ។
អភិបាលរងខេត្តសៀមរាប បានជម្រុញឲ្យមន្ទីរ និងស្រុកប្រតិបត្តិទាំងអស់ត្រូវអនុវត្តការប្រជុំប្រចាំខែប្រចាំត្រីមាសពាក់ព័ន្ធនឹងជម្ងឺគ្រុនចាញ់នៅតាមមណ្ឌលសុខភាពដែលមានអ្នកស្ម័គ្រចិត្តព្យាបាលគ្រុនចាញ់ នឹងធ្វើការចុះពិនិត្យតាមដាននៅតាមមណ្ឌលសុខភាពនានា និងគ្លីនិកឯកជនជាប្រចាំ ដើម្បីងាយស្រួលក្នុងការព្យាបាលឲ្យទាន់សភាពការជម្ងឺផងដែរ។
លោក វិជ្ជ:បណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប មានប្រសាសន៏លើកឡើងថា ចំពោះការងារអប់រំ នឹងបង្ការជំងឺគ្រុនចាញ់នេះ កន្លងមក គឺក្រុមការងារយើងទាំងអស់ បានធ្វើការយ៉ាងសកម្មនឹងយកចិត្តទុកដាក់ខ្ពស់បំផុតដល់បងប្អូនប្រជាពលរដ្ឋនៅតាមគោលដៅមណ្ឌលសុខភាពក្នុងស្រុកនានា ដើម្បីចែកជូននៅសម្ភារ:ការពារជម្ងឺគ្រុនចាញ់ក្នុងនោះជារួមមាន៖ មុង គ្រែ ចំនួន ៨៧៨៧ និងមុង អង្រឹង ចំនួន៣៤៥០។ ការអប់រំសុខភាព ត្រូវបានអនុវត្តនៅតាមមណ្ឌលសុខភាព និងនៅតាមអ្នកស្ម័គ្រចិត្តជាច្រើន នឹងការព្យាបាលផ្ដាច់ពីជំងឺគ្រុនចាញ់ប្រភេទ (វីវ៉ាក់) បានដំណើរការសេវាព្យាបាលផ្ដាច់ប្រភេទវីវ៉ាក់ នៅតាមមន្ទីរពេទ្យ និងមណ្ឌលសុខភាពមួយចំនួន ដែលសរុបក្នុងខេត្តទាំងមូល មានចំនួន ១២កន្លែងតាមស្រុកនីមួយ។ លោក បានបន្តទៀតថា បញ្ហាប្រឈមដោយសារការរីករាលនៃជំងឺកូវីដ.១៩ បានធ្វើឱ្យខកខានដល់ការអនុវត្តសកម្មភាពជាច្រើន ដូចជាការប្រជុំក្រុមការងារពិសេសថ្នាក់ខេត្ត និងថ្នាក់ស្រុក និងការចុះអប់រំសហគមន៍ជាដើម។ បញ្ហានេះក៏ធ្វើឱ្យការស្រាវជ្រាវជំងឺធ្លាក់ចុះផងដែរ ហើយការផ្សព្វផ្សាយអំពីសេវាព្យាបាលផ្តាច់ (វីវ៉ាក់) នៅមិនទាន់បានទូលំទូលាយនៅឡើយទេ៕
អត្ថបទ និងរូបភាព៖ ស៊ាន សុផាត
