បន្ទាប់ពីអញ្ជើញជាអធិតីភាពក្នុងឱកាសបើកសិក្ខាសាលាស្តីពីការឆ្លើយតបសេចក្ដីសន្និដ្ឋាន ៥៧ចំនុច និងអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី ក្នុងការអនុវត្តគោលនយោបាយសមភាពយេនឌ័រសម្រាប់ប្រពន្ធ័ផ្សព្វផ្សាយថ្នាក់ក្រោមជាតិ នៅខេត្តបាត់ដំបង នៅព្រឹកថ្ងៃទី២៦ ខែមេសា ឆ្នាំ២០២២ ឯកឧត្តមរដ្ឋមន្ត្រី ខៀវ កាញារីទ្ធ រួមដំណើរដោយថ្នាក់ដឹកនាំក្រសួងព័ត៌មាន បានអញ្ជើញបន្តចុះត្រួតពិនិត្យពីសកម្មភាពការងារផ្សព្វផ្សាយ របស់ស្ថានីយ៍វិទ្យុ FM ជាតិនគរភ្នំ ១០៣MHz របស់មន្ទីរព័ត៌មានខេត្តសៀមរាប ស្ថិតនៅបុរីរដ្ឋបាលស្រុកបាគង ខេត្តសៀមរាប ។
ក្នុងឱកាសនោះដែរ ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្ត ក៏បានជម្រាបជូនពីវឌ្ឍនភាពការងារដែលថ្នាក់ដឹកនាំ និងមន្រ្តីគ្រប់ផ្នែក គ្រប់ជំនាញនៃមន្ទីរព័ត៌មានខេត្ត បានអនុវត្តក្នុងរយៈពេលកន្លងមក ពិសេសលើការងារផ្សព្វផ្សាយ ទូរទស្សន៍ និងវិទ្យុ ដោយធ្វើអោយប្រជាពលរដ្ឋ ទទួលបានព័ត៌មានទាន់ហេតុការណ៍ ដំណឹងថ្មីៗ និងកម្មវិធីស្តាប់កំសាន្ត។ ឯកឧត្តម ក៏បានបង្ហាញជូនឯកឧត្តមរដ្ឋមន្ត្រី និងប្រតិភូអប់ដំណើរ ពីបញ្ចាម៉ាស៊ីនផ្សាយមួយចំនួន ដែលទទួលបានពីក្រសួងជាង ១០ឆ្នាំមកហើយ ដោយពេលនេះមិនអាចធ្វើការផ្សាយចេញបានឡើយ និងបានហៅអ្នកជំនាញមកជួសជុលជាច្រើនឡើងដែរ ក៍ប៉ុន្តែនៅតែមិនអាចដំណើរការនៅឡើយ ហេតុនេះស្នើសុំការសម្រេចពីថ្នាក់ដឹកនាំក្រសួង ដើម្បីបន្តការជួសជុល ឬគួរធ្វើបែបណា។
ឯកឧត្តម រដ្ឋមន្រ្តី ខៀវ កាញារីទ្ធ បានវាយតំលៃខ្ពស់ចំពោះលទ្ធផលការងារទាំងឡាយដែលទូរទស្សន៍ និងវិទ្យុ FM ជាតិនគរភ្នំ ១០៣MHz របស់មន្ទីរព័ត៌មានខេត្តសៀមរាប ដែលសម្រេចអនុវត្តន៍បានក្នុងរយៈពេលកន្លងមកនេះ។ ឯកឧត្តមរដ្ឋមន្រ្តី បានជម្រុញលើកទឹកចិត្តដល់ថ្នាក់ដឹកនាំ និងមន្រ្តីគ្រប់ជាន់ថ្នាក់ នៃមន្ទីរព័ត៌មានខេត្ត ត្រូវបន្តប្រឹងប្រែងបំពេញការងារតាមជំនាញឲ្យបានកាន់តែល្អប្រសើរបន្ថែមទៀត ត្រូវមានកិច្ចសហការល្អជាមួយ គ្រប់ស្ថាប័ន មន្ទីរជុំវិញខេត្ត ពិសេសការពង្រឹងសាមគ្គីភាពផ្ទៃក្នុង ធ្វើការជួបប្រជុំគ្នាជាប្រចាំ ដើម្បីដោះស្រាយបញ្ហាដែលនៅសេសសល់ ក្តាប់អោយបានរាល់ព័ត៌មានដែលកើតមានឡើងក្នុងខេត្ត ដើម្បីរាយការណ៍ជូនអភិបាលខេត្ត សម្រាប់មានវិធានការដោះស្រាយ និងឆ្លើយតបទាន់ពេលវេលា រាល់ព័ត៌មានដែលមាននោះ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
