លោក អ៊ឹម អ៊ឹង មេឃុំរំចេក ក្នុងស្រុកបន្ទាយស្រី មានប្រសាសន៍ថា ស្ថានភាពស្ត្រីនៅមូលដ្ឋាននេះកាន់តែប្រសើរឡើង ខុសកាលពីប៉ុន្មានឆ្នាំមុនដែលតែងតែកើតមានអំពើហិង្សាក្នុងគ្រួសារ ហើយការថយចុះជាបន្តបន្ទាប់នៃអំពើហិង្សានេះ គឺដោយសារអាជ្ញាធរមូលដ្ឋាន និងអង្គការនានា តែងតែចុះអប់រំផ្សព្វផ្សាយជារឿយៗពាក់ព័ន្ឋទៅនឹង ការទប់ស្កាត់អំពើហិង្សាក្នុងគ្រួសារ , ការរំលោភសេពសន្ឋវៈ និងអំពើអបាយមុខផ្សេងៗ ខណៈក្នុងឆ្នាំ២០១៨កន្លងទៅនេះ អំពើហិង្សាក្នុងគ្រួសារ កើតមានតែមួយករណីប៉ុណ្ណោះ ប៉ុន្តែ ការបង្កើតទំនាស់ជាពាក្យសំដីធំតូចក្នុងគ្រួសារ នៅកើតមានតិចតួចដែលភាគច្រើនបង្កឡើងដោយបុរស ដោយសារគាត់ស្រវឹងស្រា តែមិនមានកើតជាអំពើហិង្សាដូចកាលពីប៉ុន្មានឆ្នាំនោះទេ ។
លោក អ៊ឹម អ៊ឹង មានប្រសាសន៍ទៀតថា ដើម្បីលើកស្ទួយសិទ្ឋិស្ត្រី ក៏ដូចជាទប់ស្កាត់នូវអំពើមិនគប្បីក្នុងសង្គម និងដើម្បីឱ្យជីវភាពសេដ្ឋកិច្ចគ្រួសារកាន់តែប្រសើរឡើង សូមសំណូមពរដល់ប្រជាពលរដ្ឋ ត្រូវចូលរួមទាំងអស់គ្នា តាមដាននិងទប់ស្កាត់ការចែកចាយនិង ប្រើប្រាស់គ្រឿងញៀន បើជួបករណីនេះ ត្រូវរាយការណ៍ទៅសមត្ថកិច្ចឬក៍អាជ្ញាធរមូលដ្ឋានដើម្បីមានវិធានការទប់ស្កាត់ជាបន្ទាន់ ។
លោក អ៊ឹម អ៊ឹង មានប្រសាសន៍បែបនេះ ថ្លែងក្នុងឱកាសអញ្ជើញជាអធិបតីក្នុងពិធីអបអរសាទរខួបលើកទី១០៨ ទិវាអន្តរជាតិនារី ៨មីនាឆ្នាំ២០១៩ កាលពីពេលថ្មីៗកន្លងទៅនេះ នៅមុខសាលាឃុំរំចេក ដែលសហការរៀបចំឡើងរវាងអាជ្ញាធរឃុំរំចេក និង អង្គការ អមរា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
