ក្រុមអ្នកភូមិមានប្រុសស្រី ក្មេងចាស់ នៅរសៀលថ្ងៃទី៣ ខែឧសភា ឆ្នាំ២០២២ បានប្រមូលផ្តុំគ្នា ដើម្បីប្រារព្ធពិធីមួយនៅក្នុងប្រាសាទអធ្វា ដែលអ្នកស្រុកតែងហៅថា ពិធីឡើងអ្នកតា ឬឡើងម្ចាស់ស្រុក ដែលពិធីនេះគឺក្រុមអ្នកភូមិតែងតែនាំគ្នាប្រារព្ធឡើងជារៀងរាល់ឆ្នាំនៅចំថ្ងៃ ៣កើត ខែមាឃ ឬក៏ថ្ងៃ ៣កើត ខែពិសាខ។
បើតាមលោកតា សុខ ស៊ាង ដែលជាចាស់ព្រឹទ្ធាចារ្យ នៅក្នុងពិធីឡើងអ្នកតានោះ បានឱ្យដឹងថា ពិធីឡើងអ្នកតានេះ មានជាយូរយារណាស់មកហើយ ដោយលោកមិនដឹងថាចាប់ពីពេលណាមកឡើយ ប៉ុន្ដែនៅឆ្នាំនេះ អ្នកស្រុកមកពីភូមិចំនួន៣ភូមិបានមកធ្វើពិធីឡើងអ្នកតាឬពិធីឡើងម្ចាស់ស្រុក នៅក្នុងប្រាសាទអធ្វានេះ ដែលមានអ្នកភូមិចំនួន ៣ភូមិ។ ពិធីឡើងអ្នកតានេះ គឺអ្នកភូមិតែងនាំគ្នាប្រារព្ធធ្វើជារៀងរាល់ឆ្នាំមិនដែលខាន ដើម្បីសុំឱ្យម្ចាស់ទឹក ម្ចាស់ដីតាមជួយថែរក្សា និងសូមឱ្យអ្នកស្រុក អ្នកស្រែបានសេចក្តីសុខ សប្បាយជៀសផុតអស់គ្រោះកាចចង្រៃទាំងឡាយចេញពីភូមិ និងស្រុក។ ក្រុមអ្នកភូមិដែលមានជំនឿលើពិធីឡើងអ្នកតានេះ នៅពេលដែលមានស្នងចូលរូបម្ដងៗគឺពួកគេតែងនាំគ្នាសំពះ ព្រមទាំងសូមឱ្យស្នងរូបនោះ ប្រោះព្រំទឹកមន្ត ឬក៏ជួយប្រសិទ្ធិពរជ័យសិរីសួស្ដី មកឱ្យពួកគេ។
លោកព្រឹទ្ធាចារ្យ បានបន្ដថា ពិធីឡើងអ្នកតារបស់អ្នកភូមិនេះ តែងតែងធ្វើឡើងនៅក្នុងប្រាសាទអធ្វា ពីព្រោះគេជឿថាបារមីរបស់អ្នកតាមួយអង្គព្រះនាមមហារាជ មហាជម្ពូរបានគង់នៅ ក្នុងនោះបានជួយព្យាបាលជំងឺពួកគាត់ឱ្យជាសះស្បើយ។
សូមបញ្ជាក់ថា ក្នុងពិធីឡើងអ្នកតានោះ គឺមានមនុស្សស្រី ៣នាក់ ដោយម្នាក់ជាស្នងរូបឱ្យអ្នកតាម្ចាស់ស្រុកដែលធំជាងគេ ម្នាក់ទៀតជាស្នងរូបពស់ខៀវ រូបយមបាល រូបក្រពើសនិងម្នាក់ទៀតគឺជាស្នងរូបរបស់គ្រូបាធ្យាយ ដោយគ្រាន់តែនៅកន្លែងដែលគេត្រូវប្រារព្ធ មានស្លាធម៌ បាយសី មានគ្រឿងសំណែន មានផ្ដិលទឹក និងផ្កាមួយថាស ទៀនធូប ដោយមានចាស់ព្រឹទ្ធាចារ្យ អ្នកស្នងរូបនិងក្រុមអ្នកភ្លេងអារក្ស មកជួបជុំគ្នាអុជទៀន ធូបបួងសួងក៏អាចធ្វើទៅបាន។ ដោយឡែក នៅវត្ដអធ្វា គឺមានទម្លាប់ខុសពីវត្ដដទៃទៀតនៅក្នុងប្រទេសកម្ពុជា ដោយសារវត្តនេះមិនប្រារព្ធធ្វើពិធីបុណ្យពិសាខបូជាទេ ដោយសារតែនៅថ្ងៃ ៣កើត ខែពិសាខ ជារៀងរាល់ឆ្នាំគឺអ្នកភូមិតែងនាំគ្នាធ្វើពិធីឡើងអ្នកតា។ ក៏ប៉ុន្តែបើទោះបីជាយ៉ាងណាក៏ដោយ ក៏នៅចំថ្ងៃពិសាខបូជានោះ គឺក្រុមអ្នកភូមិ តែងនាំគ្នាធ្វើពិធីនិមន្តព្រះសង្ឃឆាន់ចង្ហាន់ នៅលើទួលបុរាណមួយដែលអ្នកភូមិហៅថា ទួលតាមឿង។ នៅថ្ងៃជាមួយគ្នាដែលអ្នកភូមិធ្វើពិធីឡើងអ្នកតា ឬពិធីឡើងម្ចាស់ស្រុកនេះដែរ ក្រៅតែពីអ្នកភូមិបានធ្វើពិធីសែនព្រេន និងបញ្ចូលរូប នៅក្នុងប្រាសាទអធ្វានោះ អ្នកភូមិក៏នៅបន្តធ្វើពិធីនេះនៅកន្លែងទួលតាមឿងទៀត។ នៅលើទួលតាមឿងនោះ គឺក្រុមអ្នកភូមិបានធ្វើពិធីមួយផ្សេងទៀត គឺពិធីបញ្ជូនអ្នកតាឡើងគោក។ពិធីបញ្ជូនអ្នកតាឡើងគោកនេះ គឺមានន័យថាជាពិធីមួយដែលគេធ្វើឡើង ក្នុងន័យឱ្យអ្នកតានាំយកអស់គ្រោះកាច គ្រោះភ័យ ចង្រៃឧបទ្រពទាំងឡាយចេញពីភូមិ ស្រុកទាំងអស់ ហើយឱ្យនាំមកនូវសេចក្តីសុខ ចំរើនសិរីសួស្ដីចូលមកជំនួសវិញ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
