ថ្លែងក្នុងពិធីបើក ការផ្សព្វផ្សាយខ្លឹមសារអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី២៩ ប្រគេនដល់ព្រះចៅអធិការ ភិក្ខុ-សាមណេរ គណៈកម្មការអាចារ្យ នៅវត្តទេពពោធិវង្សស្ថិតក្នុងក្រុងសៀមរាប ខេត្តសៀមរាបកាលពីថ្ងៃទី២៩ខែមីនាឆ្នាំ២០២២ ឯកឧត្តម អ្នកឧកញ៉ា សៀង ណាំ សមាជិករដ្ឋសភា និងជាតំណាងរាស្ត្រមណ្ឌលសៀមរាប បានសំណូមពរដល់អង្គប្រជុំ សូមធ្វើការចាប់អារម្មណ៍ទៅលើខ្លឹមសារទាំង ៧ ចំណុច ដែលមានចែងក្នុងសង្ឃប្រកាស ដើម្បីរក្សាគុណតម្លៃនិងកិត្យានុភាពរបស់ព្រះពុទ្ធសាសនា ដោយបន្តអនុវត្តខ្លឹមសារសង្ឃប្រកាសរបស់អនុសំវច្ឆរៈមហាសន្និបាតមន្ត្រីសង្ឃទូទាំងប្រទេសកន្លងមក និងលិខិតបទដ្ឋានគតិយុតិ្តនានាដែលនៅជាធរមាន ឱ្យមានប្រសិទ្ឋភាព ។
ជាមួយគ្នានោះ ឯកឧត្តម បាន ជំរុញនិងលើកទឹកចិត្តឱ្យមានការបង្កើតពុទ្ធមណ្ឌលវិបស្សនាធុរៈឱ្យកាន់តែច្រើន សម្រាប់ជាចលករជួយជំរុញចលនាមហាជនឱ្យចូលរួមបដិបត្តិសមថកម្មដ្ឋាន វិបស្សនាកម្មដ្ឋានឱ្យមានបរិមាណច្រើននៅទូទាំងប្រទេស សំដៅអប់រំបញ្ញាឱ្យមានសុខុមាលភាពនិងភាពសុខស្ងប់ផ្នែកផ្លូវចិត្ត, ពង្រឹងវិស័យពុទ្ធិកសិក្សាគ្រប់កម្រឹត (បឋម មធ្យម ឧត្តម និងក្រោយឧត្តម), ពង្រឹងការបដិបត្តិធម៌វិន័យរបស់ភិក្ខុ សាមណេរឱ្យសក្តិសមជា សមណៈមានភាពថ្លៃថ្នូរ ។ឯកឧត្តម សៀង ណាំ បានផ្តាំផ្ញដល់ភិក្ខុ -សាមណេរគ្រប់អង្គ មិនត្រូវធ្វើឬចូលរួមដង្ហែជាក្បួនបាតុកម្ម កូដកម្ម កុប្បកម្ម ក្នុងទីសាធារណៈដែលនាំឱ្យបាត់បង់សេចក្តីថ្លៃថ្នូររបស់អ្នកបួសផ្ទុយទៅវិញត្រូវពង្រឹងការគោរពចំពោះគ្រូឧបជ្ឈាយាចារ្យ និងព្រះថេរៈទាំងឡាយ, លើសពីនេះ ត្រូវពង្រឹងលើអភិបាលកិច្ចគ្រប់លំដាប់ថ្នាក់ ដោយផ្សារភ្ជាប់នឹងបច្ចេកវិទ្យាទំនើប ដើម្បីឱ្យកិច្ចការពុទ្ធសាសនាមានសណ្តាប់ធ្នាប់ល្អ ធានានូវសាមគ្គីភាពក្នុងជួរពុទ្ធសាសនិកជន លុបបំបាត់នូវការបែងចែកនិន្នាការសាសនាទៅតាមជំនឿដោយគ្មានហេតុផល។ បន្តការងារសង្គមជាមួយរាជរដ្ឋាភិបាលកម្ពុជា ពិសេស ចូលរួមការអប់រំសីលធម៌សង្គមឱ្យបានខ្លាំងក្លាដល់ស្រទាប់យុវជននិងសិស្សានុសិស្ស ដើម្បីទប់ស្កាត់នូវរាល់អំពើអសកម្មទាំងឡាយរបស់យុវជន មានការប្រើប្រាស់គ្រឿងញៀនខុសច្បាប់ និងសកម្មភាពក្មេងទំនើងជាដើម។ល។
សូមជំរាបថា៖ថ្ងៃទី២៩ខែមិនាឆ្នាំ២០២២ សាលាអនុគណក្រុងសៀមរាបសហការជាមួយមន្ទីរធម្មការនិងសាសនាខេត្ត បានរៀបចំឡើង ពិធីផ្សព្វផ្សាយនេះពេញមួយថ្ងៃដោយបានការនិមន្តនិងអញ្ជើញ ចូលរួមពីសំណាក់ព្រះចៅអធិការ គ្រូសូធ្យស្តាំ-ឆ្វេង អាចារ្យ គណៈកម្មការវត្ត និងស្ថាប័នពាក់ព័ន្ធ ព្រមទាំងលោក លោកស្រី ចៅសង្កាត់ទាំង១២ ក្នុ្ងងក្រុងសៀមរាប សរុបប្រមាណចំនួន២៣០អង្គ/នាក់ ។
ទូទាំងក្រុងសៀមរាប មានវត្តគណៈមហានិកាយ ចំនួន៤០ វត្ត និងអាស្រម ១ មានព្រះសង្ឃចំនួន១៣១៨អង្គ ភិក្ខុចំនួន ៥៤៦អង្គ, សាមណេរចំនួន ៧៧២អង្គ។ចំពោះវិស័យ ពុទ្ធិកសិក្សា វិញ យើងបានបណ្តុះបណ្តាលព្រះសង្ឃតាមរយៈសាលាពុទ្ធិកៈទាំងបីកម្រឹត គឺពុទ្ធិកបឋមសិក្សា ពុទ្ធិកអនុវិទ្យាល័យ និងពុទ្ធិកវិទ្យាល័យ។ ដោយឡែកពុទ្ធិកសាកលវិទ្យាល័យពុំទាន់មាននៅឡើយ គឺសមណសិស្សត្រូវទៅបន្តការសិក្សា នៅរាជធានីភ្នំពេញ និងបាត់ដំបង សម្រាប់ឧត្តមសិក្សានេះ។នេះបើតាមរបាយការណ៍របស់ព្រះវិជ័យរង្សី សាសនធរោ ឡាច លាង ព្រះរាជាគណៈថ្នាក់កិត្តិយស និងជាព្រះគ្រូប្រាសាទរង្សី ព្រះអនុគណក្រុងសៀមរាប។
អត្ថបទ និងរូបភាព៖ យូ វង្ស
