គិតត្រឹមខែមករា ដល់ខែមេសា ឆ្នាំ២០២២នេះ ភ្ញៀវទេសចរជិត ២លាននាក់ (១ ៨១៥ ៨៦៧ នាក់)បានមកធ្វើដំណើរកម្សាន្តក្នុងខេត្តសៀមរាប និងទស្សនាតាមប្រាង្គប្រាសាទនានាក្នុងតំបន់រមណីយដ្ឋានអង្គរ ក្នុងនោះទេសចរអន្ដរជាតិមានជាង ៣ម៉ឺននាក់ នេះបើតាមការឱ្យដឹងពីលោក សេង សុធារ៉ា អនុប្រធាននាយកដ្ឋាន អភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរា នៅថ្ងៃទី៥ ខែឧសភា ឆ្នាំ២០២២។
លោក សេង សុធារ៉ា បន្ថែមថា ការងើបឡើងនៃវិស័យទេសចរណ៍ក្នុងខេត្តសៀមរាបនេះ គឺក្រោយពេលរាជរដ្ឋាភិបាលបើកឱ្យដំណើរការទេសចរណ៍ឡើងវិញនាពេលកន្លងមក ជាមួយនឹងវិធានការទប់ស្កាត់ជំងឺកូវីដ-១៩ ដ៏មានប្រសិទ្ធរបស់រាជរដ្ឋបាលភិបាល អាជ្ញាធរខេត្ត និងភាគីពាក់ព័ន្ធ ជាពិសេសគឺការចាក់វ៉ាក់សាំងដល់ប្រជាពលរដ្ឋ និងកុមារក្នុងទូទាំងខេត្ត សម្រាប់ដូសមូលដ្ឋាន និងដូសជំរុញបានយ៉ាងលើសលប់។ លើសពីនោះ ការរៀបចំកែលម្អសោភណ្ឌភាព នៅក្នុងតំបន់រមណីដ្ឋានអង្គរ មានភាពស្រស់បំព្រង រួមនិងសមិទ្ធផលហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាប បានទាក់ទាញឱ្យភ្ញៀវទេសចរជាតិ និងអន្តរជាតិចង់មកទស្សនា ជាពិសេសនេះ នៅក្នុងពិធីចូលឆ្នាំខ្មែរ ពិធីចូលឆ្នាំចិន វៀតណា និងថ្ងៃឈប់សម្រាកជាដើម។
បើតាមការលើកឡើងពី លោក ស៊ិន ពិសី អនុប្រធាននារកដ្ឋានសណ្ដាប់ធ្នាប់ និងសហប្រតិបត្ដិការនៃអាជ្ញាធរជាតិអប្សរា បង្ហាញថា ការរក្សាសន្តិសុខ សណ្ដាប់ធ្នាប់ ក្នុងតំបន់រមណីដ្ឋានអង្គរជូនភ្ញៀវទេសចរ ក៏បានធ្វើឱ្យពួកគេមានទំនុកចិត្ត ក្នុងការធ្វើដំណើរទៅតាមទីតាំងនានាផងដែរ។ ជាក់ស្ដែង បុគ្គលិកអាជ្ញាធរជាតិអប្សរា បានសហការជាមួយ សមត្ថកិច្ចពាក់ព័ន្ធ ទទួល រក្សាទុក និងប្រគល់សម្ភារៈដែលភ្ញៀវទេសចរបានភ្លេច ឬជ្រុះបាត់ ទៅដល់ម្ចាស់ដើមវិញជាច្រើនករណី។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
