លោក ស៊ិន កុសល្យ នាយរងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានមានប្រសាសន៍ថា មកទល់ពេលនេះ សមត្ថកិច្ចកំពុងមានវិធានការក្តៅ លើម្ចាស់ទីតាំងដែលបានជួល ឬឱ្យខ្ចីម៉ូតូ ដល់ភ្ញៀវទេសចរបរទេសជិះកំសាន្ត ដោយត្រឹមរយៈពេល០៦ថ្ងៃក្នុងខែមីនា ឆ្នាំ២០១៩នេះ កម្លាំងនគរបាល បានឃាត់ទុកម៉ូតូ បានចំនួន០៩គ្រឿង បញ្ចូនទៅស្នងការដ្ឋាននគរបាលខេត្តសៀមរាប ដើម្បីឱ្យម្ចាស់អាជីវកម្មជួល ឬឱ្យខ្ចីម៉ូតូចូលមកដោះស្រាយ ខណៈកាលពីចុងឆ្នាំ២០១៨ បានឃាត់ទុកម៉ូតូបានចំនួន៣០គ្រឿង ឱ្យម្ចាស់អាជីវកម្ម ធ្វើកិច្ចសន្យាបញ្ឈប់ការជួល ឬឱ្យខ្ចីបន្តទៀត ហើយបច្ចុប្បន្ននេះ កម្លាំងសមត្ថកិច្ច តែងតែចុះត្រួតពិនិត្យ មិនឱ្យមានការជួលម៉ូតូ ដល់ភ្ញៀវទេសចរបរទេសនោះទេ ប៉ុន្តែនៅតែមានជនខិលខូច លួចជួលដោយជ្រកក្រោមរូបភាពផ្សេងៗ ។
លោក ស៊ិន កុសល្យ បានឱ្យដឹងទៀតថា ការចាត់វិធានការក្តៅបែបនេះ គឺដោយសារកន្លងមក ចំនួនគ្រោះថ្នាក់ចរាចរណ៍ដែលបង្កឡើងដោយជនបរទេសមានការកើនឡើងជាលំដាប់ ដោយពួកគាត់មិនទាន់យល់ដឹងពីច្បាប់ចរាចរណ៍ក្នុងប្រទេសកម្ពុជាបានច្បាស់លាស់ ដូច្នេះតាមរយៈ សូមអំពាវនាវដល់ម្ចាស់ក្រុមហ៊ុនដឹកជញ្ចូនអ្នកដំណើរ ទីភ្នាក់ងារទេសចរណ៍ ម្ចាស់សណ្ឋាគារ ផ្ទះសំណាក់ ភោជនីយដ្ឋាន និងប្រជាពលរដ្ឋទាំងអស់ក្នុងខេត្តសៀមរាប ត្រូវបញ្ឈប់ជាបន្ទាន់ នូវការជួល ឱ្យខ្ចី ឬផ្តល់មធ្យោបាយធ្វើដំណើរដល់ភ្ញៀវទេសចរបរទេស បើមិនដូច្នេះទេ អាចប្រឈមការមានទោស និងផ្អាកការធ្វើអាជីវកម្មជាដើម ជាពិសេស សូមឱ្យសាធារណជនទាំងអស់ ត្រូវរាយការណ៍មកសមត្ថកិច្ច ប្រសិនបើឃើញមានទីតាំងជួលម៉ូតូ រថយន្ត ឬឃើញភ្ញៀវទេសចរបរទេសបើកបរម៉ូតូ ។
លោក ស៊ិន កុសល្យ មានប្រសាសន៍បែបនេះ ក្នុងឱកាសកិច្ចសម្ភាសន៍ជាមួយអ្នកយកព័ត៌មាន របស់មន្ទីរព័ត៌មានខេត្តសៀមរាប កាលពីរសៀលថ្ងៃទី០៨ ខែមីនា ឆ្នាំ ២០១៩ម្សិលមិញនេះ ។
គួរំលឹកថា កន្លងមក អាជ្ញាធរខេត្តសៀមរាប បានណែនាំដល់ម្ចាស់អាជីវកម្មជួល-ឱ្យខ្ចី ឬផ្តល់មធ្យាបាយធ្វើដំណើរគ្រប់ប្រភេទ ឱ្យទៅជនបរទេសធ្វើចរាចរណ៍ ត្រូវប្រឈមមុខចំពោះច្បាប់ ក្នុងករណីមានបញ្ហាកើតឡើងដោយយថាហេតុ ពិសេស ហាមដាច់ខាតការជួល-ការឲ្យខ្ចី ឬផ្តល់មធ្យោបាយធ្វើដំណើរដូចជាម៉ូតូ និងរថយន្តគ្រប់ប្រភេទឲ្យទៅជនបរទេសដែលមកលក្ខណៈជាដំណើរកំសាន្ត និងទេសចរ បើកបរដោយខ្លួនឯងឡើយ លើកលែងតែកង់និងកង់អគ្គិសនី ហើយក្នុងករណីបុគ្គល ឬម្ចាស់អាជីវកម្មជួល-ការឲ្យខ្ចីឬផ្តល់មធ្យោបាយធ្វើដំណើរគ្រប់ប្រភេទបន្តជួល ឬផ្តល់ឲ្យទៅជនបរទេសដែលមកលក្ខណៈជាដំណើរកំសាន្ត និងទេសចរ អាជ្ញាធរមានសមត្ថកិច្ច នឹងចាត់វិធានការច្បាប់និងផ្អាកទីតាំងបណ្តោះអាសន្ន ឬបិទជាស្ថាពរ ។
ភ្ញៀវទេសចរបរទេស និងជនបរទេស ដែលកំពុងបំពេញបេសកកម្មការងារក្នុងសមាគម ឬអង្គការមិនមែនរដ្ឋាភិបាល និងកំពុងប្រកបអាជីវកម្មនៅក្នុងខេត្តសៀមរាប ដែលប្រើប្រាស់យានយន្តមានទំហំស៊ីឡាំងក្រោម១២៥សង់ទីម៉ែត្រគូប ឬមានថាមពលអគ្គិសនីមិនលើសពី១១គីឡូវ៉ាត់ អ្នកបើកបរ មិនតម្រូវឲ្យមានប័ណ្ណបើកបរឡើយ ហើយគ្រប់យានយន្តទាំងអស់ដែលឲ្យខ្ចី ឬជួសឲ្យជនបរទេសបើកបរ ត្រូវមានពាក់ស្លាកលេខសម្គាល់យានយន្ត និងបំពេញបែបបទផ្សេងៗ ស្របតាមច្បាប់ស្តីពីចរាចរណ៍ផ្លូវគោកបានកំណត់ ៕
អត្ថបទ និង រូបថត ៖ លោក បុង ឆវ័ន
កែសម្រួលអត្ថបទ ៖ លោក លីវ សាន្ត
