មន្ទីរការងារ និងបណ្តុះបណ្តាលវិជ្ជាជីវៈខេត្តសៀមរាប នាព្រឹកថ្ងៃទី ០៣ ខែ ឧសភា ឆ្នាំ ២០២២ បានរៀបចំពិធីអបអរសាទរខួបលើកទី១៣៦ នៃទិវាពលកម្មអន្តរជាតិ ១ ឧសភា ក្រោមប្រធានបទ «សន្តិភាព សុខភាព និងសន្តិសុខការងារ” ដើម្បីលើកកម្ពស់សិទ្ធិសេរីភាព លក្ខខណ្ឌការងារ និងជីវភាពរស់នៅរបស់កម្មករនិយោជិតនៅកម្ពុជា ដោយមានការចូលរួមជាអធិបតីពីសំណាក់ ឯកឧត្តម កុយ សង សមាជិកក្រុមប្រឹក្សាខេត្ត និងលោក នាក់ ណេរ៉ុន អភិបាលរងខេត្ត ព្រមទាំងមានការអញ្ជើញចូលរួមពីសំណាក់ លោក លោកស្រី ប្រធាន អនុប្រធាន មន្ទីរអង្គភាពជុំវិញខេត្ត រដ្ឋបាលក្រុងស្រុក អង្គការដៃគូជាតិអន្តរជាតិ និយោជក កម្មករនិយោជិត ម្ចាស់អាជីវកម្មនិង តំណាងសហជីពមួយចំនួនក្នុងខេត្ត។
លោក ច័ន្ទ សុខុមចិត្តា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត បានមានប្រសាសន៍ថា ទិវាពលកម្មអន្តរជាតិ ១ ឧសភា គឺជាព្រឹត្តិការណ៍ដ៏សំខាន់មួយ សម្រាប់កម្មករនិយោជិត ដែលតែងតែប្រារព្ធជារៀងរាល់ឆ្នាំ។ ហើយការប្រារឰខួបទិវាពលកម្មអន្ដរជាតិ ១ ឧសភា នាឆ្នាំនេះ ស្របពេលសភាពការណ៍ប្រទេសជាតិ សម្រេចបានជោគជ័យដ៏ធំធេងក្នុងការប្រយុទ្ធប្រឆាំងនឹងជំងឺកូវីដ-១៩ ដែលអាចគ្រប់គ្រងបានយ៉ាងល្អប្រសើរធ្វើឱ្យប្រទេស អាចបើកដំណើរការគ្រប់សកម្មភាព សេដ្ឋកិច្ចសង្គមឡើងវិញ។ «ដើម្បីបន្តស្មារតីទិវាពលកម្មអន្តរជាតិ ១ ឧសភា ក្រសួងការងារបានដាក់ចេញរួចហើយនូវទិសដៅការងារសម្រាប់ឆ្នាំ២០២២ រួមមានបន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង។
លោក ច័ន្ទ សុខុមចិត្តា បានបន្តថា មន្ទីរការងារ និងបណ្តុះបណ្តាលវិជ្ជាជីវៈខេត្តសៀមរាប បានពង្រឹងការអនុវត្តច្បាប់ស្តីពីការងារ ហើយបន្តពង្រឹងយន្តការអធិការកិច្ចការងារ ឱ្យកាន់តែមានប្រសិទ្ធភាព និងតម្លាភាព» ហើយលោក ក៍មានសង្ឃឹមយ៉ាងមុតមាំថា នឹងទទួលបានការគាំទ្រ និងចូលរួមពីគ្រប់អ្នកពាក់ព័ន្ធកាន់តែមានភាពខ្លាំងក្លា ស្របតាមការវិវឌ្ឍន៍នៃសង្គម-សេដ្ឋកិច្ចកម្ពុជា និងសកលលោកផងដែរ។
មានប្រសាសន៍ក្នុងឱកាសនោះ លោក នាក់ ណេរ៉ុន បានបង្ហាញពីក្តីសោមនស្សរីករាយ ដែលបានចូលរួមក្នុងពិធីប្រារព្ធខួបអនុស្សាវរីយ៍លើកទី១៣៦ នៃទិវាពលកម្មអន្តរជាតិ ដែលជាពិធីប្រារព្ធឡើងក្នុងន័យរំលឹកដល់បុព្វហេតុរបស់ពលករ កម្មករ នៅលើពិភពលោកទាំងមូល ដែលបានតស៊ូទាមទារសេរីភាព និងយុត្តិធម៌កាលពី ១៣៦ឆ្នាំមុន និងដើម្បីឧទ្ទិសដល់វីរភាពពលករ កម្មករ និងវិញ្ញាណក្ខន្ធរបស់វីរៈជនស្នេហាសេរីភាព និងយុត្តិធម៌។ កត្តាសុខសន្តិភាព និងស្ថិរភាពនយោបាយនេះ បានផ្តល់លទ្ធភាពឲ្យកម្ពុជា អាចទាក់ទាញវិនិយោគិនបរទេស ដើម្បីបង្កើតការងារដល់ប្រជាពលរដ្ឋ និងលើកកម្ពស់សេដ្ឋកិច្ចគ្រួសារ មានជីវភាពធូរធារ សម្បូរសប្បាយដូចសព្វថ្ងៃ និងជំរុញឱ្យក្រុមកម្មករទាំងអស់ចូលរួមថែរក្សាសុខសន្តិភាពឱ្យបានគង់វង្ស ទោះក្នុងតម្លៃណាក៏ដោយ។
លោក នាក់ ណេរ៉ុន មានប្រសាសន៍ទៀតថា ដើម្បីបន្តស្មារតីទិវាពលកម្មអន្តរជាតិ ១ ឧសភា ត្រូវ បន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង ពង្រឹងការអនុវត្តច្បាប់ស្តីពីការងារ បន្តពង្រឹងយន្តការអធិការកិច្ចការងារឱ្យកាន់តែមានប្រសិទ្ធភាព និងតម្លាភាព ពង្រឹងភាពសុខដុមរមនានៃទំនាក់ទំនងវិជ្ជាជីវៈ លើកកម្ពស់ការយល់ដឹងអំពីសិទ្ធិ កាតព្វកិច្ច និងការទទួលខុសត្រូវស្របច្បាប់របស់កម្មករនិយោជិត និងនិយោជក បន្តពង្រឹងយន្តការដោះស្រាយវិវាទការងារ ឱ្យទទួលបានកាន់តែល្អប្រសើរសំដៅឆ្លើយតបនឹងតម្រូវការភាគីវិវាទ និងបន្តប្រែក្លាយរោងចក្រ សហគ្រាសមួយជាសហគមន៍សុខសាន្តមួយរបស់កម្មករនិយោជិ តដែលពោរពេញដោយសមត្ថភាព លក្ខខណ្ឌការងារល្អប្រសើរ ផលិតភាព ឥរិយាបថការងារ ការទទួលខុសត្រូវសង្គម និងមានសុខដុមនីយកម្មទំនាក់ទំនងវិជ្ជាជីវៈ ដោយក្រសួងនឹងផ្តល់ជាវិញ្ញាបនបត្របញ្ជាក់ជូនរោងចក្រ សហគ្រាស ដែលមានលក្ខណសម្បត្តិគ្រប់គ្រាន់តាមលក្ខណវិនិច្ឆ័យ។
លោកអភិបាលរងខេត្ត មានប្រសាសន៍បន្ថែមថា ខេត្តសៀមរាបបានត្រៀមខ្លួនរួចរាល់ហើយ ដើម្បីទទួលភ្ញៀវទេសចរជាតិ-អន្តរជាតិទៅទស្សនាខេត្ដនេះ ប្រកបដោយជឿទុកចិត្ដ ខណៈដែលរដ្ឋបាលខេត្តបានចាត់ចែងបង្ការការរីករាលដាលនៃជំងឺកូវីដ-១៩ ឱ្យកាន់តែប្រសើរថែមទៀត សម្រាប់តំបន់ទេសចរណ៍។ បន្ថែមពីនេះលោកក៏បានស្នើឱ្យប្រតិបត្តិករទេសចរណ៍ ម្ចាស់សហគ្រាសអាជីវកម្ម ក៍ដូចជាកម្មករនិយោជិត និយោជកទាំងអស់ ត្រូវអនុវត្តឱ្យខ្ជាប់ខ្ជួននូវច្បាប់ ស្តីពីការងារនៃព្រះរាជជាណាចក្រកម្ពុជា ព្រមទាំងការអនុវត្ត អនុលោមតាមស្តង់ដារសេវាកម្មអាស៊ានដើម្បីធានាឱ្យការផ្តល់សេវាកម្មរបស់យើងមានគុណភាព និងកាន់តែមានភាពទាក់ទាញភ្ញៀវទេសចរណ៍ឱ្យបានច្រើនជាបន្តបន្ទាប់។ ជាមួយគ្នានោះ ចំពោះបញ្ហាវិវាទការងារអ្នកពាក់ព័ន្ធទាំងអស់ ត្រូវមានការអត់ធ្មត់ធ្វើការដោះស្រាយដោយសន្តិវិធីតាមនីតិវិធីច្បាប់ស្ដីពីការងារ ដែលមានមន្ទីរការងារ និងបណ្តុះបណ្តាលវិជ្ជាជីវៈ ជាអ្នកសម្របសម្រួល ជៀសវាងការធ្វើបាតុកម្ម កូដកម្មនៅតាមទីសាធារណៈ ដែលបានធ្វើឱ្យប៉ះពាល់ដល់កិត្តិយសមុខមាត់ខេត្តរបស់យើង ឬការបាត់បង់នូវអត្ថប្រយោជន៍ផ្សេងៗរបស់ពលករ និយោជិតផងដែរ៕
អត្ថបទ និង រូបភាព៖ លោក ទ្រា ពន្លឺ, លោក បូ សាវី
កែសម្រួល៖ លោក អ៊ុន ណារាជ្យ
