សមត្ថកិច្ចនគរបាលស្រុកពួក បានឲ្យដឹងថា វេលាម៉ោង ០១និង១៥នាទីរសៀល ថ្ងៃទី១០ ខែមីនា ឆ្នាំ២០១៩ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តបុកម៉ូតូ លើផ្លូវជាតិលេខ៦ ត្រង់ចំណុចភ្លើងស្តុប មុខផ្សារពួក ក្បែររូបសំណាកយាយកាន់កណ្តៀវ ស្ថិតក្នុងភូមិអូរតាប្រាក់ ឃុំពួក ស្រុកពួក បណ្ដាលឲ្យមនុស្សម្នាក់បានស្លាប់ភ្លាមៗនៅកន្លែងកើតហេតុ ។
សមត្ថកិច្ចនគរបាល បានឲ្យដឹងទៀតថា ហេតុការណ៍នេះ គឺរថយន្តម៉ាកIsuzu ព៌ណស ពាក់ស្លាកលេខ សៀមរាប 3A – 1758 បើកបរដោយជនមិនស្គាល់អត្តសញ្ញាណ ដោយជនបង្កបានរត់គេចខ្លួន។ គ្រោះថ្នាក់នេះ អ្នកបើកបររថយន្តបើកបរក្នុងទិសដៅពីកើតទៅលិច ហើយមកដល់ចំណុចភ្លើងស្តុប បានបត់ស្តាំដោយខ្វះការប្រុងប្រយ័ត្ន ហើយបានបុកម៉ូតូម៉ាកហុងដាឌ្រីម ផលិតឆ្នាំ2007 ពណ៌ ខ្មៅ ពាក់ស្លាកលេខ សៀមរាប 1A-9427 បើកបរដោយឈ្មោះ សាន់ សាមឿយ ភេទស្រី អាយុ៣២ឆ្នាំ ស្លាប់នៅកន្លែងកើតហេតុ រស់នៅភូមិគោកថ្មី ឃុំពួក ស្រុកពួក បើកបរក្នុងទិសដៅពីកើតទៅលិច ហើយបត់ស្តាំស្របគ្នាជាមួយនឹងរថយន្ត ។
ក្រោយពេលកើតហេតុកម្លាំងនគរបាលជំនាញបានចុះវាស់វែងកន្លែងកើតហេតុ ដើម្បីកសាងសំណុំរឿង និងដកហូតវត្ថុតាងពាក់ព័ន្ធមានរថយន្ត និង ម៉ូតូ ដែលខូចខាតស្រាលដូចគ្នា យកមករក្សាទុកនៅអធិការដ្ឋាននគរបាលស្រុក រីឯសាកសពជនរងគ្រោះ ត្រូវបានប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
