នាព្រឹកថ្ងៃទី៥ ខែឧសភា ឆ្នាំ២០២២នេះ តំណាងក្រសួងបរិស្ថាន អាជ្ញាធរខេត្តសៀមរាប បាននាំយកកូនឈើចំនួន១ម៉ឺន៥ពាន់ដើម ដាំដុះឡើងវិញលើផ្ទៃដីចំនួន ៣៥ហិកតា ស្ថិតក្នុងភូមិ៦ សង្កាត់ចុងឃ្នៀស ក្រុងខេត្តសៀមរាប ដែលជាតំបន់ប្រើប្រាស់ច្រើនយ៉ាង នៃតំបន់៣ ក្នុងដែនបឹងទន្លេសាប ដើម្បីអបអរទិវាបរិស្ថានពិភពលោក ៦មិថុនា និងបង្ហាញពីសកម្មភាពបញ្ឈប់ការទន្ទ្រានដីព្រៃលិចទឹកក្នុងតំបន់បឹងទន្លេសាប។
លោក ពិន ប្រាកដ អភិបាលរងខេត្តសៀមរាប លើកឡើងថា បើកាលណាគេនិយាយអំពីបឹងទន្លេសាប គេនឹងនឹកដល់ភាពសម្បូរបែបនៃមច្ឆាជាតិ ក្នុងបឹងទឹកសាបធំបំផុតរបស់កម្ពុជា។ ដូច្នេះការដាំកូនឈើក្នុងតំបន់ព្រៃលិចទឹកនាពេលនេះ ជាការធ្វើឲ្យប្រសើរឡើងវិញនូវជម្រកសម្រាប់មច្ឆាជាតិគ្រប់ប្រភេទនៅក្នុងបឹងទន្លេសាប។
លោកអភិបាលរងខេត្ត បង្ហាញថា តាមការសិក្សា ក្នុងមួយឆ្នាំៗ ត្រីនៅផ្នែកខាងលើនៃទន្លេមេគង្គ ដូចជា ខេត្តស្ទឹងត្រែង ខេត្តក្រចេះ និងនៅផ្នែកខ្លះនៃប្រទេសឡាវជាដើម បានផ្តល់កូនត្រីប្រមាណជា២០០ពាន់លានកូន ប៉ុន្តែកូនត្រីទាំងនោះបានងាប់ទៅវិញដោយកត្តាធម្មជាតិអស់ដល់ទៅ៩៩ភាគរយ។ លោក បានអំពាវនាវ ដល់ប្រជាពលរដ្ឋ សូមបញ្ឈប់សកម្មភាពកាប់រានដីព្រៃលិចទឹក និងការធ្វើនេសាទខុសច្បាប់ ដែលនាំឲ្យហិនហោចដល់ពូជត្រី ហើយត្រូវរួមគ្នាការពារធនធានធម្មជាតិទាំងនោះឲ្យមានភាពសម្បូរបែបឡើងវិញ។
មានប្រសាសន៍ក្នុងឱកាសនោះ ឯកឧត្តម សេន ណាស៊ី អនុរដ្ឋលេខាធិការក្រសួងបរិស្ថាន លើកឡើងថា បន្ទាប់ពីរាជរដ្ឋាភិបាលកម្ពុជា បើកយុទ្ធនាការបង្ក្រាបការទន្ទ្រានដីព្រៃលិចទឹក ក្នុងតំបន់បីនៃបឹងទន្លេសាប កាលពីចុងឆ្នាំ២០២១រហូតមកដល់ពេលនេះ ក្រសួងបរិស្ថាន រួមជាមួយភាគីពាក់ព័ន្ធទាំងអស់ បានធ្វើការដាំដុះកូនឈើឡើងវិញនៅតាមបណ្តាខេត្តទាំង៦ មានភូមិសាស្ត្រជាប់នឹងបឹងទន្លេសាបជាបន្តបន្ទាប់។
ឯកឧត្តម សេន ណាស៊ី បញ្ជាក់ថា សម្រាប់ខេត្តសៀមរាប ក្នុងយុទ្ធនាការបង្ក្រាបការទន្ទ្រានដីព្រៃលិចទឹកក្នុងតំបន់បីនៃក្នុងទន្លេសាប អាជ្ញាធរខេត្ត បានធ្វើការបង្ក្រាប និងដកហូតដីត្រឡប់មកវិញបានប្រមាណជា៣២០០ហិកតា។ បន្ទាប់ពីធ្វើការដកហូត ក្រសួងបរិស្ថាន និងភាគីពាក់ព័ន្ធ ក៏បានធ្វើការដាំកូនឈើលើផ្ទៃដីព្រៃលិចទឹកបានចំនួន ៥ហិកតារួចមកហើយ សម្រាប់ពេលនេះជាការដាំ ៣៥ហិកតាបន្ថែមទៀត។ ចំពោះផ្ទៃដីដែលនៅសេសសល់ ក្រសួងបរិស្ថាន និងសហការជាមួយអាជ្ញាធរគ្រប់ជាន់ថ្នាក់ និងភាគីពាក់ព័ន្ធនានាបន្តដាំដុះបន្ថែមទៀត ។
សូមជម្រាបថា នាពេលកន្លងមក ក្រសួងបរិស្ថាន បានធ្វើការដាំដុះកូនឈើឡើងវិញ ទាំងនៅលើតំបន់គោក និងទាំងតំបន់លិចទឹក បានជាច្រើនម៉ឺនដើម។ សម្រាប់កូនឈើ ដែលបាននាំយកមកដាំនាពេលនេះ រួមមាន ដើមម្តេញ ៥ពាន់ដើម ដើមសណ្តាន់៥ពាន់ដើម និងដើមរាំង៥ពាន់ដើម។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
