នាព្រឹកថ្ងៃទី ០៦ខែ មេសា ឆ្នាំ២០២២ នាសណ្ឋាគារអង្គរប៉ារ៉ាឌី ក្រុងសៀមរាប អគ្គលេខាធិការដ្ឋានប្រឹក្សាសកម្មភាពជនពិការ ក្រុមប្រឹក្សាសកម្មភាពជនពិការ ខេត្តសៀមរាប និង អង្គការជនពិការអន្តរជាតិ បានរៀបចំវគ្គបណ្តុះបណ្តាលស្តីពីហេដ្ឋារចនាសម្ព័ន្ធរូបវន្ត បង្កលក្ខណៈងាយស្រួល ក្រោមការឧបត្ថម្ភពីរដ្ឋាភិបាលអូស្ត្រាលី និង កម្មវិធីសហប្រតិបត្តិការអូស្ត្រាលី កម្ពុជា ដើមី្សសេវាប្រកបដោយសមធម៌ និងនិរន្តភាព ក្រោមអធិបតីភាព លោក អ៊ុង សម្បត្តិ អគ្គលេខាធិការរង នៃអគ្គលេខាធិការដ្ឋានប្រឹក្សាសកម្មភាព ជនពិការ និងចូលរួមដោយលោកនាយករងរដ្ឋបាលសាលាខេត្ត ថ្នាក់ដឹកនាំមន្ទី អង្គការដៃគូរ ព្រមទាំងលោក លោកស្រីជាកងកម្លាំងសមត្ថកិច្ច អាជ្ញាធរស្រុកទាំង១១ក្នុងខេត្តសៀមរាប ជាសិក្ខាកាម។
លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តសៀមរាប លើកឡើងថា គោលបំណងនៃវគ្គបណ្តុះបណ្តាលនេះ រៀបចំឡើងដើម្បីបញ្ជ្រាបការយល់ដឹង ដល់អាជ្ញាធរមូលដ្ឋាន ពីទស្សនទាននៃពិការភាព ភាពចុះខ្សោយនៃសរីរាង្គ និងទស្សនទានទូទៅអំពីការបង្កលក្ខណៈងាយស្រួល ក្នុងក្របខណ្ឌគោលនយោបាយជាតិ និងអន្តរជាតិ ដែលជាគោលការណ៍សកល ទៅដល់ការចេញចូល ការផ្លាស់ទី និងការប្រើប្រាស់ ព្រមទាំងទស្សនទាននៃ រចនាជាសកល ការសម្របសម្រួលសមស្រប (សមភាព ,សមធម៌) និងបទដ្ឋានបច្ចេកទេសហេដ្ឋារចនាសម្ព័ន្ធរូបវន្ត បង្ក លក្ខណៈងាយស្រួលសម្រាប់ជនមានពិការភាព ។ ក្នុងនោះដែរលោកប្រធានមន្ទីរ ក៏បានបញ្ជាក់ផងដែរ អំពីលទ្ធផលដែលមន្ទីរបានអនុវត្តក្នុងរយៈពេលកន្លងមក លើការសាងសង់ជម្រៀល សម្រាប់ផ្លូវជនពិការនៅតាមមន្ទីរ ស្ថាប័ន សំខាន់នៅតាមបណ្តាក្រុង ស្រុក ឃុំ សង្កាត់ លើការងារបម្រើសេវាសាធារណៈ។
បើតាមការលើកឡើងពី លោក អ៊ុង សម្បត្តិ បញ្ជាក់ថា ក្រៅពីការបញ្ជ្រាបការយល់ដឹង វគ្គបណ្ដុះបណ្ដាលនេះ ក៏ទាមទារឱ្យសិក្ខាកាមទាំងអស់យកនូវចំណេះដឹងទាំងនេះ ទៅផ្សព្វផ្សាយនៅតាមអង្គភាព និងមូលដ្ឋានរបស់ខ្លួន។ បទដ្ឋានបច្ចេកទេសហេដ្ឋរចនាសម្ព័ន្ធរូបវន្ត បង្កលក្ខណៈងាយស្រួលសម្រាប់ជនមានពិការភាព ត្រូវបានអនុវត្តន៍ចំពោះគម្រោងសាងសង់ និងកែសម្រួលហេដ្ឋារចនា សម្ព័ន្ធរូបវន្តសាធារណៈ សំណង់ អគារផ្តល់សេវាជូនសាធារណជន និង លំហសាធារណៈជាដើម ដើមី្បបង្កលក្ខណៈងាយស្រួល សម្រាប់ជនមានពិការភាពគ្រប់ប្រភេទ ងាយស្រួលធ្វើការចល័តទី ចេញចូល ឡើងចុះ ប្រកបដោយសុវត្ថិភាព និងគ្មានឧបសគ្គដល់ពួកគាត់ ។
លោកអគ្គលេខាធិការរង បន្ថែមថា មនុស្សយើងគ្រប់រូបនៅលើភពផែនដី គឺមិនអាចជៀសផុតពីពិការភាពនោះឡើយ នាពេលអនាគត ប៉ុន្តែពិការភាពនោះមានរូបភាពផ្សេងៗគ្នា។ ជាមួយនោះ លោក ក៏បានលើកនូវចំណុចមួយចំនួន ដែលជាមូលដ្ឋានគ្រឹះ សម្រាប់អាជ្ញាធរមូលដ្ឋាន និងមន្ត្រីជំនាញ ធ្វើការពិភាក្សាស្វែងយល់នូវក្របខណ្ឌគតិយុត្ត ព្រមទាំងចូលរួមរកចំណុចខ្វះខាត ក្នុងការជួយតាក់តែង ឬកែលម្អបន្ថែម សម្រាប់បង្កលក្ខណៈងាយស្រួលដល់ជនមានពិការភាពផងដែរ។
ក្នុងនោះដែរ លោកអគ្គលេខាធិការរង ក៏បានលើកពី អនុសញ្ញាស្តីពីសិទ្ធិជនពិការ ដោយបានផ្តល់នូវសច្ចាប័នដល់កម្ពុជាក្នុងឆ្នាំ២០១២ ដើមី្បជួយជនពិការឱ្យរស់នៅបាន ដោយឯករាជ្យ និងចូលរួមពេញលេញ គ្រប់ទិដ្ឋភាពនៃជីវិតរដ្ឋភាគី ដើមី្បធានាដល់ជនពិការឈរលើមូលដ្ឋានស្មើភាព និងទទួលបាននូវបរិស្ថាន រូបវន្ត មធ្យោបាយធ្វើដំណើរ ព័ត៌មានទំនាក់ទំនង រួមទាំងប្រព័ន្ធបច្ចេកវិទ្យាព័ត៌មាន ហេដ្ឋារចនាសម្ព័ន្ធរូបវន្ត និង សេវាកម្មផ្សេងៗទៀតផង ។
