ប្រធានក្រុមប្រឹក្សាខេត្តសៀមរាប ឯកឧត្តម អ៊ាន ឃុន បានលើកឡើងថា អំពើជួញដូរមនុស្ស ជាបទល្មើសគួរឲ្យស្អប់ខ្ពើម ដែលទាមទារឲ្យគ្រប់ភាគីរួមគ្នា ជាធ្លុងមួយ ដើម្បីយកឈ្នះលើវា។
មានប្រសាសន៍នៅក្នុងពិធីបើកកិច្ចប្រជុំបូកសរុបលទ្ធផលការងារប្រយុទ្ធប្រឆាំងអំពើជួញដូរមនុស្សឆ្នាំ២០២១ និង លើកទិសដៅអនុវត្តបន្តឆ្នាំ២០២២ ក្រោមអធិបតីភាពលោកជំទាវ ជូ ប៊ុនអេង រដ្ឋលេខាធិការក្រសួង មហាផ្ទៃ និង ជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នាព្រឹកថ្ងៃទី ២៩ ខែ មីនា ឆ្នាំ២០២២នេះ ឯកឧត្តម អ៊ាន ឃុន បានលើកឡើងថា អំពើជួញដូរមនុស្ស គឺជាបទឧក្រិដ្ឋមួយ ក្នុងចំណោមឧក្រិដ្ឋកម្មឆ្លងដែន ដែលប្រទេសនានាបាន និងកំពុងតែប្រឈមមុខនាពេលបច្ចុប្បន្ន ។
ម្យ៉ាងវិញទៀតអំពើជួញដូរមនុស្ស ត្រូវបានចាត់ទុកថាជាទាសភាពសម័យទំនើប ដែលមានចរិកស្មុគស្មាញប្រកបដោយល្បិចកលពាក់ព័ន្ធទៅនឹងរបត់នៃផ្នត់គំនិត ចិត្តសាស្រ្តសង្គម ការរីកចម្រើននៃវិទ្យាសាស្រ្ត បច្ចេកទេស ការវិវត្តន៍នៃសេដ្ឋកិច្ច សង្គមនយោបាយជាតិ អន្តរជាតិ ជាដើម ដែលត្រូវការជាចាំបាច់នូវការប្តេជ្ញាចិត្តរួមគ្នា ដើម្បីរិះរកវិធានការ ដ៏មានប្រសិទ្ធភាពក្នុងការបង្ការទប់ស្កាត់ និងបង្ក្រាបរាល់បទល្មើសពាក់ព័ន្ធ ដែលមានការចាត់តាំង និងឧក្រិដ្ឋជន ដើម្បីកាត់បន្ថយឈានទៅលុបបំបាត់ឲ្យបាន។
ឯកឧត្តមបន្តថា ឧក្រិដ្ឋជនធ្វើសកម្មភាពបទល្មើស ដោយប្រើប្រាស់គ្រប់មធ្យោបាយ និងវិធីសាស្រ្តគ្រប់រូបភាព ក្នុងគោលបំណងទុច្ចរិត ដើម្បីកេងប្រវ័ញ្ចយកផលប្រយោជន៍ពីជនរងគ្រោះ ទោះបីជាមានច្បាប់ដាក់ទោសធ្ងន់ធ្ងរយ៉ាងណាក៏ដោយ ក៏ឧក្រិដ្ឋជនមិនញញើតនឹងធ្វើសកម្មភាពឡើយ ឲ្យតែអាចយកផលចំណេញបាន គេនឹងធ្វើដោយមិនគិតពីការឈឺចាប់ ឬក្តីវិនាសអន្តរាយរបស់មនុស្សណាម្នាក់ឬប្រទេសជាតិណាមួយឡើយ។ ជាក់ស្តែងកន្លងមកមានជនរងគ្រោះ ដោយអំពើជួញដូរមនុស្ស ត្រូវបានរងគ្រោះរាល់ថ្ងៃជាបន្តបន្ទាប់ ។
ឯកឧត្តមអ៊ាន ឃុន បានលើកឡើងថា ដើម្បីឲ្យការអនុវត្តសកម្មភាពប្រព្រឹត្តទៅ លុះត្រាតែការរួមសហការ និងការឯកភាពគ្នាជាធ្លុងមួយ ដោយប្រើប្រាស់កម្លាំងសរុប មធ្យោបាយសរុប ទើបអាចឲ្យយើងយកឈ្នះលើបទល្មើសគួរឲ្យស្អប់ខ្ពើមនេះបាន ជាបន្តបន្ទាប់ ៕
អត្ថបទ និងរូបភាព៖ ជា ស្រស់
