នៅថ្ងៃទី៦ ខែឧសភា ឆ្នាំ២០២២នេះ លោក គង់ សំអឿន ត្រូវបានប្រកាសចូលកាន់មុខតំណែងជាប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តសៀមរាប ជំនួសលោក អោ ម៉ៅ ដែលត្រូវបានផ្ទេរភារកិច្ចទៅបម្រើការងារនៅទីស្តីការក្រសួងសង្គមកិច្ចអតីតយុទ្ធជន និងយុវនីតិសម្បទាវិញ។
ពិធីប្រកាសផ្ទេរមុខតំណែងនេះ បានប្រព្រឹត្តិទៅនៅសាលាខេត្តសៀមរាប ក្រោមអធិបតីភាព ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀសីហា អភិបាលខេត្ត និងមានការអញ្ជើញចូលរួម ពីសមាជិកក្រុមប្រឹក្សាខេត្ត អភិបាលរងខេត្ត ព្រមទាំមន្ទីរ អង្គភាព រដ្ឋបាលក្រុង ស្រុកជាច្រើននាក់ផងដែរ។
ថ្លែងក្នុងឱកាសនោះ ឯកឧត្តម ទៀ សីហា លើកឡើងថា ការប្រកាសចូលកាន់មុខតំណែងនាពេលនេះ គឺជាការប្រគល់ភារកិច្ច និងការទទួលខុសត្រូវថែមទៀត ដែលតម្រូវឱ្យសាមីខ្លួនត្រូវតែបញ្ចេញឱ្យអស់នូវសមត្ថភាព លទ្ធភាព និងទេពកោសល្យ ដើម្បីសម្រេចបានលទ្ធផលសំខាន់ៗនាពេលខាងមុខ។ ដច្នេះថ្នាក់ដឹកនាំ និងមន្រ្តីក្រោមឱវាទ ត្រូវសហការគ្នា សំដៅធានាបាននូវភារកិច្ចស្នូលទាំងឡាយ ដែលអង្គភាពត្រូវបំពេញ និងទទួលខុសត្រូវចំពោះមុខស្ថាប័ន និងភារកិច្ចទាំងឡាយផ្សេងៗទៀត ទៅតាមការចាំបាច់ ដែលរដ្ឋបាលខេត្តប្រគល់ជូន។
ព័ត៌មានជាតិ ថ្មីៗ
ឯកឧត្តមអភិបាលខេត្ត ក៏បានថ្លែងកោតសរសើរដល់ អតីតប្រធានមន្ទីរសង្គមកិច្ច អតីតយុទ្ធជន និងយុវនីតិ-សម្បទា ដែលក្នុងរយៈពេលកន្លងមក បានខិតខំប្រឹងប្រែងបំពេញនូវតួនាទី និងភារកិច្ចប្រកបដោយការទទួលខុសត្រូវតាមជំនាញវិជ្ជាជីវៈ ព្រមទាំងលះបង់កម្លាំងកាយចិត្ត រហូតសម្រេចបានសមិទ្ធផលគួរជាទីមោទនៈដូចសព្វថ្ងៃនេះ។
មានមតិសំណេះសំណាលក្នុងអង្គពិធី ឯកឧត្តម វង សូត បានលើកឡើងថា មន្ត្រីរាជការគ្រប់លំដាប់ថ្នាក់ តែងតែធ្វើការផ្លាស់ប្តូរភារកិច្ច តាមតម្រូវការការងារជាក់ស្តែង របស់ក្រសួង និងរដ្ឋបាលខេត្តនីមួយៗ។ ទន្ទឹមនោះ សម្រាប់លោកប្រធានមន្ទីរថ្មីដែលទើបចូលកាន់តំណែង ត្រូវឈរលើគោលការណ៍ភាពជាអ្នកដឹកនាំ រក្សាឱ្យបាននូវស្មារតីសាមគ្គីភាពផ្ទៃក្នុង យកចិត្តទុកដាក់ ដឹងសុខទុក្ខរបស់មន្ត្រីក្រោមឱវាទឱ្យមានសុខដុមរមនាជាមួយគ្នា និងមានការខុសត្រូវខ្ពស់លើតួនាទីភារកិច្ច។ បន្ថែមពីលើនេះ ត្រូវមានទំនាក់ទំនងល្អ និងសហការជិតស្និទ្ឋជាមួយបណ្តាមន្ទីរ អង្គភាព ស្ថាប័ននានា ក្នុងខេត្តឱ្យបានល្អជាប្រចាំ និងត្រូវអនុវត្ត គោរពតាមគោលការណ៍ណែនាំពីថ្នាក់ដឹកនាំអាជ្ញាធរខេត្ត ឬក្រសួង ដើម្បីឱ្យចរន្តការងារស្នូលក្នុងអង្គភាព ទទួលបានលទ្ឋផលល្អទាំងអស់គ្នា។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី ក៏បានបង្ហាញពី គោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ នាយករដ្ឋមន្ត្រី ដែលបាននាំមកនូវសុខសន្តិភាព និងស្ថេរភាពនយោបាយពេញលេញជូនសង្គមជាតិ ជាមួយគ្នានេះ យន្តការការងាររបស់វិស័យសង្គមកិច្ច ក៏កំពុងតែធ្វើសមាហរណកម្មបន្ថែម នូវភារកិច្ចមួយចំនួនទៀត ពាក់ព័ន្ឋទៅនឹងមូលនិធិជាតិជំនួយសង្គម។ ហេតុនេះ ឯកឧត្តមរដ្ឋមន្ត្រី សូមស្នើដល់ថ្នាក់ដឹកនាំ មន្ទីរអង្គភាព និងអាជ្ញាធរមូលដ្ឋានគ្រប់ថ្នាក់គ្រប់ផ្នែកពាក់ព័ន្ឋទាំងអស់ រួមចំណែកអនុវត្តន៍ជាមួយវិស័យសង្គមកិច្ចឱ្យបានផុលផុស ដើម្បីផលប្រយោជន៍របស់បងប្អូនប្រជាពលរដ្ឋទាំងអស់គ្នា។
អត្ថបទ និងរូបភាព៖ លោក យូវង្ស
កែសម្រួល៖ លោក សេង ផល្លី
