ក្នុងឱកាសអញ្ជើញចូលជួបសំដែងការគួរសម និងពិក្សាការងារជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន នៅព្រឹកថ្ងៃទី ១១ ខែ មិនា ឆ្នាំ ២០១៩ ឯកឧត្តម ម៉ម សូណង់ដូ បានសំដែងការនូវការរីករាយ ចំពោះគំនិតផ្តួចផ្តើមដ៏ល្អរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ដែលបានរួមបញ្ចូលគណបក្សនយោបាយនានាចូលរួមគ្នាបំពេញកិច្ច ការងារបំរើប្រទេសជាតិ និងមាតុភូមិ ដោយបង្កើតជា ឧត្តមក្រុមប្រឹក្សាពិគ្រោះ និងផ្តល់យោបល់ ក្នុងនោះក៏មាន ឯកឧត្តម ម៉ម សូណង់ដូ នៅក្នុងឧត្តមក្រុមប្រឹក្សា នេះដែរ ហើយមានឋានៈស្មើទេសរដ្ឋមន្ត្រី ។
នៅកិច្ចពិក្សាការងារជាមួយ ឯកឧត្តម រដ្ឋមន្ត្រី ខៀវ កាញារីទ្ធ នាឱកាសនេះ ឯកឧត្តម ម៉ម សូណង់ដូ បានលើកឡើងពីការចង់ដឹង នូវគោលការណ៏របស់រាជរដ្ឋាភិបាល ក្នុងការជួលរលកសញ្ញានៃការផ្សាយវិទ្យុដល់ជនបរទេស តើមានបែបបទ និង លក្ខណៈដូចម្តេច? ទាក់ទងបញ្ហានេះ ឯកឧត្តម រដ្ឋមន្ត្រី ខៀវ កាញារីទ្ធ បាន ធ្វើការបញ្ជាក់ថា ការជូលរកលសញ្ញានៃការផ្សាយវិទ្យុនៅកម្ពុជា ឲ្យទៅ ជនបរទេស គឺត្រូវរង់ចាំបន្តិចទៀតសិន ព្រោះរាជរដ្ឋាភិបាល ក្នុងនោះក្រសួងព័ត៌មាន បាននឹង កំពុងរៀបចំធ្វើវិសោធនកម្ម ច្បាប់ស្តីពីរបបសារព័ត៌មាន ដែល បានអនុម័ត កាលពីឆ្នាំ ១៩៩៥ មកនោះ ជាគោលការណ៏ធំបំផុត នៃសិទ្ធិក្នុងការ បំភ្លឺ និងកាតព្វកិច្ច ក្នុងការចុះផ្សាយ និងផ្សព្វផ្សាយ នៃការសុំបំភ្លឺ របស់ភាគីដែល យល់ថា ការផ្សាយព័ត៌មាននោះ មិនពិត ធ្វើប៉ះពាល់ដល់ផលប្រយោជន៏ និង កិត្តិយសរបស់ខ្លួននោះ។
អត្ថបទ និង រូបថត ៖ ក្រសួងព័ត៌មាន
ព័ត៌មានជាតិ ថ្មីៗ
