នារសៀលថ្ងៃទី១១ ខែមីនា ឆ្នាំ ២០១៩ ម្សិលមិញនេះ ក្រសួងឧស្សហកម្ម និងសិប្បកម្ម បានសហការជាមួយអង្គភាពកម្មសិទ្ធិបញ្ញា សិង្ហបុរី រៀបចំសិក្ខាសាលាមួយ ស្តីពីផ្សាព្វផ្សាយការចុះបញ្ជីប្រកាសនីយបត្រតក្កកម្មសិង្ហបុរី នៅកម្ពុជា និងការរីកចម្រើនកម្មសិទិ្ធបញ្ញា ជាលើកទី២ នៅសណ្ឋាគារ Angkor Palace Resort & Spa ក្នុងខេត្តសៀមរាប ក្នុងគោលបំណងផ្សព្វផ្សាយ នូវចំណេះដឹងពាក់ព័ន្ធកិច្ចការពារកម្មសិទ្ធិបញ្ញាដល់វិស័យឯកជន អ្នកច្នៃប្រឌិត និងម្ចាស់សហគ្រាសទាំងអស់ សាស្ត្រាចារ្យ ភ្នាក់ងារកម្មសិទ្ធិបញ្ញា មន្ត្រីរាជការ ឲ្យយល់ដឹងអំពីសារប្រយោជន៍នៃការចុះបញ្ជីប្រកាសនីយបត្រតក្កកម្មសិង្ហបុរី នៅកម្ពុជា និងការរីកចម្រើនកម្មសិទិ្ធបញ្ញា ។
ការយល់ដឹងអំពីការចុះបញ្ជីប្រកាសនីយបត្រតក្កកម្មសិង្ហបុរីនៅកម្ពុជា នឹងផ្តល់ផលប្រយោជន៍ ព្រមទាំងចំណេះដឹងដល់តក្កករ សិប្បករ មេធាវី ភ្នាក់ងារកម្មសិទ្ធិបញ្ញា ដែលកំពុងប្រកបរបរអាជីវកម្មរបស់ខ្លួន បានយល់ពីសារ:សំខាន់ នៃកិច្ចការពារកម្មសិទិ្ធបញ្ញា។
ឯកឧត្តម សឹម ណារ៉ា អគ្គនាយក នៃអគ្គនាយកដ្ឋានឧស្សាហកម្ម ក្រសួឧស្សាហកម្មនិងសិប្បកម្ម មានប្រសាសន៍ថា សម្រាប់ការចូលរួមក្នុងក្របខ័ណ្ឌសាកលភាវូបនីយកម្មសេដ្ឋកិច្ច និងការចូលរួមក្នុងសហគមន៍សេដ្ឋកិច្ចអាស៊ាននាបច្ចុប្បន្ននេះ រាជរដ្ឋាភិបាលកម្ពុជាបានខិតខំប្រឹងប្រែងអភិវឌ្ឍលើគ្រប់វិស័យ ដែលក្នុងនោះកម្មសិទ្ធិបញ្ញា ដែលជាផ្នែកមួយដ៏មានសារៈសំខាន់សម្រាប់ជំរុញការធ្វើពាណិជ្ជកម្ម ការជំរុញឲ្យមានការច្នៃប្រឌិត និងបង្កើតផលិតកម្មឧស្សាហកម្មថ្មីៗ ជំរុញការប្រកួតប្រជែងទីផ្សារក្នុងប្រទេស តំបន់ និងអន្តរជាតិ និងធ្វើឱ្យកាន់តែរីកចម្រើន និងធានាឲ្យបាននូវកិច្ចការពារកម្មសិទ្ធិបញ្ញា នៅកម្ពុជាស្របតាមច្បាប់ជាតិ និងបទដ្ឋានអន្តរជាតិ ។
ឯកឧត្តម មានប្រសាសន៍ទៀតថា កម្ពុជាបានចូលជាសមាជិកទី១៥១ នៃសន្ធិសញ្ញាសហប្រតិបត្តិការប្រកាសនីយបត្រតក្កកម្ម (The Patent Cooperation Treaty (PCT)) នៅថ្ងៃទី០៨ ខែធ្នូ ឆ្នាំ២០១៦ ដែលជួយសម្រួលដល់ការដាក់ពាក្យសុំ ការពិនិត្យនិងស្រាវជ្រាវ បោះពុម្ពផ្សាយប្រកាសនីយបត្រតក្កកម្ម កាត់បន្ថយលើការចំណាយប្រាក់ក្នុងកិច្ចការពារប្រកាសនីយបត្រតក្កកម្ម នៅក្នុងបណ្តាប្រទេសជាច្រើន ចំនួន១៥១ប្រទេសជុំវិញសាកលលោក និង ជាសមាជិកទី៦៦ នៃសន្ធិសញ្ញាទីក្រុងហ្សឺណែវ (ឆ្នាំ១៩៩៩) នៃកិច្ចព្រមពៀងទីក្រុងហេចពាក់ព័ន្ធនឹងការចុះបញ្ជីគំនូរឧស្សាហកម្ម អន្តរជាតិ (The Geneva Act (1999) of the Hague Agreement for International Registration of Industrial Design) នៅថ្ងៃទី២៥ ខែកុម្ភៈ ឆ្នាំ២០១៧ ។
ឯកឧត្តមអគ្គនាយក មានប្រសាសន៍បន្ថែមទៀតថា រាជរដ្ឋាភិ បាលកម្ពុជា ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ឲ្យអនុវត្តនូវយុទ្ធសាស្ត្រចតុកោណដំណាក់កាលទី៤ និងគោលនយោបាយអភិវឌ្ឍវិស័យឧស្សាហកម្ម ហើយក្រសួងឧស្សាហកម្មនិងសិប្បកម្ម នឹងបន្តខិតខំធ្វើយ៉ាងណាឲ្យកិច្ចការពារកម្មសិទ្ធិបញ្ញានៅកម្ពុជា ជាពិសេសផ្នែកប្រកាសនីយបត្រតក្កកម្មកាន់តែរីកធំធាត់ទៅមុខយ៉ាងឆាប់រហ័ស ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
