លទ្ធផលការងារសហគមន៍របស់អាជ្ញាធរជាតិអប្សរាប្រចាំត្រីមាសទី១ ក្នុងឆ្នាំ២០២២ បានចុះផ្សព្វផ្សាយអប់រំ និងពិនិត្យការស្នើសុំជួសជុលផ្ទះ រួមទាំងសាងសង់តូចតាចទាំង៥ស្រុក/ក្រុង ក្នុងតំបន់ឧទ្យានអង្គរ និងក្រៅតំបន់ឧទ្យានអង្គរបានចំនួន ៤៣៩សំណើ ដែលក្នុងនោះបានអនុញ្ញាតជូនប្រជាពលរដ្ឋចំនួន ៣១៤សំណើ។ ក្នុងករណីអនុញ្ញាតជូនប្រជាពលរដ្ឋខាងលើ រួមមាននៅស្រុកប្រាសាទបាគង បានចំនួន ៣២សំណើ, ស្រុកអង្គរធំ បានចំនួន ២៥សំណើ, ស្រុកពួក បានចំនួន ៦៧សំណើ, ក្រុងសៀមរាបបានចំនួន ១៤១សំណើ និងស្រុកបន្ទាយស្រី ៤៨សំណើ ជាមួយនោះក្រុមការងារក្រៅឧទ្យាន បានចំនួន ១សំណើ សរុបចំនួន ៣១៤សំណើ។
បើទោះបីជាយ៉ាងណា បញ្ហាប្រឈមនៅតែមាន ដែលក្រុមការងារសហគមន៍បានជួបកន្លងមក ដូចជាការជួសជុល ឬការសាងសង់មុនការចុះពិនិត្យរបស់ក្រុមការងារ ការប្រកាសលក់ដីក្នុងតំបន់ការពារតាមរយ:បណ្តាញទំនាក់ទំនងសង្គមហ្វេកប៊ុក និងការដាក់ស្លាក(ដីលក់) ផ្ទាល់ ក្នុងតំបន់ការងារនៅតែមាន។ជាគោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋ ឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លី ក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរឱ្យកាន់តែមានប្រសិទ្ធិភាពទាន់ពេលវេលា។ សូមបញ្ជាក់ថា រាល់ការស្នើសុំច្បាប់ជួសជុល គឺពុំមានការបង់ប្រាក់ឡើយ៕
អត្ថបទ និងរូបភាព: បូ សាវី កែសម្រួលដោយ លីវ សុខុន!!!
