ក្នុងឱកាសខួបអនុស្សាវរីយ៍លើកទី១០៨ នៃទិវាអន្តរនារីជាតិ ០៨មីនា នេះ កាលពីរសៀលថ្ងៃទី០៨ ខែមីនា ឆ្នាំ២០១៩ ម្សិលមិញនេះ ឯកឧត្តម ទៀ សីហា អភិបាលខេត្តសៀមរាប និងជាតំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប បានដឹកនាំប្រតិភូជាថ្នាក់ដឹកនាំមន្ទីរ អង្គភាពនានាក្នុងខេត្ត ចុះសាកសួរសុខទុក្ខបងប្អូនយោធិនពិការ នៅមជ្ឈមណ្ឌល អភិវឌ្ឍន៍យោធិនពិការសម្ដេចតេជោ ហ៊ុន សែន គូលេន ៣១៧ ខេត្តសៀមរាប និង សាកសួរសុខទុក្ខក្មួយៗសិស្សានុសិស្ស ព្រះសង្ឃ តាជីយាយជី ព្រមទាំងអ្នកជំងឺ កំពុងសម្រាកព្យាបាល នៅក្នុងមជ្ឈមណ្ឌលអភិវឌ្ឍន៍យោធិនពិការផងដែរ ។
បើតាមសេចក្ដីរាយការណ៍របស់ឯកឧត្ដមឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលេន៣១៧ ខេត្តសៀមរាប បានឲ្យដឹងថា ចាប់តាំងពីថ្ងៃទី០៩ ខែកក្កដា ឆ្នាំ២០១០ រហូតមកដល់ ថ្ងៃនេះ មានរយៈពេល០៨ឆ្នាំ០៨ខែហើយ ដែលបងប្អូនយោធិនពិការ បានចូលមករស់នៅក្នុងមជ្ឈមណ្ឌល ខណៈបច្ចុប្បន្នមាន២៧០គ្រួសារ ក្នុងនោះយោធិនពិការសរុបចំនួន២៤៥គ្រួសារ និងមានសមាជិកសរុប ១.២៧០នាក់ ក្នុងនោះស្ត្រី៦១៤នាក់ , មានគ្រូបង្រៀនស្ម័គ្រចិត្តចំនួន២៣គ្រួសារ , ពេទ្យឆ្មបស្ម័គ្រចិត្ត២គ្រួសារ និងព្រះសង្ឃគង់នៅវត្តព្រះខ័នសែនជ័ន ចំនួន៥អង្គ មានសិស្សានុសិស្សពីថ្នាក់បឋមដល់ថ្នាក់វិទ្យាល័យសរុបចំនួន៥៨០នាក់។
ឯកឧត្ដម ពៅ ស៊ា បានឲ្យដឹងទៀតថា សម្រាប់បងប្អូនយោធិនពិការ លោកគ្រូអ្នកគ្រូ និងពេទ្យឆ្មបស្ម័គ្រចិត្ត ដែលក្នុងរយៈពេលកន្លងមកនេះ ក្នុងមួយគ្រួសារៗ សុទ្ធសឹងបានទទួលនូវរបបគោលនយោបាយដូចៗគ្នា ពីប្រមុខរាជរដ្ឋាភិបាល នូវដីចំនួន០១ហិតាកន្លះ និង លំនៅដ្ឋាន ០១ខ្នង សម្រាប់ស្នាក់នៅនិងបង្កបង្កើនផល ហើយដោយបានការយកចិត្តទុកដាក់ឧបត្ថមជាបន្តបន្ទាប់ពីសម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានធ្វើឲ្យបងប្អូនយោធិនពិការ និងគ្រួសារ មានលំនឹងលើផ្នែកជីវភាពរស់នៅ បានល្អប្រសើរហូតមកដល់សព្វថ្ងៃនេះ។
មានប្រសាសន៍សំណេះសំណាលក្នុងឱកាសនោះ ឯកឧត្តម ទៀ សីហា បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសម្តេចពិជ័យសេនា ទៀ បាញ់ ជូនដល់បងប្អូនយោធិនពិការ និងបងប្អូនបានមករស់នៅក្នុងមជ្ឈមណ្ឌលអភិវឌ្ឍន៍យោធិនពិការទាំងអស់ សម្រាប់ក្នុងឱកាសបុណ្យចូលឆ្នាំប្រពៃណីជាតិខ្មែរនាពេល ខាងមុខនេះ ពិសេសដូមផ្តាំផ្ញើដល់បងប្អូនយោធិនពិការ និងអាជ្ញាធរមូលដ្ឋាន ចូលរួមទប់ស្កាត់បញ្ហាគ្រឿងញៀន ដែលកំពុងរីករាលដាលពីទីក្រុងមកដល់ជនបទ ហើយនៅតាមជនបទ ងាយស្រួលឲ្យពួកគេ ធ្វើចរាចរណ៍លក់ដូរ និងប្រើប្រាស់គ្រឿងញៀនខុសច្បាប់ ហើយបើឃើញមានការធ្វើចរាចរគ្រឿងញៀន សូមរួសរាន់រាយការណ៍ទៅសមត្ថកិច្ច ឬថ្នាក់ដឹកនាំអង្គភាព ដើម្បីចាត់វិធានការណ៍បន្ទាន់ ។
ឯកឧត្តម ទៀ សីហា មានប្រសាសន៍ទៀតថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តែងតែគិតដល់សុខទុក្ខបងប្អូនជាយោធិន និងប្រជាពលរដ្ឋទាំងអស់ ដោយមិនបោះបង់អ្នកណាម្នាក់ឡើយ ជាពិសេសបងប្អូនពិការនៅទីនេះ សុទ្ឋតែមានគុណបំណាច់ និងស្នាដៃយ៉ាងធំធេងក្នុងបុព្វហេតុចូលរួមប្រយុទ្ឋការពារ និងកសាងជាតិមាតុភូមិក្នុងរយៈពេលកន្លងមក ដូច្នេះក្នុងនាមជាយុវជនជំនាន់ក្រោយ សូមគោរពនូវការកោតសរសើរដោយស្មោះស្ម័គ្របំផុត និងចងចាំជាប់ជានិច្ចជារៀងរហូត ។
ក្នុងឱកាសនោះដែរ ឯកឧត្តម ទៀ សីហា បាននាំយកអំណោយរបស់សម្តេចពិជ័យសេនា ទៀ បាញ់ ចែកជូនដល់បងប្អូនយោធិនពិការ លោកគ្រូអ្នកគ្រូ គ្រូពេទ្យស្ម័កចិត្ត សរុបចំនួន២៧៥នាក់ ដែលក្នុងម្នាក់ៗទទួលបានថវិកា ៣ម៉ឺនរៀលនិងឃីដមួយកញ្ចប់ , សិស្សានុសិស្សចំនួន ៥៨០នាក់ ក្នុងម្នាក់ៗទទួលបានថវិកា៥ពាន់រៀល , សៀវភៅពីរក្បាល និងប៊ិចមួយដើម , ព្រះសង្ឃចំនួន៥អង្គ ក្នុងមួយអង្គៗ ប្រគេនជូនស្លាដក់១កញ្ចប់ និងបច្ច័យចំនួន៥ម៉ឺនរៀល , តាជីយាយជី ចំនួន១៧នាក់ ដែលក្នុងម្នាក់ៗទទួលបានសំពត់ស ១ដុំ និង១ម៉ឺនរៀល និងបានជូនអង្ករ៥០០គីឡូក្រាម ត្រីខកំប៉ុង២ កេស , ម៊ី៥កេស , អំបិល៥០គីឡូ , ស្ករស២០ គីឡូក្រាម , ទឹកដោះគោ២០កំប៉ុង , ទឹកក្រូច២កេស និងតែ២គីឡូក្រាម សម្រាប់ប្រើប្រាស់ក្នុងពិធីបុណ្យចូលឆ្នាំ ព្រមទាំងអង្គរ៥តោននិងថវិកាមួយចំនួន សម្រាប់ប្រើប្រាស់ក្នុងមជ្ឈមណ្ឌល និង អ្នកសម្រាកព្យាបាលជំងឺចំនួន១៥នាក់ ក្នុងម្នាក់ទទួលបានថវិកា៥ម៉ឺនរៀល និងឃីដមួយកញ្ចប់៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
