ថ្លែងក្នុងសិក្ខាសាលា ស្តីពី តួនាទីរបស់អ្នកសារព័ត៌មាន ក្រោមប្រធានបទ ទន្លេរតែមួយ អនាគតតែមួយ ក្រោមគម្រោងមេគង្គ-ឡាងឆាង នាព្រឹកថ្ងៃទី២៩ ខែ មីនា ឆ្នាំ២០២២នេះ ឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៌មាន តំណាងឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានសម្តែងនូវការកោតសរសើរដល់ប្រព័ន្ធផ្សព្វផ្សាយ និងស្ថាប័នព័ត៌មានដែលបានខិតខំបំពេញតួនាទីរបស់ខ្លួន បើទោះបីស្ថិតនៅក្នុងស្ថានភាពនៃការវាយលុកដោយជំងឺកូវីដ១៩ និងបានចូលរួមចំណែកយ៉ាងសំខាន់បន្សាបនូវព័ត៌មានក្លែងក្លាយនៅក្នុងប្រទេសកម្ពុជា ។
ឯកឧត្តម កឹម គុណវឌ្ឍន៍ បានឱ្យដឹងថា ក្នុងពេលប្រឈមនឹងការរីករាលដាលនៃជំងឺកូវីដ១៩នៅក្នុងប្រទេសកម្ពុជា អ្នកសារព័ត៌មានវិជ្ជាជីវៈនៅតែបន្តការងាររបស់ពួកគេយ៉ាងសកម្ម ជាពិសេសទាក់ទងទៅនឹងការផ្សាយព័ត៌មានអំពីបញ្ហាជំងឺកូវីដ១៩នេះតែម្តង។ បន្ទាប់ពីមានជនឆ្លៀតឱកាស និងមជ្ឈដ្ឋានខ្លះបានប្រឌិតព័ត៌មានក្លែងក្លាយធ្វើឱ្យប្រជាពលរដ្ឋមានការយល់ច្រឡំជុំវិញបញ្ហាជំងឺកូវីដ១៩។ ឯកឧត្តម បានបន្តថា ទោះស្ថិតក្នុងស្ថានភាពដ៏លំបាកនេះ ក៏ដោយ ប្រព័ន្ធផ្សព្វផ្សាយ និងអ្នកសារព័ត៌មាន នៅតែបន្តចូលរួមផ្សព្វផ្សាយពីសភាពការណ៍ពិតនៅកម្ពុជា និងការវិវត្តផ្សេងៗនៅលើសាកលលោកទាក់ទងនឹងបញ្ហាជំងឺរាតត្បាតកូវីដ១៩ ដើម្បីចែករំលែកដល់សាធារណៈជនបានដឹង និងបង្កើនការប្រុងប្រយ័ត្នកាន់ខ្ពស់។
ព័ត៌មានជាតិ ថ្មីៗ
ទន្ទឹមនោះ ក្រសួងព័ត៌មានវិញក៍បានបង្កើតគណៈកម្មការប្រយុទ្ធប្រឆាំងព័ត៌មានក្លែងក្លាយ ដើម្បីស្រាវជ្រាវរកអ្នកផលិតព័ត៌មានមិនពិត និងចាត់វិធានការនានាលើក្រុមទាំងនោះផងដែរ។
គួររំលឹកថា កន្លងមក សម្តេចតេជោ ហ៊ុន សែន នាយករដ្ឋមន្រ្តី បានអំពាវនាវដល់ស្ថាប័នព័ត៌មានទាំងអស់ចូលរួមប្រយុទ្ធប្រឆាំងនឹងព័ត៌មានក្លែងក្លាយដោយផ្សព្វផ្សាយព័ត៌មានពិត និងធ្វើការបកស្រាយឱ្យបានទាន់សភាពការណ៍ ដើម្បីបន្សាប និងបំផ្លាញចោលព័ត៌មានមិនពិតពាក់ព័ន្ធបញ្ហាជំងឺកូវីដ១៩។ លើសពីនេះទៅទៀត សម្តេចក៏បានអំពាវនាវឱ្យអ្នកសារព័ត៌មានទាំងអស់ប្រកាន់ខ្ជាប់នូវិជ្ជាជីវៈសារព័ត៌មាន គោរពច្បាប់ និងគោរពគោលការណ៍ «កុំបំពានសិទ្ធិអ្នកដទៃ កុំបំភ្លៃការពិត» ដើម្បីជាការចូលរួមប្រយុទ្ធប្រឆាំងនឹងជំងឺកូវីដ១៩នៅក្នុងប្រទេសកម្ពុជាផងដែរ៕
