ក្រសួងមហាផ្ទៃកម្ពុជា សហការជាមួយដៃគូពាក់ព័ន្ធ បានប្រកាសជាផ្លូវការអំពីការប្រើប្រាស់កម្មវិធីមតិយើង ដែលជាកម្មវិធីមួយនៅលើទូរស័ព្ទដៃសម្រាប់ទទួលព័ត៌មានត្រលប់ពីប្រជាពលរដ្ឋអំពីការផ្តល់សេវាសាធារណ:នៅថ្នាក់ក្រោមជាតិ។
ការប្រកាសនេះ បានធ្វើឡើងនៅសាលប្រជុំធំរដ្ឋបាលខេត្តសៀមរាប នាព្រឹកថ្ងៃទី១២ ខែឧសភា ឆ្នាំ២០២២។
លោកតូច ថុន អនុប្រធាននាយកដ្ឋានមុខងារ និងធនធានក្រសួងមហាផ្ទៃ បានលើកឡើងថា ក្រសួងមហាផ្ទៃ តែងតែយកចិត្តទុកដាក់ពង្រឹងពង្រីកភាពជាដៃកូជាមួយអង្គការសង្គមស៊ីវិល និងដៃគូអភិវឌ្ឍន៍នានា ដើម្បីរួមចំណែកនៅក្នុងការអនុវត្តកម្មវិធីកំណែទម្រង់ ដែលបានដាក់ចេញដោយរាជរដ្ឋាភិបាល។ ជាក់ស្តែង កន្លងទៅថ្មីៗក្រសួងមហាផ្ទៃ ក៏បានដាក់ចេញឲ្យដំណើរការនូវប្រព័ន្ធបច្ចេកវិទ្យាសម្រាប់អង្គភាពច្រកចេញចូលតែមួយ ដែលជាយន្តការមួយជួយពង្រឹងការតាមដានលើការផ្តល់សេវាសាធារណ: ប្រកបដោយតម្លាភាព និងគណនេយ្យភាព ។ លោកបន្តថា ជាមួយគ្នានេះ ក្រសួងក៏បានរៀបចំផលិតជាកម្មវិធីលើទូរស័ព្ទដៃ សម្រាប់ទទួលព័ត៌មានត្រលប់ពីប្រជាពលរដ្ឋអំពីការផ្តល់សេវាសាធារណ:នៅថ្នាក់ក្រោមជាតិ ដោយមានកិច្ចសហការជាមួយអង្គការតម្លាភាពកម្ពុជា ដោយបានដាក់ឲ្យសាកល្បងនៅតាមការិយាល័យប្រជាពលរដ្ឋចំនួន ១១គោលដៅ ព្រមទាំងដាក់ឲ្យប្រើប្រាស់ជាផ្លូវការនៅខេត្តសៀមរាបនាពេលនេះ។
លោក តូច ថុន បន្តថា តាមរយ:ការដាក់ឲ្យប្រើប្រាស់ជាផ្លូវការនូវកម្មវិធីនេះ វានឹងចូលរួមចំណែកជាមួយមធ្យោបាយទទួលពាក្យបណ្តឹង និងព័ត៌មានផ្សេងៗដែលមានស្រាប់នៅក្នុងការលើកកម្ពស់ និងកែលម្អការផ្តល់សេវារបស់រដ្ឋបាលថ្នាក់ក្រោមជាតិ ព្រមទាំងបង្កលក្ខណ:ងាយស្រួលដល់ប្រជាពលរដ្ឋនៅក្នុងការដាក់ពាក្យបណ្តឹងពាក់ព័ន្ធនឹងការផ្តល់សេវាជាដើម។
ការបង្កើតកម្មវិធីទូរស័ព្ទដៃនេះ ត្រូវបានមន្ត្រីអ្នកពាក់ព័ន្ធនានា មើលឃើញថា វាពិតជាងាយស្រួលសម្រាប់ពលរដ្ឋនៅទីប្រជុំជន និងយុវជនដែលមានចំណេះដឹង ប៉ុន្តែវាអាចផ្តល់នូវការលំបាកដល់ពលរដ្ឋនៅតាមទីជនបទ។
ព័ត៌មានជាតិ ថ្មីៗ
សមាជិកក្រុមប្រឹក្សាខេត្តសៀមរាប លោក សួស សុខចាន់ នៅក្នុងពិធីបើកឲ្យប្រើប្រាស់ជាផ្លូវការនូវកម្មវិធីទូរស័ព្ទដៃសម្រាប់ទទួលព័ត៌មានត្រលប់ពីប្រជាពលរដ្ឋអំពីការផ្តល់សេវាសាធារណ:ថ្នាក់ក្រោមជាតិនេះ បានទទូចសុំឲ្យមានការចុះផ្សព្វផ្សាយនូវរបៀបប្រើប្រាស់កម្មវិធីនេះ ដល់ប្រជាពលរដ្ឋនៅតាមទីជនបទឲ្យបានទូលំទូលាយបន្ថែមទៀត ដើម្បីបង្កលក្ខណ:ងាយស្រួលដល់ប្រជាពលរដ្ឋនៅតាមទីជនបទ ទទួលបានពីអត្ថប្រយោជន៍នេះ។ លោកថា “ខ្ញុំបានពិនិត្យឃើញថា កម្មវិធីនេះមានលក្ខណ:ល្អ ដែលធ្វើឲ្យប្រជាពលរដ្ឋលោកប្រើប្រាស់សេវា លោកហ៊ានបញ្ចេញមតិ លោកហ៊ានប្តឹងផ្តល់ ទៅថ្នាក់ដឹកនាំនៅថ្នាក់ជាតិ នូវបញ្ហាណាដែលពួកគាត់កើតមានប្រឈម និងស្វែងរកដំណោះស្រាយ៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
