លោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បានឲ្យដឹងថា នៅវេលាម៉ោង២១និង៣០នាទី កាលពីថ្ងៃទី០៧ ខែមីនា ឆ្នាំ២០១៩នេះ ជំនាញបាន ធ្វើការឃាត់ខ្លួនបានថៅកែហាងម៉ាស្សា ឈ្មោះ ឡុច ស្រ៊ុន ភេទប្រុស អាយុ៤៨ឆ្នាំ នៅភូមិតាវៀន សង្កាត់សាលាកំរើក ក្រុងសៀមរាប តាមបញ្ជាលោក កើត វណ្ណារេត ព្រះរាជអជ្ញាអមសាលាដំបូងខេត្តសៀមរាប សង្គ្រោះស្ត្រីរកស៊ីផ្លូវភេទបានចំនួន៥នាក់ ក្នុងនោះមានស្រីជាអនីតិជនចំនួន២នាក់ និងធ្វើការឆែករកឃើញស្រោមអនាម័យប្រើប្រាស់រួចគ្រប់បន្ទប់ ។
លោកវរសេនីយ៍ឯក ជា ហេង បានឲ្យដឹងទៀតថា ការឃាត់ខ្លួននេះ បានកើតឡើងក្នុងប្រតិបត្តិការមួយ ដែលកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន បានចុះបង្ក្រាបកន្លែងរកស៊ីសេវាផ្លូវភេទ ជ្រកក្រោមផ្លាកម៉ាស្សាមួយកន្លែងយីហោ ចាន់ សៀងហៃ ស្ថិតនៅភូមិតាវៀន សង្កាត់សាលាកំរើក ក្រុងសៀមរាប ហើយក្រោយពីការឃាត់ខ្លួនថៅកែម៉ាស្សារួចមក កម្លាំងជំនាញបានរៀបចំបញ្ជូនស្ត្រីរកស៊ីផ្លូវភេទទាំង៥នាក់ ទៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ដើម្បីអប់រំកែប្រែ និងផ្តល់ជំនាញផ្សេងៗដែលពួកគាត់អាចទទួលយកបាន ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
