ថ្លែងបិទកិច្ចប្រជុំលើកទី១របស់គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ នៅទីស្តីការក្រសួងទេសចរណ៍ កាលពីព្រឹកថ្ងៃទី៣១ ខែមីនា ឆ្នាំ២០២២នេះ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា៖ ការកំណត់តំបន់អេកូទេសចរណ៍សម្រាប់រៀបចំផែនការជាជំហានៗ គឺជាយុទ្ឋសាស្ត្រវិស័យទេសចរណ៍ ដើម្បីស្រូបទាញយកទេសចរណ៍ថ្នាក់ខ្ពស់( Hight clase )គ្រប់ជាតិសាសន៍ក្នុងពិភពលោក ឱ្យមកកម្សាន្តកាន់តែមានចំនួនច្រើន និងស្នាក់នៅបានយូរថ្ងៃ នៅលើទឹកដីកម្ពុជាក្រៅពីតំបន់ប្រាសាទ តាមរយៈការរៀបចំ និងកំណត់ឱ្យបានច្បាស់នូវតំបន់អេកូទេសចរណ៍សហគមន៍នៅទូទាំងព្រះរាជាណាចក្រកម្ពុជា។
ឯកឧត្តមបណ្ឌិត ថោង ខុន បន្តថា ដើម្បីក្លាយជាតំបន់អេកូទេសចរណ៍មានសក្តានុពលនិងទាក់ទាញ ចាំបាច់ត្រូវអនុវត្តតាមស្តង់ដារទេសចរណ៍និងបទដ្ឋានបរិស្ថាន ដូចជាការរៀបចំឱ្យមានកន្លែងសម្រាកសមរម្យ បន្ទប់ទឹក បន្ទប់អនាម័យ មានម្ហូបអាហារប្រកបដោយឱជារសនិងអនាម័យ មានអ្នកប្រចាំការសង្គ្រោះបឋម ការពារហានិភ័យពេលភ្ញៀវត្រូវសត្វ តូចធំខាំទិច ខណៈបច្ចប្បន្នតំបន់អេកូទេសចរណ៍ខ្លះនៅកម្ពុជាយើង មិនទាន់រៀបចំតាមលក្ខណៈស្តង់ដារឱ្យបានពេញលេញនោះទេ និង ក៏មិនទាន់បានកំណត់ចំនួនឱ្យបានច្បាស់លាស់នៅឡើយដែរ ហេតុនេះដើម្បីទទួលអ្នកទេសចរបានទាមទារការកំណត់ចំនួនតំបន់អេកូទេសចរណ៍ឱ្យបានច្បាស់លាស់ មានលក្ខណៈស្តង់ដារ ទើបយើងអាចផ្សព្វផ្សាយនិងទទួលទេសចរទាំងជាតិនិងអន្តរជាតិបាន។
ក្នុងឱកាសនោះដែរឯកឧត្តម រដ្ឋមន្ត្រី បានជំរុញដល់រដ្ឋបាលរាជធានីខេត្តក្រុងស្រុកនិងមន្ទីរ ស្ថាប័នអង្គភាពជំនាញពាក់ព័ន្ឋ រួមសហការគ្នាឱ្យបានល្អជាមួយក្រុមការងារគណៈកម្មាធិការជាតិគ្រប់គ្រងនិងអភិវឌ្ឍសហគមន៍ទេសចរណ៍និងអេកូទេសចរណ៍ ទន្ទឹមនឹងនោះលេខាធិការដ្ឋាននៃគណៈកម្មាធិការនេះក៍ត្រូវតាមដាននិងសម្របសម្រួលលើការងារនេះឱ្យបានជាប្រចាំ។ឯកឧត្តមរដ្ឋមន្ត្រី គ្រោងនឹងរៀបចំវេទិកាជាតិអេកូទេសចរណ៍នៅថ្ងៃទី១៩ខែវិច្ឆិកាឆ្នាំ២០២២ តែមិនទាន់កំណត់ទីតាំងនៅឡើយទេ ។
គួររំលឹកថា ៖កិច្ចប្រជុំនេះ បានប្រព្រឹត្តទៅតាមរយៈប្រព័ន្ឋអនឡាញនៅតាមកន្លែងបម្រើការងាររៀងៗខ្លួន ដោយមានការចូលរួមពីរដ្ឋបាលរាជធានីខេត្ត មន្ទីរអង្គភាពស្ថាប័នពាក់ព័ន្ឋ ក្រោមអធិបតីភាពចូលរួមប្រជុំផ្ទាល់របស់ ឯកឧត្តម បណ្ឌិត ថោង ខុន រដ្ឋមន្ត្រីក្រសួងទេសចរណ៍ , ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ,ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន រួមជាមួយអាជ្ញាធរមីន អាជ្ញាធរជាតិអប្សរា និងថ្នាក់ដឹកនាំពាក់ព័ន្ឋមួយចំនួនទៀត ព្រមទាំងធ្វើការប្រកាសសមាភាព លេខាធិការដ្ឋាន និងសមាសភាពគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍និងអេកូទេសចរណ៍ ស្តាប់នូលទ្ឋផលនិងវឌ្ឍនភាពការងារ និងកិច្ចពិភាក្សាអំពីផែនការសកម្មភាពនៃការកំណត់ចំនួនតំបន់អេកូទេសចរណ៍ ៕
អត្ថបទ និងរូបភាព៖ យូ វង្ស និង សហការី
កែសម្រួលអត្ថបទ ៖ លោក លីវ សាន្ត
