មន្ដ្រីជាន់ខ្ពស់ក្រសួងទេសចរណ៍ បានថ្លែងកោតសរសើរ ចំពោះសាលាសណ្ឋាគារ និងទេសចរណ៍ប៉ូល ឌុយ ប្រ៊ូល នៅក្នុងខេត្ដសៀមរាប ដែលបានចូលរួមចំណែកបណ្តុះបណ្តាល ធនធានមនុស្សក្នុងវិស័យទេសចរណ៍ ជាពិសេសការអភិវឌ្ឍជំនាញវិជ្ជាជីវ: ទេសចរណ៍ នៅលើទីផ្សារឧស្សាហកម្មទេសចរណ៍ និងបដិសណ្ឋារកិច្ចរបស់កម្ពុជា ប្រកបដោយជោគជ័យ ខណ: ដែលមានសិក្ខាកាមផ្នែកទេសចរណ៍ និងបដិសណ្ឋារកិច្ចជំនួន ១៥៦នាក់ បានបញ្ចាក់ការសិក្សារបស់ខ្លួន ដោយជោគជ័យសម្រាប់ឆ្នាំសិក្សា២០២០ -២០២១។
ឯកឧត្ដម ប៉ាត់ សុខុម រដ្ឋលេខាធិការក្រសួងទេសចរណ៍ បានថ្លែងបែបនេះ នៅក្នុងពិធីប្រគល់វិញ្ញាបនបត្រវិជ្ជាជីវ: ក្របខ័ណ្ឌគុណវុឌ្ឍិអាស៊ានជំនាន់ទី១៩ ឆ្នាំសិក្សា២០២០ និង២០២១ នៅសាលាប៉ូលឌុយព្រូល ក្រុងសៀមរាប កាលពីថ្ងៃទី៣០ ខែមីនា ឆ្នាំ២០២២នេះ។
ឯកឧត្ដម ប៉ាត់ សុខុប មានប្រសាសន៍បន្តថា សមិទ្ធផលនេះ ជាផ្នែកមួយទៀត ដែលសបញ្ជាក់ឲ្យឃើញថា សាលាសណ្ឋាគារ និងទេសចរណ៍ប៉ូលឌុយ ប្រ៊ូល គឺជាថ្នាលបណ្តុះបណ្តាលធនធនាមនុស្សក្នុងវិស័យទេសចរណ៍ ជាពិសេសបណ្តុះបណ្តាលអ្នកជំនាញឱ្យមានសមត្ថភាព ស្របតាមស្តង់ដាអាស៊ាន ដែលមានលទ្ធភាពបម្លាស់ទីការងារក្នុងតំបន់ ស្របតាមស្មារតី នៃការអនុវត្តកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន (MRA-TP) និងមិនត្រឹម តែរួមចំណែកបង្កើតការងារជូនយុវជនកម្ពុជាប៉ុណ្ណោះទេ ប៉ុន្តែថែមទាំងជួយលើកកម្ពស់គុណភាពផលិតភាព និងសេវាកម្មទេសចរណ៍ផងដែរ។ ឯកឧត្តម បានបន្ដទៀតថា ការពង្រឹងគុណភាពសេវាកម្មទេសចរណ៍ ចាំបាច់ទាមទារឱ្យមានការគិតគូរដល់ការបណ្តុះបណ្តាល និងអភិវឌ្ឍសមត្ថភាពអ្នកជំនាញ ដើម្បីមានសមត្ថភាពគ្រប់គ្រាន់ និងវិជ្ជាជីវ:ខ្ពស់នៅក្នុងការផ្តល់សេវាកម្មដល់ទេសចរកាន់តែប្រសើរ និងប្រកបដោយភាពពេញចិត្តដល់ភ្ញៀវ ដែលធ្វើដំណើរកំសាន្ត នៅតាមគោលដៅទេសចរណ៍។ ការអភិវឌ្ឍធនធានមនុស្ស ក្នុងវិស័យទេសចរណ៍ ជាពិសេសការបណ្តុះបណ្តាល ជំនាញទេសចរណ៍ និងបដិសណ្ឋារកិច្ច ត្រូវបានមើលឃើញថានៅមានកម្រិតទាំងបរិមាណ និងគុណភាព ព្រមទាំងប្រឈមនឹងបញ្ហាមួយចំនួន ដែលក្នុងនោះ រួមមានការខ្វះខាតសម្បទា ដើម្បីទ្រទ្រង់ការបណ្តុះបណ្តាលជំនាញវិជ្ជាជីវ:ទេសចរណ៍ ដូចជា សាលាវិជ្ជាជីវ:ទេសចរណ៍ គ្រឹះស្ថានសិក្សាទេសចរណ៍ និងបដិសណ្ឋារកិច្ច ដែលកត្តានេះជំរុញឲ្យមានកង្វះខាតអ្នកជំនាញទេសចរណ៍ ដើម្បីឆ្លើយតបទៅនឹងតម្រូវការធនធានមនុស្សក្នុងវិស័យទេសចរណ៍។
ឯកឧត្ដម បានបន្ថែមដែរថា ដើម្បីចូលរួមសម្រេចឱ្យបាននូវចក្ខុវិស័យ នៃការអភិវឌ្ឍធនធានមនុស្ស ក្នុងវិស័យទេសចរណ៍កន្លងមក ដោយមានការឯកភាពពីរាជរាដ្ឋាភិបាល ក្រសួងទេសចរណ៍បានទទួលកម្ចីហិរញ្ញប្បទានពីទីភ្នាក់ងារបារាំង ដើម្បីការអភិវឌ្ឍ AFD ដើម្បីសាងសង់សាលាបណ្តុះបណ្តាលជំនាញវិជ្ជាជីវ:ទេសចរណ៍ជាតិចំនួន០២ (ទី១ នៅរាជធានីភ្នំពេញ និងទី២ ទៀតនៅខេត្តព្រះសីហនុ)។ ដោយឡែក ក្រសួងទេសចរណ៍ ក៏បានទទួលស្គាល់សាលាបណ្តុះបណ្តាលជំនាញវិជ្ជាជីវ:ទេសចរណ៍ ដែលគ្រប់គ្រងដោយអង្គការក្រៅរដ្ឋាភិបាល និងឯកជនចំនួន២០ ដែលបានធ្វើការបណ្តុះបណ្តាលជំនាញវិជ្ជាជីវ:ទេសចរណ៍ ស្របតាមស្តង់ដា និងកម្មវិធីបណ្តុះបណ្តាលជាតិ និងអាស៊ានដោយក្នុងនោះ សាលាទាំងអស់នោះបានធ្វើការបណ្តុះបណ្តាលអ្នកជំនាញប្រមាណ ១,២០០នាក់ ក្នុងមួយឆ្នាំៗ។ ការជំរុញបង្កើតសាលាវិជ្ជាជីវ:ទេសចរណ៍ បដិសណ្ឋារកិច្ច និងការចូលរួមបណ្តុះបណ្តាលដោយផ្ទាល់ពីសំណាក់សាលាបណ្តុះបណ្តាលជំនាញទេសចរណ៍ដែលគ្រប់គ្រងដោយអង្គការ សាលាឯកជន និងការចូលរួមដល់ការបង្កើនកំលាំងពលកម្មជំនាញ ក្នុងវិស័យទេសចរណ៍ឱ្យបានប្រមាណ ១,២លាននាក់ នៅក្នុងឆ្នាំ២០២៥, ១,៥លាននាក់ នៅក្នុងឆ្នាំ២០៣០ និង ២លាននាក់នៅក្នុងឆ្នាំ២០៣៥ ដើម្បីឆ្លើយតបទៅនឹងតម្រូវការភ្ញៀវទេសចរ ដែលរំពឹងនឹងត្រឡប់មករកស្ថានភាពដ៏ប្រសើរឡើងវិញនៅក្នុងដំណាក់កាលក្រោយវិបត្តិកូវីដ-១៩។
នៅក្នុងយុទ្ធសាស្រ្តទាក់ទាញ និងត្រៀមទទួលទេសចរអន្តរជាតិ ជាពិសេសនៅក្នុងផែនការស្តារ និងអភិវឌ្ឍវិស័យទេសចរណ៍២០២១-២០២៥ ក្រសួងទេសចរណ៍ បាននឹងកំពុងយកចិត្តទុកដាក់ជំរុញការអភិវឌ្ឍធនធានមនុស្សក្នុងវិស័យទេសចរណ៍ ជាពិសេសការបណ្តុះបណ្តាលជំនាញវិជ្ជាជីវ: ប្រកបដោយគុណភាពស្របតាមស្តង់ដាតំបន់ និងអន្តរជាតិ សំដៅធានាឲ្យមានធនធានមនុស្សមានភាពគ្រប់គ្រាន់ទាំងបរិមាណ និងគុណភាពឆ្លើយតបទៅនឹងទីផ្សារការងារ ក្នុងវិស័យទេសចរណ៍ និងបដិសណ្ឋារកិច្ច ជាមួយនឹងការផ្តល់សេវាកម្មដ៏ល្អឥតខ្ចោះដល់ភ្ញៀវទេសចរ។
សូមជម្រាបថា សិក្ខាកាមសាលាសណ្ឋាគារ និងទេសចរណ៍ ប៉ូលឌុយព្រុយ ដែលបានទទួលវិញ្ញាបនបត្រនោះ រួមមានវិញ្ញាបនបត្រវិជ្ជាជីវ:ក្របខណ្ឌគុណវុឌ្ឍិអាស៊ានចំនួន ១០៣នាក់ ផ្នែកថ្នាក់ត្រៀមបដិសណ្ឋារកិច្ចចំនួន ១៤នាក់និងវិញ្ញាបនបត្របញ្ជាក់សមត្ថភាពជំនាញបដិសណ្ឋារកិច្ចសេវាកម្មសណ្ឋាគារ សម្រាប់ពលករទេសន្តរប្រវេសន៍ ក្រោមជំនួយឧបត្ថម្ភរបស់អង្គការអន្តរជាតិទេសន្តរប្រវេសន៍ចំនួន ៣៩នាក់៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
