ថ្លែងនៅក្នុងពិធីបើកសិក្ខាសាលាស្តីពី ការជំរុញការអនុវត្តគោលនយោបាយ ជាតិប្រជាជន ២០១៦-២០៣០ ក្នុងក្របខ័ណ្ឌគោលដៅ អភិវឌ្ឍន៍ប្រកបដោយចីរភាពកម្ពុជា៖ ប្រជាជន និងការអប់រំ នៅខេត្តសៀមរាប កាលពីព្រឹកថ្ងៃទី១៩ ខែមេសា ឆ្នាំ២០២២នេះ ឯកឧត្តម ទួន ថាវរៈ រដ្ឋលេខធិការក្រសួងផែនការ បានបញ្ជាក់ថា អត្រាភាពក្រីក្ររបស់ប្រជាជនកម្ពុជាមានសន្ទុះកើនឡើងពី ១៣.៥ភាគរយ កាលពីឆ្នាំ២០១៤ មកដល់ ១៧.៨ភាគរយ នៅឆ្នាំ២០១៩ និងឆ្នាំ២០២០ ដែលការកើនឡើងនេះ មួយផ្នែកធំបណ្តាលមកពីវិបត្តិជំងឺឆ្លងសាកលកូវីដ-១៩។
ឯកឧត្តម ទួន ថាវរៈ បានមានប្រសាសន៍ថា អត្រាភាពក្រីក្ររបស់កម្ពុជាបានធ្លាក់ចុះគួរឲ្យកត់សម្គាល់ពី ៤៧ភាគរយ នៅឆ្នាំ២០០៧ មកនៅត្រឹម ២២.៩ភាគរយ ក្នុងឆ្នាំ២០០៩ និងបន្តធ្លាក់មកនៅត្រឹម ១៣.៥ភាគរយ នាឆ្នាំ២០១៤ និងបានរុញកម្ពុជា ឲ្យក្លាយជាប្រទេសដែលមានចំណូលមធ្យមកម្រិតទាប កាលពីឆ្នាំ២០១៥។ ប៉ុន្តែផ្នែកតាមទិន្នន័យស៊ើបអង្កេតសេដ្ឋកិច្ចសង្គមកិច្ច ឆ្នាំ២០១៩/២០២០ អត្រាភាពក្រីក្រមានសន្ទុះកើនកើនឡើងមកដល់ ១៧.៨ភាគរយ ដែលការកើនឡើងនូវអត្រាភាពក្រីក្រនេះ មួយផ្នែកធំបណ្តាលមកពីវិបត្តិជំងឺឆ្លងសាកលកូវីដ-១៩។ បើទោះជាយ៉ាងណា រាជរដ្ឋាភិបាលកម្ពុជា បានការជម្រុញការអនុវត្តគោលនយោបាយជាតិ ប្រជាជន ឆ្នាំ២០១៦/២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាព ឲ្យកាន់តែមានប្រសិទ្ធភាព តាមការបញ្ជ្រាបការយល់ដឹងឲ្យបានទូលំទូលាយដល់អ្នកពាក់ព័ន្ធទាំងអស់ អំពីទស្សនៈវិស័យ យុទ្ធសាស្ត្រ ផែនការ គោលនយោបាយជាតិ និងគោលដៅអភិវឌ្ឍន៍ប្រកបដោយចីរភាព របស់រាជរដ្ឋាភិបាល ដោយផ្សាភ្ជាប់ជា មួយនឹងបញ្ហាប្រជាជននិងអភិវឌ្ឍន៍ រួមមាន ប្រជាជននិងអប់រំ បញ្ហាបម្រែបម្រួលប្រជាសាស្ត្រ បញ្ហាមនុស្សវ័យចាស់ ផលវិបាកប្រជាសាស្ត្រលើការអភិវឌ្ឍ បញ្ហាទេសន្តប្រវេសន៍ និង នគរូបនីយកម្ម បញ្ហាយុវជន បញ្ហាយេនឌ័រ និង សុខភាពបន្តពូជយុវវ័យ ។
ឯកឧត្តមរដ្ឋលេខធិការ ក៏បានលើកផងដែរថា ការអភិវឌ្ឍមូលធនមនុស្ស ក៏ជាកត្តាសំខាន់បំផុត ដែលជាគន្លឹះក្នុងការពង្រីកមូលដ្ឋាន សេដ្ឋកិច្ច និង ការអភិវឌ្ឍលើគ្រប់វិស័យ និងអាចជួយឲ្យកម្ពុជា បង្កើននូវភាពប្រកួតប្រជែងលើពិភពលោក ដោយបន្តផ្តោតជាសំខាន់ក្នុងការវិនិយោគលើវិស័យអប់រំ និងសុខាភិបាល សុខុមាលភាព ដោយផ្តោតការយកចិត្តទុកដាក់ សំខាន់លើយុវជន និងស្ត្រី។ ម៉្យាងទៀតការអប់រំមានសារៈសំខាន់សម្រាប់បុគ្គល និងជាធនធានសម្រាប់អភិវឌ្ឍន៍ជាតិ ហើយការអប់រំជាសិទ្ធពីកំណើតសម្រាប់បុគ្គលម្នាក់ៗ។ ការអប់រំជាការអភិវឌ្ឍសមត្ថភាពមនុស្សជាតិ ដើមី្បលប់បំបាត់វិសមភាពក្នុងសេដ្ឋកិច្ច សង្គម វប្បធម៌ គ្រួសារ/បុគ្គល ច្បាប់នយោបាយ ព្រមទាំងរួមចំណែកដល់ការកាត់បន្ថយភាពក្រីក្រផងដែរ។ ម្យ៉ាងទៀតការកំណត់វិស័យអប់រំ ជាវិស័យអទិភាពរបស់រាជរដ្ឋាភិបាលកម្ពុជា ជាការអភិវឌ្ឍន៍ធនធានមនុស្ស ដើមី្បឆ្លើយតប ទៅនឹងការបម្រែបម្រួលរចនាសម្ព័ន្ធសេដ្ឋកិច្ច ដែលមានវិស័យធំៗ គឺវិស័យកសិកម្ម ឧស្សាហកម្ម និងសេវាកម្ម៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
