សមត្ថកិច្ចនគរបាលខេត្តសៀមរាប បានឲ្យដឹងថា បន្ទាប់ពីទទួលបានព័ត៌មានពីបងប្អូនប្រជាពលរដ្ឋមកថា កាលពីវេលាម៉ោង១២និង៣០នាទី ថ្ងៃទី១០ ខែមីនា ឆ្នាំ២០១៩ម្សិលមិញនេះ មានអគ្គីភ័យបានកើតឡើង ដែលឆេះព្រៃនៅខាងកើតព្រលានអន្តរជាតិសៀមរាប ស្ថិតក្នុងភូមិខ្វៀន សង្កាត់គោកចក ក្រុងសៀមរាប កម្លាំងនគរបាលប៉ុស្ដិ៍រដ្ឋបាលសង្កាត់គោកចក និងកម្លាំងប្រជាការពារ ដឹកនាំដោយលោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប និង ដោយមានការចូលរួមពីបងប្អូនប្រជាពលរដ្ឋ អាជ្ញាធរមូលដ្ឋាន បានយកមែកឈើវ៉ៃ ភ្លើង និង ដោយមានការជួយអន្តរាគមន៍ពីកម្លាំងនគរបាលការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្តសៀមរាប ចំនួន០២គ្រឿង , រថយន្តអាជ្ញាធរជាតិអប្សរា ចំនួន០២គ្រឿង និងរថយន្តកងរាជអាវុធហត្ថចំនួន១គ្រឿង បានសហការពន្លត់មឲ្យភ្លើងរលត់វិញទាំងស្រុង នៅវេលាម៉ោង១៤និង៣០នាទី ដែលរាលដាល់ជិតដល់លំនៅឋានរបស់ប្រជាពលរដ្ឋ ។
សមត្ថកិច្ចនគរបាលខេត្តសៀមរាប បានឲ្យដឹងទៀតថា មូលហេតុនៃភ្លើងឆេះព្រៃនេះ គឺបណ្តាលមកពីក្មេងៗ បានដុតស្មៅក្នុងព្រៃនៃតំបន់នោះ ៕
អត្ថបទ និង រូបថត ៖ លោក គឿន វេត និង លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
