នៅព្រឹកថ្ងៃទី១១ ខែមីនា ឆ្នាំ២០១៩ ឯកឧត្តម ហង់ ពៅ អគ្គនាយកនៃអាជ្ញាធរជាតិអប្សរា បានអនុញ្ញាតឲ្យប្រតិភូចិនដឹកនាំដោយលោក ជូ មីង (CHOU Ming) អនុប្រធាននៃពិព័រណ៍សិល្ប:ចិនក្រោមការគ្រប់គ្រងនៃរដ្ឋបាលបេតិកភណ្ឌវប្បធម៌ជាតិចិន ចូលជួបសំណេះសំណាល ដើម្បីពិភាក្សាស្តីអំពីការស្នើខ្ចីរូបបដិមាខ្មែរ ដើម្បីយកទៅចូលរួមតាំងពិព័រណ៌អរិយធម៌អាស៊ីនៅប្រទេសចិន ។
ពិព័រណ៍ដែលនឹងរៀបចំធ្វើឡើងនៅខែឧសភា ឆ្នាំ២០១៩ នៅប្រទេសចិននេះ ភាគីចិនមានគោលបំណង រៀបចំពិព័រណ៍ដែលមានលក្ខណៈពិសេសនោះ ក្នុងន័យកិច្ចសហប្រតិបត្តិការបេតិកភណ្ឌវប្បធម៌នៅក្នុងរមណីយដ្ឋានអង្គរ ដែលចាំបាច់ត្រូវការបដិមា ដែលមានប្រភពមកពីប្រាសាទតាកែវ និងប្រាសាទចៅសាយទេវតា។
ឆ្លើយតបទៅនឹងសំណើរនេះ ភាគីអាជ្ញាធរជាតិអប្សរាមិនទាន់អាចឆ្លើយតបភ្លាមៗបាននៅឡើយទេ ដោយហេតុថា រាល់រូបបដិមា ដែលបានស្នើមកនេះ ចាំបាច់ត្រូវធ្វើការវាយតម្លៃធានារ៉ាប់រងស្របតាមការគ្រប់គ្រងបុរាណវត្ថុ ដើម្បីធានាបាននូវសុវត្ថិភាព។ ម្យ៉ាងវិញទៀត អាជ្ញាធរជាតិអប្សរាត្រូវការពេលវេលា ដើម្បីផ្តល់ព័ត៌មានទៅស្ថាប័នពាក់ព័ន្ធដើម្បីអាចអនុញ្ញាតឲ្យយកបដិមាចេញពីទីតាំងរក្សាទុក។
អាជ្ញាធរជាតិអប្សរាក៏បានសន្យាថានឹងជួយសម្របសម្រួលនិងសហការល្អ ចំពោះកិច្ចការនេះ ឲ្យដំណើរការបានរលូន ព្រោះនេះគឺជាឱកាស ដែលប្រទេសកម្ពុជា អាចបង្ហាញអរិយធម៌ដ៏ខ្ពង់ខ្ពស់របស់កម្ពុជា នាសម័យមហានគរ ទៅកាន់បណ្តាប្រទេសនៅអាស៊ី និងជុំវិញពិភពលោកឲ្យបានស្គាល់កម្ពុជាកាន់តែច្បាស់ថែមទៀត៕
សូមបញ្ជាក់ថា ក្នុងជំនួបរវាងអាជ្ញាធរជាតិអប្សរា និងប្រតិភូចិននាពេលនេះ នៅមិនទាន់បានកំណត់ចំនួនបដិមា សម្រាប់យកទៅចូលរួមក្នុងការតាំងពិព័រណ៍នៅប្រទេសចិន នៅខែឧសភានេះនៅឡើយទេ បច្ចុប្បន្នបដិមាទាំងនោះ ត្រូវបានរក្សាទុកនៅក្នុងសារមន្ទីរព្រះនរោត្តមសីហនុ-អង្គរ ខេត្តសៀមរាប។
សូមរំលឹកដែរថា បដិមា ដែលបានរក្សាទុកក្នុងសារមន្ទីរព្រះនរោត្តមសីហនុ-អង្គរនេះ គឺត្រូវបានធ្វើកំណាយឃើញក្នុងបរិវេណប្រាសាទតាកែវ និងប្រាសាទចៅសាយទេវតា ហើយប្រាសាទទាំងពីរនេះដែរ ក្រុមរដ្ឋាភិបាលចិនសម្រាប់ការអភិរក្សអង្គរហៅកាត់ថា CSA បានចូលរួមធ្វើការអភិរក្ស និងជួសជុល តាមរយៈការសហការពីអាជ្ញាធរជាតិអប្សរា ក្នុងនោះប្រាសាទចៅសាយទេវតាត្រូវបានជួសជុលក្នុងឆ្នាំ១៩៩៨ និងរួចរាល់នៅឆ្នាំ២០០៨ រីឯប្រាសាទតាកែវជួសជុល នៅឆ្នាំ២០០៧ និងបញ្ចប់នៅចុងឆ្នាំ២០១៧។
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
