សិស្សានុសិស្សនៃវិទ្យាល័យអង្គរ រួមនឹងក្រុមការងារស្ម័គ្រចិត្ដមនុស្សធម៌មកពីប្រទេសកូរ៉េ និងក្រុមអង្គការមិត្ដកម្ពុជាជាង ១០០នាក់ កាលពីព្រឹកថ្ងៃទិ០៥ ខែមេសា ឆ្នាំ២០២២ម្សិលមិញនេះ បាននាំគ្នាដង្ហែរក្បួន ដើម្បីធ្វើការសំអាតបរិស្ថាន និងអនាម័យ នៅតាមដងផ្លូវ និងទីតាំងមួយចំនួនក្នុងក្រុងសៀមរាប ដើម្បីបំផុសគំនិតដល់យុវជន ក៍ដូចជាប្រជាពលរដ្ឋខ្មែរ ឱ្យមានការចូលរួមថែរក្សាអនាំម័យ និងបរិស្ថាន ខណៈដែលជិតដល់ចូលឆ្នាំថ្មីប្រពៃណីខ្មែរ។
បើតាមលោក សាត មាស ប្រធានអង្គការមិត្ដកម្ពុជា បានឲ្យដឹងថា ការធ្វើយុទ្ធការសំអាតបរិស្ថានអនាម័យនេះ ធ្វើឡើងចាប់ចំណុចផ្លូវមុខសាលាវិទ្យាល័យអង្គរ ឆ្ពោះទៅកាន់តំបន់ផ្សារាត្រីផប់ស្រ្ទីត ដោយមានការដើរកាន់បដារ ដើម្បីដាស់ស្មារតីយុវជន និងប្រជាពលរដ្ឋ ជាពិសេសសិស្សានុសិស្សឱ្យចេះស្រលាញ់បរិស្ថាន និងថែរក្សាអនាម័យឱ្យបានល្អ នៅក្នុងទីក្រុងសៀមរាប ខណៈដែលពិធីបុណ្យចូលឆ្នាំថ្មីបានខិតជិតមកដល់ហើយ។ លោកថា ក្រុងសៀមរាប ជាទីក្រុងបេតិកភណ្ឌ ដែលមានអ្នកទេសចរណ៍ទៅទស្សនាជារៀងរាល់ថ្ងៃ ប៉ុន្ដែបើបរិស្ថានមិនស្អាត វានងធ្វើឱ្យប៉ះពាល់ដល់អារម្មណ៍ពួកគាត់ដែលទៅកំសាន្ដនៅទីនេះ ជាពិសេស អ្នកទេសចរទៅទស្សនានៅរដូវបុណ្យចូលឆ្នាំប្រពៃណីខ្មែរខាងមុខនេះ។ ប៉ុន្ដែយ៉ាងនេះក្ដី លោកសង្កេតឃើញថា ប្រជាបលរដ្ឋក្នុងក្រុងសៀមរាបបច្ចប្បន្ន មិនសូវមានអ្នកបោះចោលសំរាមពាសវាស់ពាស់កាលដូចមុនឡើយ។
ក្រុមអង្គការមិត្ដកម្ពុជា ក៏ដូចជាសិស្សានុសិស្ស ដែលបានចូលរួមក្នុងឱកាសនោះ ពួកគាត់ក៏បានលើកឡើងដែរថា ការនាំគ្នាសំអាតបរិស្ថាននេះ ជាសារមួយបង្ហាញដល់មនុស្សគ្រប់រូបឱ្យចូលរួមសំអាតបរិស្ថាន និងអនាម័យ ខណៈដែលបច្ចុប្បន្ននេះ សិស្សានុសិស្សមួយចំនួន មិនទាន់មានឆន្ទៈ ក្នុងការចូលរួមអនាម័យបិរិស្ថាននៅឡើយទេ។ ការធ្វើឱ្យទីក្រុងស្អាតមានអនាម័យល្អ ជាការទាក់ទាញអ្នកទេសចរ ឱ្យទៅទស្សនាមិនចេះជិនណាយ។ នាពេលបច្ចុប្បន្ននេះ ក្រុងសៀមរាប ពិតជាមានទេសភាពស្រស់ស្អាត ខុសប្លែកពីឆ្នាំមុន ដោយសារតែអាជ្ញាធរខេត្ដ បានរៀបចំទីក្រុងសៀមរាប ក្លាយជាទីក្រុងប្រកបដោយបរិស្ថានស្អាត អនាមួយល្អ ជាពិសេសផ្លូវក្នុងក្រុងមានសោភណ្ឌភាពគួរឱ្យចង់រស់នៅ។ ជាមួយគ្នានោះដែរ ពួកគាត់ក៏បានអំពាវដល់ប្រជាពលរដ្ឋ សូមចូលរួមថែរក្សាបរិស្ថានឱ្យបានល្អគ្រប់ៗគ្នា ទាំងនៅតាមផ្ទះ ឬទីសាធារណៈ ព្រោះបរិស្ថានល្អ អនាម័យស្អាត នាំឱ្យមានសុខភាពល្អ និងទាក់ទាញអ្នកទេសចរគ្រប់ជាតិសាសន៍មកកាន់ខេត្ដទេសចរណ៍អង្គរនៃយើង៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
