នៅថ្ងៃទី០៦ ខែមេសា ឆ្នាំ២០២២ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និង ឯកឧត្ត ទៀ សីហា អភិបាល អភិបាលខេត្ត បានដឹកនាំបើកកិច្ចប្រជុំសាមញ្ញលើកទី៣៥ ក្នុងអាណត្ដិទី៣ តាមរយៈវីដេអូ Zoom និងដោយផ្ទាល់ ដោយមានការចូលរួមពីសំណាក់សមាជិក សមាជិកាក្រុមប្រឹក្សាខេត្ត នាយករដ្ឋបាលខេត្ត អភិបាលក្រុងស្រុក ថ្នាក់ដឹកនាំអង្គភាពមន្ទីរស្ថាប័ន ពាក់ព័ន្ធជុំវិញខេត្ត ជាច្រើនរូបទៀត។
ក្នុងកិច្ចប្រជុំនេះ មានរបៀបវារ:ចំនួន៤ រួមមាន៖ ១.ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៣៤ របស់ខ្លួនកាលពីថ្ងៃទី០៩ ខែមិនា ឆ្នាំ២០២២, ទី២.ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំត្រីមាសទី១ ស្តីពីការអនុវត្តការងាររបស់រដ្ឋបាលខេត្ត, ទី៣.ពិនិត្យ ពិភាក្សា និងអនម័តសេចក្តីព្រាង សេចក្តីសម្រេចស្តីពីការបែងចែកតួនាទី ភារកិច្ចនិងរបៀបរបបការងារជូនគណៈអភិបាលខេត្ត និង៤.ពិនិត្យ ពិភាក្សា និងអនុម័ត លើសេចក្តីព្រាងផែនការក្របខ័ណ្ឌសម្រាប់ឆ្នាំ២០២៣ របស់រដ្ឋបាលខេត្ត។ ក្នុងឱកាសនោះអង្គប្រជុំ ក៏បានលើកឡើងពីបញ្ហាមួយចំនួនដូចជា៖ បញ្ហាចរាចរណ៍តាមដងផ្លូវ ដែលនៅតែជាក្តីបារម្ភ, បញ្ហាអ្នកសុំទាននៅតាមផ្លូវសាធារណៈ, ការជួសជុលកំណាត់ផ្លូវជាតិលេខ៦ ពីស្ដុបសុខា ដល់វង្វង់មូលព្រលានយន្ដហោះអន្ដរជាតិសៀមរាប, ការដាក់ស្លាកសញ្ញាចរាចរណ៍នៅគម្រោងស្ថាបនាផ្លូវ ៣៨ខ្សែ ក្នុងក្រុងសៀមរាប, ការធ្វើអត្ដសញ្ញាប័ណ្ណជូនប្រជាពលរដ្ឋអោយទាន់តម្រូវការរបស់ប្រជាពលរដ្ឋ និងលើកឡើងពីការព្យាបាលជំងឹកូវីដ-១៩ ជាសះស្បើយហើយមានការរើជំងឺឡើងវិញ ហើយក៏មានការឆ្លើយបំភ្លឺភ្លាមៗ ពីមន្រ្តីជំនាញជូនអង្គប្រជុំផងដែរ ។
ឯកឧត្ត ទៀ សីហា មានប្រសាសន៍ថា ការលើកយកបញ្ហាទាំងអស់នេះ ដាក់ចូលក្នុងកិច្ចប្រជុំ គឺជាយោបល់ល្អៗ ដើម្បីរួមគ្នាដោះស្រាយស្វែងរកការរីកចម្រើន សម្រាប់ខេត្តរបស់យើង។ ជាមួយគ្នានោះ បញ្ហាសុវត្ថិភាព និងការធ្វើចរាចរណ៍តាមដងផ្លូវ អាជ្ញាធរខេត្តបានពិគ្រោះជាមួយស្នងការខេត្ត និងមន្ទីរព័ត៌មានខេត្តរួចហើយ ដើម្បីចាត់វាគ្មិនទៅពន្យល់អំពីច្បាប់ចរាចរណ៍ផ្លូវគោកឱ្យបានទូលំទូលាយ ពន្យល់អំពីគំនូសសញ្ញានានានៅលើផ្លូវ ៣៨ខ្សែដែលជាសមិទ្ឋផលថ្មី។ ជាមួយនោះអាជ្ញាធរខេត្ត ក៍នឹងសហការជាមួយសហភាពសហព័ន្ឋយុវជនកម្ពុជាខេត្ត និងយុវជនស្ម័គ្រចិត្តកាកបាទក្រហម បន្តផ្សព្វផ្សាយតាមដងផ្លូ វដើម្បីបញ្ជ្រាបការយល់ដឹងដល់អ្នកប្រើប្រាស់ទ្រូងផ្លូវគោរពច្បាប់ចរាចរណ៍ផ្លូវគោកទាំងអស់គ្នា សំដៅធ្វើយ៉ាងណាចៀសវាង ឬកាត់បន្ថយជាអតិបរិមានូវគ្រោះថ្នាក់ចរាចរណ៍។
ឯកឧត្តមអភិបាលខេត្ត ក៏បានណែនាំដល់ចៅសង្កាត់ទាំងអស់ នៅក្នុងក្រុងសៀមរាប ត្រូវរៀបចំផែនការនៃការចំណាយទៅលើមូលនិធិឃុំសង្កាត់ សម្រាប់ប្រើប្រាស់ក្នុងការជួសជុលផ្លូវលំនានាក្នុងមូលដ្ឋានរបស់ខ្លួន ដើម្បីយកមកពិនិត្យ ពិភាក្សារួមគ្នា ដើម្បីឈានទៅកែលំអ សាងសង់ផ្លូវទាំងនោះជាជំហានៗ។ ហើយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងព្រឹត្តិការណ៍សៀមរាបសង្ក្រាន្ត ខាងមុខនេះ ឯកឧត្តម បានជំរុញដល់អាជ្ញាធរមានសមត្ថកិច្ច ថ្នាក់ដឹកនាំមន្ទីរអង្គភាពនានាក្នុងខេត្ត សហការគ្នាឱ្យបានជិតស្និទ្ឋជាមួយស្នងការដ្ឋាននគរបាលខេត្ត កងរាជអាវុធហត្ថខេត្តនិងតំបន់ប្រតិបត្តិការសិករងខេត្ត មន្ទីរសុខាភិបាលខេត្ត បន្តរួមគ្នាយកចិត្តទុកដាក់ណែនាំបងប្អូនប្រជាពលរដ្ឋ ដើម្បីការពារ និងទប់ស្កាត់ការឆ្លងរាលដាលជំងឺកូវីដ-១៩ ដោយត្រូវនាំគ្នាប្រកាន់ឃ្ជាប់នូវវិធានការ ៣កុំ និង៣ការពារ និងការពារនូវសន្តិសុខ សណ្តាប់ធ្នាប់របៀបរៀបរយសាធារណៈឱ្យបានល្អប្រសើរ ជូនបងប្អូនដែលមកលេងកំសាននៅសៀមរាប។
ថ្លែងបិទអង្គប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងក្នុងការដឹកនាំ និងបំពេញតួនាទីភារកិច្ច របស់ជួរគណៈអភិបាលខេត្ត ក្រុង ស្រុក ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខឆាប់ៗនេះ សង្កេតឃើញថា អាជ្ញាធរខេត្ត រដ្ឋបាលខេត្តកំពុងតែសហការយ៉ាងសស្រាក់ស្រាំជាមួយសហភាពសហព័ន្ឋយុវជនកម្ពុជាខេត្ត ក្នុងការតុបតែងលំអសោភ័ណភាពក្នុងក្រុង រៀបចំកន្លែងកំសាន ពិសេសនៅតាមដងស្ទឹងសៀមរាប ដើម្បីជូនប្រជាពលរដ្ឋកំសានសប្បាយក្នុងពិធីបុណ្យចូលឆ្នាំខ្មែរ។ ហើយឯកឧត្តម បានជំរុញដល់អាជ្ញាធរដែនដីគ្រប់ជាន់ថ្នាក់ និងសមត្ថកិច្ចទាំងអស់ ត្រូវពង្រឹងវិធានការសន្តិសុខសណ្តាប់ធ្នាប់សាធារណៈ សន្តិសុខសង្គម សន្តិសុខនយោបាយព្រមទាំងការទប់ស្កាត់ការរីករាលដាលនៃជំងឺកូវីដ-១៩ ដោយប្រកាន់ខ្ជាប់វិធានការ៣ការពារនិង៣កុំឱ្យបានខ្ពស់បំផុត៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
